ޗައިނާއާ އިންޑިއާ ގުޅޭ ބޯޑަރު ސަރަހައްދުގައި ހިނގި ކުރިމަތިލުންތަކުގައި އިންޑިއާގެ ސިފައިން މަރުވެފައިވާތީ ދިވެހި ސަރުކާރުން ތައުޒިޔާ ފޮނުވައިފިއެވެ.
ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ، ބޯޑަރު ސަރަހައްދުގައި ހިނގި ހަމަނުޖެހުންތަކުގައި މަރުވި އިންޑިއާގެ ރައްޔިތުންނަށް ތައުޒިޔާ ފޮނުވާ ކަމަށެވެ.
އިންޑިއާ-ޗައިނާ ދެ ގައުމުގެ ސިފައިންގެ މެދުގައި ބަދަލުކުރެވުނު ހަމަލާތަކުގައި އިންޑިއާގެ 20 މީހަކު މަރުވެފައިވާ ކަމަށް މީޑިއާތަކުން ވަނީ ރިޕޯޓްކޮށްފައެވެ. ޗައިނާގެ ސިފައިންނަށް ލިބިފައިވާ ގެއްލުމެއް އެ ގައުމުން މިހާތަނަށް ހާމަކޮށްފައެއް ނުވެއެވެ.
ހަމަނުުޖެހުމުގައި ފަހު އިންޑިއާގެ ސިފައިންތަކެއް ޗައިނާއިން ހައްޔަރުކޮށްފައިވާ ކަމަށް ވަނީ ރިޕޯޓްކޮށްފައެވެ. އެކަމަކު ޗައިނާގެ ފޮރިން މިނިސްޓްރީގެ ތަރުޖަމާނު ޒައޯ ލީޖިއަން ވަނީ އެވާހަކަތައް ދޮގުކުރައްވާފައެވެ. ހަމަލާއާ ގުޅިގެން ޗައިނާއާ އިންޑިއާ ދެމެދު ނުތަންވަސްކަން ވަނީ ގިނަވެފައެވެ.
