އައްޑޫ ސިޓީގެ ގަމާއި ސްރިލަންކާގެ ވެރިރަށް ކޮލަމްބޯއާ ދެމެދު ސްރީލަންކަންއިން ކުރަމުން އައި ދަތުރުތައް ހުއްޓާލަން ނިންމުުމުން އިދިކޮޅު ޕީޕިއެމް/ޕީއެންސީން ކަންބޮޑުވުން ފާޅުކޮށްފިއެވެ.

ޕީޕީއެމުން އާއްމުކޮށްފައިވާ ބަޔާނެއްގައި ބުނީ، ކޮލޮމްބޯއާ ގަމާއި ދޭތެރޭ ސްރީލަންކަން އިން ކުރަމުން ގެންދިޔަ ދަތުރުތައް ހުއްޓާލުމަށް ނިންމި ނިންމުމަކީ ކޯލިޝަނުން ވަރަށް ކަންބޮޑުވުމާ ކަމެއް ކަމަށެވެ. އެ ދަތުރުތައް ހުއްޓުމެއް ނެތި ކުރިއަށް ގެންދެވޭނެ އިންތިޒާމު ހަމަޖެއްސުމަށްވެސް އިދިކޮޅުން ވަނީ ސަރުކާރަށް ގޮވާލާފައެވެ.

ޕީޕީއެމުން ބުނީ، ކުރީގެ ރައީސް، އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ކޮލޮމްބޯ އާއި ގަމާއި ދޭތެރޭގެ ދަތުރުތައް ފައްޓާފައިވަނީ އެ ދަތުރުތަކުގެ ސަބަބުން އައްޑޫ ސިޓީއާއި ދެކުނު ގައި ދިރިއުޅޭ ރައްޔިތުންނަށް ރާއްޖެއިން ބޭރަށް ދަތުރު ކުރުމުގައި އިތުރު ލުއިތައް ހޯދައި ދިނުމުގެ މަގްސަދުގައި ކަމަށެވެ. އަދި އެ ސަރަހައްދުގެ ފަތުރުވެރިކަން އިތުރަށް ވަރުގަދަކޮށް ތަރައްގީ ކުރުމާއި ވިޔަފާރިތަކަށްވެސް ލުއި ފަސޭހަތައް ހޯދައިދިނުމުގެވެސް މަގްސަދު ގައި ކަމަށް ކޯލިޝަންގެ ބަޔާނުގައި ބުންޏެވެ.

ނަމަވެސް އެ ދަތުރުތައް ހުއްޓާލައިފިނަމަ، އެ ސަރައްހަދުގައި ދިރިއުޅޭ ރައްޔިތުންނަށް ބައިނަލްއަގްވާމީ ދަތުރުތައް ކުރުމުގައި އިތުރު ދަތިތައް ކުރިމަތިވުމުގެ އިތުރުން، ރާއްޖޭގެ އިގްތިސާދަށާއި ފަތުރުވެރިކަމަށް ވެސް ނޭދެވޭ އަސަރުތަކެއް ކުރާނެކަމީ ޔަގީން ކަމެއްކަށެވެ.

ކުރީ ސަރުކާރުގައިވެސް ކޮލޮމްބޯއާއި ގަމާއި ދޭތެރޭ ކުރަމުން ދިޔަ ދަތުރުތަކުން އެއަރލައިން އަށް ގެއްލުންވާ ކަމަށް ބުނެ، އެދަތުރުތައް ހުއްޓާލުމަށް ވަނީ މަސައްކަތްކޮށްފައެވެ. އެހެންނަމަވެސް، އެއަރލައިންއަށް ގެއްލުން ނުވެ ދަތުރުތައް ކުރެވޭނެ އިންތިޒާމް ހަމަޖައްސާނެކަމުގެ ޔަގީންކަން ރައީސް ޔާމީނުގެ ވެރިކަމުގައި ސްރީލަންކަންއަށް ދިނުމަށްފަހު، އެކަމަށް ވާން ޖެހޭ ހުރިހާ ތައްޔާރީވެ، އެ އިންތިޒާމްތައްވެސް އޭރު ހަމަޖައްސާފައިވާކަން ޕީޕީއެމުން ވަނީ ފާހަގަކޮށްފައެވެ.

އެހެންކަމުން ޔާމީނުގެ ވެރިކަމުގައި ނިންމަވާ އިންތިޒާމުތައް ހަމަޖައްސަވާފައިވާ ގޮތަށް، ހުވަދޫއާއި އައްޑޫ ސިޓީ ދޭތެރޭގެ ޑޮމެސްޓިކް ދަތުރުތައް ރާއްޖޭގެ މޯލްޑިވިއަނުން ފެށުމާއެކު، ކޮލޮމްބޯ އާއި ގަމާއި ދޭތެރޭ ސްރީލަންކަން އެއަރލައިންސް އިން ކުރަމުން ގެންދާ ބައިނަލްއަގްވާމީ ދަތުރުތައް ހުއްޓުމަކަށްނައިސް ކުރިއަށް ގެންދެވޭނެ އިންތިޒާމުތައް ހަމަޖެއްސުމަށް އިދިކޮޅުން ވަނީ ސަރުކާރަށް ގޮވާލާފައެވެ.

ގަމާއި ކޮލަމްބޯ ދަތުރުތަކާއި ގުޅޭ ގޮތުން އޭސް ޓްރެވެލްގެ މެނޭޖިން ޑިރެކްޓަރ މުހައްމަދު ފިރާގު ކުރެއްވި ފޭސްބުކް ޕޯސްޓެެއްގައި ވިދާޅުވި، ކޮލަމްބޯއިން ގަމަށްކުރާ ދަތުރުތައް ނިންމާވައިނުވާ ސަބަބަކަށް ދިމާވަނީ އެކަށީގެންވާ ވަރަށް ޕަސެންޖަރުން ނުލިބުމާއި އައްޑޫ ސިޓީ އެކަނި ހިމެނިގެން އެކަށީގެންވާ އަދަދަށް ފަސެންޖަރުން ނުލިބޭތީ ކަމަށެވެ.

ގައުމީ އެއާލައިން މޯލްޑިވިއަނުން ވަނީ ނިމިދިޔަ އަހަރުގެ ޑިސެމްބަރު މަހުގެ ތެރޭގައި އައްޑޫއާ ހުވަދޫ އަތޮޅާއި ދޭތެރޭގައި ދަތުރުތައް ފަށާނެ ކަމަށް އިއުލާންކޮށްފައެވެ.