ރައްޔިތުންގެ މަޖިލީހަށް ސަރުކާރުގެ ފަރާތުން ހުށައަޅައި މިހާރު ބަހުސްކުރެވެމުންދާ ސިއްހީ ކުއްލި ނުރައްކަލުގެ ހާލަތުގެ ބިލުގެ ސަބަބުން މައުލޫމާތު ހޯދާ ލިބިގަތުމުގެ ހައްގަށް ނޭދެވޭ އަސަރުތަކެއް ކުރާތީވެ ޓްރަންސްޕޭރެންސީ މޯލްޑިވްސް އިން ކަންބޮޑުވުން ފާޅުކޮށްފި އެވެ.

ޓްރާންސްޕޭރެންސީ މޯލްޑިވްސް އިން އާއްމުކޮށްފައިވާ ބަޔާނެއްގައި ބުނީ، އާއްމު ސިއްހަތުގެ ކުއްލި ނުރައްކަލުގެ ބިލް 2020 އަކީ ޖުމްލަ ގޮތެއްގައި ރަނގަޅަށް ފަރުމާކޮށްފައިވާ ބިލެއްކަން އެ ޖަމިއްޔާއަށް ފާހަގަކުރެވިފައިވާ ކަމަށެވެ. ނަމަވެސް، އެ ބިލުގެ 41 ވަނަ މާއްދާގައިވާ ގޮތުން، މައުލޫމާތު ހޯދާ ލިބިގަތުމުގެ ހައްގަށް ނޭދެވޭ ބޮޑު އަސަރުތަކެއް ކުރާކަން ފާހަގަކުރެވިފައިވާ ކަމަށް ޓްރާންސޕޭރިންސީން ބުންޏެވެ. އެހެންކަމުން ޓްރާންސްޕޭރެންސީ ވަނީ އެކަން މީޑިއާގެ ސަމާލުކަމަށް ގެނެސްފައެވެ.

އާއްމު ސިއްހަތުގެ ކުއްލި ނުރައްކަލުގެ ބިލް 2020ގެ 41 ވަނަ މާއްދާގެ (ހ) ގައިވާ ގޮތުން، "މިގާނޫނުގައި އެހެން ގޮތަކަށް ބަޔާންކޮށްފައިނުވާހާ ހިނދަކު، ވަކި ގާނޫނެއްގައި ވަކި ކަމެއް ކުރުމަށް މުއްދަތެއް ނުވަތަ ތާރީހެއް ކަނޑައެޅިފައިވާ ހާލަތުގައި، އަދި އެ ގާނޫނެއްގައި ބަޔާންކުރާ މުއްދަތު ނުވަތަ ތާރީހު ދިމާވަނީ، ގާނޫނުގެ ތިންވަނަ މާއްދާގައި ބަޔާންކުރާ މުއްދަތު ކަމުގައިވާނަމަ، އެކަންކުރުމަށް އެ ގާނޫނަކުން ކަނޑައެޅިފައިވާ މުއްދަތަށް ނުވަތަ ތާރީހަށް އަމަލުކުރާކަން، ގާނޫނަށް އަމަލުކުރަން ފެށުމާއެކު މެދުކެނޑުނީއެވެ."

އެ މާއްދާ އަށް ރިޔާއަތްކޮށް ޓްރާންސްޕޭރެންސީ ބުނީ، އެ މާއްދާގެ ނަތީޖާއެއްގެ ގޮތުން މައުލޫމާތު ހޯދާ ލިބިގަތުމުގެ ހައްގު ދަށުން ދައުލަތުގެ މުއައްސަސާތަކުން ވަކި މުއްދަތެއްގެ ތެރޭގައި މައުލޫމާތު ފޯރުކޮށްދޭން ޖެހޭ އާންމު ސިއްހަތުގެ ނުރައްކަލުގެ ހާލަތަު އިއުލާންކުރެވިފައިވާ މުއްދަތުގައާއި އެހާލަތު ނިމުމަކަށް ގެންނަތާ 60 ދުވަސް ހަމަވާ ތާރީހާ ހަމަޔަށް މެދުކެނޑުން ކަމަށެވެ. އެހެންވެ މައުލޫމާތު ހޯދައި ލިބިގަތުމުގެ ހައްގު މުއްދަތުގައި ދިވެހިރާއްޖޭ ހުއްޓި ރައްޔިތުންގެ ހައްގަށް ވަރަށް ބޮޑެތި އަސަރުކުރާނެތީ އެކަމާ ކަންބޮޑުވުން ފާޅުކުރާކަމަށެވެ.

އެ ޖަމިއްޔާއިން ގަބޫލުކުރާ ގޮތުގައި ދައުލަތުގެ މުވައްޒަފުން މަދުވަގުތުކޮޅެއްގައި ނުވަތަ ގޭގައި ތިބެގެން މަސައްކަތްކުރަންޖެހުނު ނަމަވެސް، އާއްމުންނަށް މައުލޫމާތު ފޯރުކޮށް ނުދެވޭނެ ހާލަތަކަށް ދިޔައީ ކަމަކަށް ނުބެލެވޭ ކަމަށެވެ. އަދި މިހާރުގެ ހާލަތުގައިވެސް، މައުލޫމާތު އެއްކޮށް އެ މައުލޫމާތު އާއްމުންނަށް ފޯރުކޮށް ދެވެންވާނެ ކަމަށް ޓްރާންސްޕޭރެންސީން ބުންޏެވެ.

މީގެ އިތުރުން، ކޮވިޑް-19 އާ ސީދާ ގުޅުންހުރި މަސައްކަތްތައް ކުރަމުންދާ ނުވަތަ ޒަރޫރީހިދުމަތްތައް ދެމުންދާ ދައުލަތުގެ އިދާރާތައް މިވަގުތުވެސް ތިބޭނީ އެއިދާރާތަކުން ކުރަމުންދާ މަސައްކަތްތަކުގެ މައުލޫމާތު ފޯރުކޮށްދެވޭނެ ހާލަތެއްގައި ކަމަށްވެސް ގަބޫލޫކުރެވޭ ކަމަށެވެ.

މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ފޯރުކޮށްދިނުމަށް ކަނޑައަޅާފައިވާ 21 ދުވަހުގެ ތެރޭގައި، ދައުލަތުގެ މުވައްޒިފަކަށް އެމައުލޫމާތު ދޭންދަތިވެއްޖެނަމަ، މައުލޫމާތު ފޯރުކޮށްދިނުމަށްޓަކައި އެ ގާނޫނުގެ ދަށުން އިތުރު 14 ދުވަސް އެ ފަރާތަކަށް ނެގުމުގެ ފުރުސަތުވެސް ލިބެއެވެ. އެހެންކަމުން، ވަކި މުއްދަތެއްގައި ކުރުން ލާޒިމުކުރާ ހުރިހާ ކަމެއް ހިމެނޭހެން އެކަންކަން ފަސްކުރަން އާއްމު ސިއްހަތުގެ ކުއްލި ނުރައްކަލުގެ ބިލް 2020ގައި އޮތުން މުހިއްމުކަމަށް ނުފެންނަ ކަމަށް ޓްރާންސްޕެރެންސީން ބުންޏެވެ.

ޓްރާންސްޕޭރެންސީން ބުނިގޮތުގައި މިހާލަތުގައި މަދު ވަސީލަތްތަކާ އެކު އަދި މަދު ވަގުތުތަކެއްގައި ދައުލަތުގެ އިދާރާތަކުން މަސައްކަތްކުރަމުން ދިޔަނަމަވެސް، ރައްޔިތުން، އަދި ޚާއްސަކޮށް ނޫސްވެރިން، އެދޭ މައުލޫމާތު އެފަރާތްތަކަށް ފޯރުކޮށްދިނުމަށް އިސްކަމެއް ދޭން ޖެހޭނެއެވެ. އަދި ވަކިން ހާއްސަކޮށް ކުއްލި ހާލަތްތަކުގައިހޯދުމަށް އެދޭ މައުލޫމާތު ކުރު މުއްދަތެއްގެ ތެރޭގައި ފޯރުކޮށްދޭން ޖެހޭނެއެވެ.