ސިޔާސީ ލީޑަރުންގެ ތެރެއިން ހުރިހާ "ދިމާލެއްގެ" ބޭފުޅުން އެމްއެމްޕީއާރުސީގެ ޚިޔާނާތުގެ ލިސްޓުގައި ހިމެނޭ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަ ދައްކަވަމުން ޕީޖީ ޝަމީމް ވިދާޅުވީ، ތަހުގީގު ހިނގަމުންދާ ވަގުތު އެބޭފުޅުންގެ ވަނަވަރު އާންމު ކުރުމަކީ ގެންގުޅުއްވާ ސިޔާސަތެއް ނޫން ކަމަށާއި، ނަމަވެސް ސިޔާސީ ލީޑަރުންގެ ތެރެއިން ހުރިހާ ދިމާލެއްގެ ބޭފުޅުންވެސް އެމްއެމްޕީއާރުސީގެ ޚިޔާނާތުގެ ލިސްޓުގައި ހިމެނޭ ކަމަށެވެ. ޕީޖީ ވިދާޅުވީ، އޭގެ ތެރެއިން ހުރިހާ ބޭފުޅުންނަށްވެސް ކޮންމެވެސް ވަރަކަށް ޚިޔާނާތުގެ ފައިސާ ލިބިފައިވާ ކަމަށް ތުހުމަތު ކުރެވޭ ކަމަށެވެ.
އެގޮތުން ޕީޖީ އޮފީހުން މިހާރު ކުރަމުންދާ މަސައްކަތަކީ އެ ބޭފުޅުންނަށް ލިބުނު ފައިސާގެ މުއާމަލާތަކީ ކޮން ނިޔަތެއްގައި ނެގި ފައިސާއެއްތޯ ހޯދައި، އެކަން ސާފުކުރުމަށް ފަހު ގޮތެއް ނިންމުން ކަމަށްވެސް ޕީޖީ ވަނީ ވިދާޅުވެފައެވެ.
ސިޔާސީ ލީޑަރުންގެ ތެރެއިން ހުރިހާ ދިމާލެއްގެ ބޭފުޅުންވެސް މީގެ ތެރޭގައި ހިމެނޭ. މި ދެންނެވީ ކޮންމެވެސް ވަރަކަށް ފައިސާ ލިބިފައި ހުރިކަން ތުހުމަތުވެގެން ނުވަތަ އެ ނޫންވެސް ސަބަބުތަކާ ހުރެ އެމީހުންގެ ނަން ލިސްޓަށް އަރާފައި އެބައޮތް. ދެން އަޅުގަނޑުމެންގެ ކަމަކީ އެ ލިސްޓު ސާފުކުރުން. އޭގެ ތެރޭގައި ރަނގަޅު މުއާމަލާތެއްތޯ ގޯސް މުއާމަލާތެއްތޯ، ކޮންކަމަކާ ގުޅިގެން ހޯދި ފައިސާއެއްތޯ، މި އެއްޗެހި ސާފުކޮށްގެން އެއަށް ގޮތެއް ނިންމުން.ޕްރޮސެކިއުޓަރ ޖެނެރަލް ހުސައިން ޝަމީމް
ސަރުކާރު ޕާޓީއަށް ނިސްބަތްވާ މެމްބަރުން ޚިޔާނާތުގެ ލިސްޓުގައި ހިމެނިމ އެ ފަރާތްތައް ތަހުގީގުކުރަމުން ދޭތޯ ސުވާލު ކުރުމުން ޕީޖީ ވިދާޅުވީ، 260 މީހުންގެ ލިސްޓުގައި ތަފާތު ސިޔާސީ ވެރިން ހިމެނޭ ކަމަށެވެ. އޭގެތެރޭގައި އެމްޑީޕީ، ޕީޕީއެމް، ޑީއާރްޕީ އަދި ތަފާތު ސިޔާސީ ވިސްނުމަށް ނިސްބަތްވާ ބޭފުޅުންވެސް ހިމެނޭ ކަމަށެވެ. އަދި އޭގެ ތެރޭގައި މިހާރުގެ މެމްބަރުންނާއި ކުރީގެ މެމްބަރުންވެސް ހިމެނޭ ކަމަށް ޕީޖީ ވިދާާޅުވިއެވެ.
ޕްރޮގުރާމުގައި އިތުރަށް ވާހަކަ ދައްކަވަމުން ޕީޖީ ވިދާޅުވީ، ހެއްވާ މައްސަލައެއް ހިފައިގެން ކޯޓަށް ނުދާނެ ކަމަށެވެ. އެގޮތުން، ސާބިތުކުރެވޭ އަދި އެކަމުގައި ގޯހެއް އޮތްކަން ގަބޫލުކުރެވޭ ކަމުގައި ވާނަމަ، މިހާރުގެ މިނިސްޓަރަކަސް، މަޖިލިސް މެމްބަރަކަސް ދައުވާ ކޯޓަށް ހުށަހަޅާނެ ކަމަށެވެ. ޕީޖީ ވިދާޅުވީ މިކަމުގައި ކުރީގެ ސަރުކާރުގެ ބަޔަކަށް ވިޔަސް އަދި މި ސަރުކާރުގެ ބަޔަކަށް ވިޔަސް އިސްތިސްނާ ކުރުމެއް ނޯންނާނެ ކަމަށާއި، ދައުވާ ކޯޓަށް ހުށަހެޅުމަށް ޖެހިލުން ނުވާނެ ކަމަށެވެ.
ޕީޖީ ވިދާޅުވީ، ކޯޓަށް ދެވޭ ވަރަށް ހެކި ނުލިބިއްޖެ ކަމުގައި ވާނަމަ، އެމީހާގެ މައުލޫމާތު ހާމަކޮށް އަބުރު ކަތިލުމަކީ ކުރާނެ ކަމެއް ނޫން ކަމަށެވެ. ނަމަވެސް ޝަރީއަތަށް މައްސަލަ ހުށަހެޅޭ ހިސާބަށް ދިއުމުން، ދައުވާކުރާ ސަބަބާއި، ހުރި ހެކިތަކާއި ހުރިހާ މައުލޫމާތެއް ރައްޔިތުންނަށް ހިއްސާ ކުރާނެ ކަމަށެވެ. އަދި މައްސަލަ ޝަރީއަތަށް ހުށަހެޅުމަށް ނިންމާ ހިސާބުން، އެ ބޭފުޅެއް ހުރި މަގާމުން އިސްތިއުފާ ދިނުމާއި، މަގާމުގައި ހުރުމަކީ އެބޭފުޅެއްގެ އަމިއްލަ އިޚުތިޔާރުގައި އޮތް ކަމެއް ކަމަށްވެސް ވިދާޅުވިއެވެ.
މި މައްސަލައިގައި ތުހުމަތުކުރެވޭ އެކި ފެންވަރުގެ 260 ށްވުރެ ގިނަ މީހުން ހިމެނޭއިރު، މި މައްސަލަ ތަހުގީގު ކުރަމުންދަނީ އެންޓި ކޮރަޕްޝަން ކޮމިޝަނާއި އެސެޓް ރިކަވަރީ ކޮމިޝަން އަދި ފުލުހުންގެ އިދާރާ ގުޅިގެންނެވެ. ޕީޖީ ވިދާޅުވީ އިދާރާތައް ގުޅިގެން ކުރާ މަސައްކަތުން ނަތީޖާ ނެރެވޭނެ މަންޒަރު ފެންނަމުންދާ ކަމަށާއި، މިހާރު އޮތް ހިތްނުތަނަވަސްކަން ފިލައިގެން ދާނެ ވަރަށް ނަތީޖާ ނެރެވޭނެ ކަމަށެވެ. އަދި މައްސަލަ ތަހުގީގު ކުރުމަށް އެއްވެސް ނުފޫޒެއް ފޯރުވައިފިނަމަ މަގާމުގައި ނުހުންނަވާނެ ކަމަށްވެސް ޕީޖީ ވިދާޅުވިއެވެ.
