ސްކޫލްތައް ހުޅުވިގެން އަންނަ މަސް ދުވަހުގެ ތެރޭގައި މާސްކަކީ ޔުނީފޯމުގެ ބައެއް ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓަރު ވިދާޅުވީ، ނިއު ނޯމަލްގައި ސްކޫލްތައް ހުޅުވާލާއިރު ޓީޗަރުންނާއި، ދަރިވަރުންގެ އިތުރުން ބެލެނިވެރިންނަށް ވެސް ސްކޫލުގެ ގޯތި ތެރެއަށް ވަދެވޭނީ މާސްކު އަޅައިގެން ކަމަށެވެ.
ދެ ވައްތަރެއްގެ މާސްކު ބޭނުންކުރުމަށް އެޑިއުކޭޝަން މިނިސްޓްރީން އިލްތިމާސް ކުރެއެވެ. އެއީ ސާޖިކަލް މާސްކު އަދި ފޮތި މާސްކެވެ. ޑރ. އައިޝަތު އަލީ ބާރުއަޅުއްވަނީ ދަރިވަރުން ފޮތި މާސްކު ބޭނުން ކުރުމަށެވެ.
މިނިސްޓަރ ވިދާޅުވީ، ފޮތި މާސްކް ބޭނުން ކުރާއިރުވެސް ތިން ފަށަލަ ހިމެނޭ މާސްކް ބޭނުން ކުރުމަށް އެޗްޕީއޭއިން ލަފާ ދީފައިވާ ކަމަށެވެ. އަދި އެ މިންގަނޑުތަކަށް ދަރިވަރުން ބޯލަނބާކަން މިނިސްޓްރީންވެސް ސުކޫލުތަކާ ގުޅިގެން ކަށަވަރު ކުރާނެކަމަށް މިނިސްޓަރ ވިދާޅުވިއެވެ.
އެޗްޕީއޭއާ ޓެގް ޓީމާ މަޝްވަރާ ކުރުމަށްފަހު މާސްކްގައި ހުންނަންޖެހޭ ގައިޑްލައިންތަކެއް ކަނޑައަޅައި އެސްއޯޕީތަކެއް ޤާއިމު ކުރެވިފައިވަނީ، އެހެންވީމާ ސުކޫލުތަކުން ޕްރިންސިޕަލުން، ލީޑިންގ ޓީޗަރުން ބައްލަވާނެ އެ ސްޓޭންޑަރޑް ގެ މާސްކްތޯ ދަރިވަރުން އަޅަނީއެޑިއުކޭޝަން މިނިސްޓަރު ޑރ. އައިޝަތު އަލީ
މިނިސްޓަރ އެހެން ވިދާޅުވެފައިވާއިރު، ދުނިޔޭގެ ސިއްޙަތު ޖަމިއްޔާއިންވެސް ވަނީ އާންމުން ބޭރުގައި އުޅޭއިރު ފޮތި މާސްކް ބޭނުން ކުރުމަށް އިރުޝާދު ދީފައެވެ. އެގޮތުން ފޮތި މާސްކް ތައްޔާރުކުރާއިރު، ތަފާތު ތިން ފެބްރިކެއްގެ (ފޮތި) ބޭނުންކޮށްގެން މާސްކް ތައްޔާރު ކުރުމަކީ އެންމެ އެދެވޭ ގޮތް ކަމަށް ދުނިޔޭގެ ސިއްޙަތު ޖަމިއްޔާއިން ބުނެފައި ވެއެވެ.
