ޕާޓީއެއްގެ ނަމުގެ ކުރިޔަށް ޑިމޮކްރަސީ ލިޔަސް އެ ޕާޓީ އަކީ ޑިމޮކްރެޓިކް ޕާޓީއަކަށް ނުވާނެ ކަމަށް ވިދާޅުވެ، ކުރީގެ ރައީސް ޑރ. މުހައްމަދު ވަހީދު ހަސަން މަނިކު، އެމްޑީޕީއަށް ނުސީދާ ގޮތަކަށް ބަހުގެ ހަމަލާތައް ފޮނުވައިފިއެވެ.

ހޯމަ ދުވަހުގެރޭ ރައީސް ވަހީދަށް އިދިކޮޅު ކޯލިޝަނުގެ ހާއްސަ އެޑްވައިޒަރު ކަމުގެ މަގާމު އެރުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޑރ. ވަހީދު ވިދާޅުވީ، 1980 ވަނަ އަހަރުން ފެށިގެން އެކި ގޮތް ގޮތުން އެމަނިކުފާނު އަންނަނީ ޑިމޮކްރަސީ އަށް މަސައްކަތްކުރައްވަމުން ކަމަށާއި، ޕާޓީ ނިޒާމުގެ ތެރެއިން ސަރުކާރުގެ އެކި މަގާމުގެ ތެރެއިން ޑިމޮކްރެސީއަށްޓަކައި ވަރަށް ގިނަ މަސައްކަތް ކުރެވިފައިވާ ކަމަށެވެ.

ޑރ. ވަހީދު ވިދާޅުވި ގޮތުގައި، މިހާރު މިއޮތް ޑިމޮކްރެސީ ވަރުގަދަ ކުރަން ޖެހެއެވެ. ޑިމޮކްރެސީ އަކީ ރައްޔިތުން ގަބޫލްކުރާ ޑިމޮކްރެސީ އަކަށް ވާން ޖެހޭނެ ފާހަގަކުރައްވަމުން އެމަނިކުފާނު ވިދާޅުވީ، ރައްޔިތުންނަށް ޒިންމާދާރުވާ ޑިމޮކްރެސީ އަކަށް ވާން ޖެހޭނެ ކަމަށެެވެ. ޒިންމާދާރުވާން ޑިމޮކްރެސީގައި ވަރުގަދަ އިދިކޮޅެއްވެސް އޮންނަން ޖެހޭނެ ފާހަގަކުރައްވައި ރައިސް ވަހީދު ވިދާޅުވީ، މިއަދު އެ މަގާމު އަދާކުރަނީ ޕީޕީއެމް/ޕީއެންސީން ކަމަށެވެ.

އެމަނިކުފާނު ވިދާޅުވީ، ގައުމުގެ ސުލްހަ މަސްލަސްކަމަށް ލޯބި ކޮށްގެން އެއްބާރުލުން ހުރިހާ ފަރާތްތަކުން ދޭނެ ކަމަށް ގަބޫލުފުޅު ކުރައްވާ ކަމަށެވެ. އެއަށް ފަހު އެމަނިކުފާނު ވިދާޅުވީ، ޑިމޮކްރެސީ އަކި ހަމައެކަނި ނަމެއް އޮތުމުންވާ ކަމެއް ނޫން ކަމަށެވެ.

ވެރިކަމަށް ފަހު ފާއިތުވި ގިނަ އަހަރުތަކެއް ޑރ. ވަހީދު ހޭދަކުރައްވަމުން އައީ ރާއްޖެއިން ބޭރުގައެވެ. ނަމަވެސް މިހާރު ސިޔާސީ ކަންތަކަށް އަލުން ވަޑައިގެން ގެންނެވީ ގައުމަށް ހިދުމަތެއް ކޮށްދޭން ބޭނުންވާތީ ކަމަށް ވިދާޅުވިއެވެ.

މަނީލޯންޑަރިންގެ ކުށް ސާާބިތުވެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަށް އަދުލުވެރި އިންސާފެއް ހޯދައިދޭން ޖެހޭ ކަމަށް ގަބޫލުފުޅުކުރައްވާ ކަމަށް ޑރ. ވަހީދު ވިދާޅުވިއެވެ.

ރާއްޖެއަށް ބޮޑު މުސީބާތެއް ކުރމަތިވެފައިވާ ދަނޑިވަޅެއްގައި ރާއްޖެއަށް ހިދުމަތްތަކެއް ކޮށްދެއްވި ބޭފުޅަކު ޖަލުގައި ހުންނެވުމަކީ، އިންސާފުވެރި ގޮތެއް ނޫންކަން ޑރ. ވަހީދު ފާހަގަކުރެއްވިއެވެ.