މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުވިއިރު، ކުންފުނި އޮތީ "ގޮނޑެއް" ހެން ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.

ޖެނުއަރީ މަހުގެ 21 ވަނަ ދުވަހު، އެއިރު އެމްޑަބްލިއުއެސްސީގެ މެނޭޖިންގް ޑިރެކްޓަރ ކަމުގެ މަގާމުގައި ހުންނެވި އާޒިމް އެމްޓީސީސީގެ ސީއީއޯގެ މަގާމަށް ބަދަލުކޮށް، އެއިރު އެމްޓީސީސީގެ ސީއީއޯގެ މަގާމުގައި ހުންނެވި ހަސަން ޝާހު ވަނީ އެމްޑަބްލިއުއެސްސީގެ މެނޭޖިންގް ޑިރެކްޓަރގެ މަގާމަށް ބަދަލުކޮށްފައެވެ.

މިހާތަނަށް މަގާމު ބަދަލު ކުރެއްވި ވަކި ސަބަބެއް ހާމަކޮށްފައި ނުވާއިރު، ބުދަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން އާޒިމް ވިދާޅުވީ، މިހާތަނަށް ހަވާލުވި ކުންފުނިތަކުގެ ތެރެއިން އެންމެ ނާޒުކު ހާލަތެއްގައި އޮތް ކުންފުންޏަކީ އެމްޓީސީސީ ކަމަށާއި އެ ހާލަތު އަދިވެސް ބަދަލު ނުވާކަމަށެވެ.

އާޒިމް ވިދާޅުވީ މަގާމާއި ހަވާލުވި އިރު އެމްޓީސީސީ އޮތީ "ގޮނޑެއް" ހެންކަމަށާއި އެކަމާއި ހުރިހާ މުވައްޒަފުންވެސް އެއްބަސްވާނެކަމަށެވެ. އަދި ހާލަތު ބަދަލު ކުރުމަށް ގިނަ މަސައްކަތްތަކެއް ކުރަމުން އަންނަކަމަށް އާޒިމް ވަނީ ފާހަގަކުރައްވާފައެވެ.

އިތުރު ތަފްސީލްދެއްވަމުން އޭނާ ވިދާޅުވީ، ކިތަންމެ އަޑުއަހަން އުނދަގޫ ވިޔަސް ވާހަކަ ދައްކަން ވާނީ ހަގީގަތާއި އެއްގޮތަށް ކަމަށެވެ. އެގޮތުން، ތިލަފުށި ސައިޓުގައިވެސް ތަރުތީބެއް ނެތްކަން ފާހަގަކޮށް އާޒިމް ވަނީ ރިކޯޑް ނުކޮށް މުދާ ގެންދިއުމާއި ކުންފުނީގެ އެކި ޑިވިޝަންތައް ވަކި ކުންފުންޏެއް ގޮތައް ހިންގާފައި ހުރި ކަން ފާހަގަކޮށްފައެވެ. މީގެ އިތުރުން، އޭނާ ވިދާޅުވީ ހަވާލުވިއިރު، ބެލެންސް ޝީޓްގައިވެސް ގިނަ މައްސަލަތައް ހުރި ކަމަށާޢި ގިނަ މައުލޫމާތު ހުރީ އަޕްޑޭޓް ނުކޮށް ކަމަށެވެ.

އާޒިމް ވިދާޅުވީ، މިހާރު އެންމެ ބޮޑު އަމާޒަކީ ދެން އައު މެނޭޖްމެންޓެއް އަންނައިރު މިހާރަށް ވުރެން ރަނގަޅު ކުންފުންޏެއް ހަވާލުކުރުމުގެ ވިސްނުން މުވައްޒަފުންގެ މެދުގައި އަށަގެންނެވުން ކަމަށެވެ. އެމްޓީސީސީއަށް 2020 ވަނަ އަހަރުގެ ފުރަތަމަ ކުއާޓަރުގައ ސާފު ފައިދާގެ ގޮތުގައ 62.34 މިލިއަން ރުފިޔާ ވަނީ ލިބިފައެވެ.