އިންސާނީ ވަގުފާރީގެ ބޮޑެތި މައްސަލަތައް ފެންމަތިވީ، ވަރކް ވީޒާއާ ގުޅޭ ކަންކަން އިމިގްރޭޝަންގެ ދަށަށް ބަދަލު ކުރެވުނު ފަހުން ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ރައްޔިތުންގެ މަޖިލިހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި ދިވެހިރާއްޖޭގެ އިމިގްރޭޝަންގެ ޤާނޫނަށް އިޞްލާޙު ގެނައުމުގެ ބިލާ ގުޅޭގޮތުން ވާހަކަ ދައްކަވަމުން ފައްޔާޒް ވިދާޅުވީ، ސަރުކާރުން ބޭނުންވަނީ ވަރކް ވިސާއާއި ބިޒްނަސް ވިސާގެ ކަންކަން އިކޮނޮމިކް މިނިސްޓްރީގެ ދަށަށް ބަދަލުކުރަން ކަމަށެވެ. ފައްޔާޒް ވިދާޅުވީ، މި ގާނޫނަށް ހުށައަޅާފައިވާ ހުރިހާ އިސްލާހުތަކަކީވެސް، ސަރުކާރުން އެކަމާއިމެދު ވަޒީރުންގެ މަޖިލިހުގައި މަޝްވަރާކުރެވި، ރަސްމީ އެޕްރޫވަލް ހޯދާފައިވާ ހުށައެޅުންތަކެއް ކަމަށެވެ.
ސަރުކާރުން ހުށައެޅި ބިލުގައި ވަނީ، ވާރކް ވީޒާގެ ބަދަލުގައި ވާރކް ޕަރމިޓެއް ދޫކުރާ ގޮތަށް ހަމަޖައްސައި، ވަރކް ޕަރމިޓް ދޫކުރުމުގެ އެންމެހައި ކަންކަން، ވަޒީފާއާބެހޭ ސިޔާސަތުތައް ތަންފީޒުކުރުމުގެ މަސްއޫލިއްޔަތު ހަވާލުކުރެވިފައިވާ ވުޒާރާއިން ކުރާ ގޮތަށް ހަމަޖެއްސުމަށެވެ.
މިހާރުވެސް ގާނޫނުގައި ބިޒްނަސް ވިސާއާ ގުޅޭގޮތުން ބަޔާންކޮށްފައިވާ ގޮތަށް އަލިއަޅުވާލާ ފައްޔާޒް ވިދާޅުވީ، ބިޒްނަސް ވިސާ އަކީ ކަމާބެހޭ އިދާރާއެއްގެ ހުއްދަ ލިބިގެން ދޫކުރެވޭ ވިސާއެއް ކަމަށެވެ. އަދި މިހާރު އެ މިނިސްޓްރީގެ ހުއްދައެއް ހޯދުމަކާ ނުލާ އިމިގްރޭޝަނުން ބިޒްނަސް ވިސާ ދޫކުރަމުން އަންނަ ކަން ފާހަގަކުރައްވާ ފައްޔާޒް ވިދާޅުވީ، ގާނޫނުގައި ބުނާ ކަމާބެހޭ އިދާރާއަކި ރަޖިސްޓްރަރ އޮފް ބިޒްނަސް ކަމަށެވެ.
މިހާރުވެސް ގާނޫނުގައި މިއޮންނަނީ، ބިޒްނަސް ވީޒާއަކީ ސަރުކާރުގެ ކަމާބެހޭ ދާއިރާއެއްގެ ހުއްދަ ލިބިގެންނޭ (ދޫކުރަންވާނީ). މިހާރު އަޅުގަނޑުމެންގެ ހުއްދައެއް ލިބިގެނެއް ނޫން ދޫކުރަނީ. ސީދާ އިމިގްރޭޝަނަށް އެޕްލައިކޮށްގެން. އަޅުގަނޑުމެން މިޖަހަނީ ވަރަށް ސާފުކޮށް ކަމާބެހޭ އިދާރާއަކީ ރަޖިސްޓްރަރ އޮފް ބިޒްނަސްއިކޮނޮމިކް މިނިސްޓަރ ފައްޔާޒް އިސްމާއިލް
ފައްޔާޒް އިތުރަށް ވިދާޅުވީ، ބިޒްނަސް ވީޒާގެ ކަންތަކުގައި އިމިގްރޭޝަނުން ކަންކަން ކުރަން ޖެހޭނީ އެ މިނިސްޓްރީގެ އެޕްރޫވަލްގެ މައްޗަށް ބިނާކޮށް ކަމަށެވެ. އިމިގްރޭޝަން ގާނޫނަށް ހުށައަޅާފައިވާ އިސްލާހުގައި ވަނީ ބިޒްނަސް ވީޒާއާއި، އަލަށް ތައާރަފްކުރެވޭ ކޯޕަރޭޓް ރެޒިޑެންޓް ވީސާ ދޫކުރުމާއި، މުއްދަތު އިތުރުކުރުމާއި، ބާތިލްކުރުމާއިގުޅޭ ކަންކަން ކުރާނީ ރަޖިސްޓްރަރ އޮފް ބިޒްނަސް ކަމަށެވެ.
މިނިސްޓްރީގެ ދަށަށް ވަރކް ޕާމިޓް ބަދަލުކުރަނީ ހުރިކަންކަން އިސްލާހުކުރަން
ވަރކް ވީޒާއާ ގުޅިގެން ހުށައަޅާފައިވާ އިސްލާހަށް ވާހަކަ ދައްކަވަމުން، ވަރކް ޕަރމިޓް ދޫކުރުމާއި، ފީ ނެގުމާއި، ބްލެކްލިސްޓް ކުރުން ފަދަ ކަންކަން ކުރާނީ މިނިސްޓްރީން ކަމަށް ވިދާޅުވިއެވެ. މިހާރު މި ބާރުތައް އިމިގްރޭޝަންގެ ދަށުގައި އޮތުމުން، ސަރުކާރުން ގެންގުޅޭ ލޭބަރ އުސޫލުތަކާއި ފުށުއަރާ ކަމަށެވެ. ފައްޔާޒް ގަބޫލުކުރައްވާ ގޮތުގައި ވިޔަފާރިތަކަށް ފިޔަވަޅު އެޅުމާއި ލުއި ދިނުމުގެ ކޮންޓްރޯލް އޮންނަން ޖެހޭނީ މިނިސްޓްރީގެ ދަށުގައެވެ.
މިހާރު ވާގޮތަކީ އިމިގްރޭޝަނުން ބްލެކްލިސްޓް ކުރަނީ ވިޔަފާރިއެއް، މިސާލަކަށް ވީޒާ ފީއެއް ނުދެއްކިގެން. އޭގަ އެބައުޅޭ އަޅުގަނޑުމެންނަށް ދަތިތަކެއް. އަޅުގަނޑުމެން ލޭބަރއާ ގުޅޭ ކަންކަން ގެންގުޅެން ބޭނުންވާ އުސޫލުތަކާ، ދޭން ބޭނުންވާ ލުއިތަކާ، އަނބުރާ ގެންނަން ވެއްޖިއްޔާ، އަޅުގަނޑުމެންގެ ކޮންޓްރޯލް އޮންނަން ޖެހޭނެ ކަމަށް މި ގަބޫލުކުރަނީ.އިކޮނޮމިކް މިނިސްޓަރ ފައްޔާޒް އިސްމާއިލް
ފައްޔާޒް އިތުރަށް ވިދާޅުވީ، މިހާރު ރާއްޖޭގައި ލިޔެކިޔުމެއް ނެތި އުޅޭ ބިދޭސީންގެ ކަންކަން ބޮއްސުން ލައިގެން ދިއުމުގައި އޭރު އިމިގްރޭޝަނުން ދައުރުގެ ބޮޑު ކަމަށެވެ. މިހާރުވެސް އިމިގްރޭޝަނަށް އިތުބާރު ނުކުރައްވާ މޭރުމަކުން ވާހަކަ ދައްކަވަމުން ފައްޔާޒް ވިދާޅުވީ، ކޮމިޓީގެ ކްލޯޒްޑް ސެޝަނެއްގައި އެ ވާހަކަތައް ދައްކާނެ ކަމަށެވެ.
އިންސާނީ ވަގުފާރީގެ މައްސަލައިގައި އިމިގްރޭޝަންގެ މައްޗަށް ބޮޑެތި ތުހުމަތުތަކެއް ކުރެވޭއިރު، ނިމިދިޔަ އަހަރުގެ ސެޕްޓެމްބަރު މަހުގެ ތެރޭގައި އިކޮޮނޮމިކް މިނިސްޓްރީގެ ދަށަށް ވަރކް ވީޒާއަށް ބޭނުންވާ ކޯޓާ ދޫކުރުމުގެ ކަންކަން ވަނީ ބަދަލުކޮށްފައެވެ. އިންސާނީ ވަގުފާރީގެ މައްސަލައަށް ހައްލެއް ގެނައުމަކީ މި ސަރުކާރުގެ މުހިއްމު އެއް ވައުދެވެ.
