ގޮތްނޭނގޭ މަރުތަކާއި, ގެއްލުވާލާފައިވާ މީހުންގެ މައްސަލަތައް ބަލާ މަރު ކޮމިޝަނުން ބަލަމުންދާ އެއްވެސް މައްސަލައެއްގެ ތަޙުޤީޤު އިތުރަށް ކުރިއަށް ގެންދެވެން ނެތް ކަމަށް ބުނެފައި ނުވާނެ ކަމަށް އެ ކޮމިޝަނުން ބުނެފިއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަ ދައްކަވަމުން މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ ގޮތްނޭނގޭ މަރުތަކާއި، ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުގެ ތަޙުޤީޤުތައް އިތުރަށް ކުރިއަށް ނުގެންދެވޭނެ ކަމަށް ބުނެ، އެކޮމިޝަނުން ރައްޔިތުންގެ މަޖިލީހަށް ސިޓީއެއް ފޮނުވާފައިވާ ކަމަށެވެ. ރައީސް ނަޝީދު ވިދާޅުވީ މަރު ކޮމިޝަނުން ދެކޭގޮތުގައި މިހާރު އެކުލަވާލާފައިވާ ޑްރާފްޓަށް ދެން އިތުރު ހެއްކެއް ހޯދެން ނެތް ކަމަށެވެ. ކޮމިޝަނުން ބޭނުންވަނީ ހަމައެކަނި ވަޅި ޖެހި މީހާއަށް ދައުވާކުރަން ކަމަށް ރައީސް ނަޝީދު ވިދާޅުވިއެވެ.
މި މަޖިލީހުން އަބަދުވެސް ފާހަގަކުރަމުން އައި އެއް ކަމަކީ އެ ޑްރާފްޓް މިތަނަށް ލިބުނުއިރު ހުރި މިންވަރަށް ދައުވާ ނުކުރެވުނީ ކީއްވެގެންތޯ. އެބޭފުޅުން ވިދާޅުވަނީ ހަމައެކަނި ވަޅި ޖެހި މީހާއަށޭ ތިމަންމެން ދައުވާކުރަން މިއުޅެނީ. އެކަން ހިންގާ އޭގެ އިންތިޒާމާއި އޭގެ ބައިވެރިންނާއި ސިއްރުކުރި މީހުންނާއި ޚަރަދުކުރި މީހުންނާއި މުޅި މިކަމަށް ފުރިހަމައަށް އެކޮމިޝަނުން ބެލިފައެއް ނުވޭ. އެކޮމިޝަނުން ވިދާޅުވަނީ ޑްރާފްޓް ކޮޕީ، ރިޕޯޓު ނިކުތީމާ ތަޙުޤީޤަށް ހުރަސް އެޅުނީ ކަމަށް.ރައްުޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު
ޖަލްސާ ނިންމަވާލައްވަމުން މިމައްސަލަ އިތުރަށް ދެން ކުރިއަށް ގެންދަވާނެ ގޮތަކާމެދު މެމްބަރުންނަށް ބަހުސް ކުރުމުގެ ފުރުސަތު ރިޔާސަތުން ހުޅުވާލުމުން، މިމައްސަލައަށް މެމްބަރުން ވަނީ ބަހުސްވެސް ކުރައްވާފައެވެ. ޖަލްސާ ނިންމަވާލައްވަމުން ވާހަކަދައްކަވަމުން ރައީސް ނަޝީދު ވިދާޅުވީ މިކަން ނުވިކަމަށް ބަލާ މިކަން ހުއްޓާލުމަކީ އެމަނިކުފާނުގެ ސިޔާސީ ހަޔާތުގައި ނުކުރައްވާނެ ކަމެއް ކަމަށެވެ. އަދި މިކަމަށް ގޮތެއް ހޯއްދަވާނެ ކަމަށް ރައީސް ނަޝީދު ވިދާޅުވި އެވެ.
މަޖިލީހުގެ ޖަލްސާގައި މިމައްސަލައަށް ފުޅާ ދާއިރާއެއްގައި ބަހުސްކޮށްފައި ވަނިކޮށް އެކޮމިޝަނުން ވަނީ ކޮމިޝަނުގެ މަސައްކަތްތައް ހުއްޓާލާފައިވާ ކަމަށް ބުނެ ބައެއް ޚަބަރު ފަތުރާ ވަސީލަތްތަކުން ގެނެސްދީފައިވާ ޚަބަރާ ގުޅޭގޮތުން ބަޔާނެއް ނެރެފައެވެ. އެބަޔާނުގައި ބުނެފައިވަނީ ކޮމިޝަނުން ބަލަމުންދާ މައްސަލަތައް ގޮސްފައިވާ ހިސާބު ލިޔުމުން އެންގުމަށް ރައްޔިތުންގެ މަޖިލީހުން އަންގާފައިވާތީ، ކޮމިޝަނުން ބަލަމުންދާ މައްސަލަތަކުގެ ތަޙުޤީޤު މިހާރު ކުރިއަށް ގޮސްފައިވާ ހިސާބު އަދި ކޮމިޝަނުން ބަލަމުންދާ މައްސަލަތަކުގައި ހެކި ހޯދުމަށް ހުރި ގޮންޖެހުންތަކުގެ ވާހަކަ ދަންނަވާފައިވާނެ ކަމަށެވެ.
އަދި ކޮމިޝަނުން ބަލަމުންދާ އެއްވެސް މައްސަލައެއްގެ ތަޙުޤީޤު ކުރިއަށް ނުގެންދިޔުމަށް ނިންމާފައި ނުވާކަމަށާއި، ކޮމިޝަނުގެ މަސައްކަތް ހުއްޓުމެއްނެތި ކުރަމުންދާ ކަމަށްވެސް އެކޮމިޝަނުން ނެރުނު ބަޔާނުގައި ވަނީ ބުނެފައެވެ.
މަރު ކޮމިޝަނުން ބަލަމުން އައި މައްސަލަތަކުގެ ތެރެއިން، ދީނީ އިލްމުވެރިޔާ އަދި އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ އަވަހާރަކޮށްލި ގޮތާ ބެހޭ ޑްރާފްޓް ރިޕޯޓަކާއި ނޫސްވެރިޔާ އަހުމަދު ރިޟުވާން އަބްދުﷲ ގެއްލުވައިލި މައްސަލައާ ގުޅޭ ރިޕޯޓެއް މަޖިލީހަށް ވަނީ ފޮނުވާފައެވެ. އަދި ކޮމިޝަނުން އަމިއްލައަށް ވެސް އޭގެ ބައެއް މައުލޫމާތު އާއްމުކޮށްފައިވެއެވެ. ނަމަވެސް މުޅި ރިޕޯޓު އާންމުކުރީ ރައްޔިތުންގެ މަޖިލީހުންނެވެ. އަދި މަޖިލީހުގައި އެ ރިޕޯޓުތަކާއި ގުޅިގެން ބަހުސްތަކެއްވެސް ވަނީ ކުރިއަށް ގެންގޮސްފައެވެ.
ގޮތްނޭނގޭ ގޮތްގޮތަށް މަރާލާފައިވާ މީހުންނާއި ގެއްލުވާލާފައިވާ މީހުންނަށް އިންސާފުހޯދައި ދިނުމަކީ މިސަރުކާރުގެ ރިޔާސީ ވައުދެކެވެ. އަދި އެކަމާއި ގުޅިގެން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން މަރު ކޮމިޝަން އުފެއްދެވިއިރު، އެ ކޮމިޝަނަށް ވަނީ ޤާނޫނީ ގޮތުން ބާރުތަކެއްވެސް ދީފައެވެ.
