ހަތެއް ފެބްރުއަރީގައި ވެރިކަން ބަދަލުކުރިގޮތް އަލުން ބަލައިފިނަމަ، އެއީ "ބަޣާވާތެއް" ގެ ގޮތުގައި ފެންނާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މިހާރު ހިނގަމުންދާ 19ވަނަ ރައްޔިތުންގެ މަޖިލީހުގެ ފުރަތަމަ އަހަރު، އެ މަޖިލީހުގެ މަސައްކަތްތަކާއި އަދި ތަފާސްހިސާބުތަކާ ގުޅޭގޮތުން މައުލޫމާތު ދެއްވުމަށް ހޯމަ ދުވަހު މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ރައީސް ވިދާޅުވީ، އެމަނިކުފާނު އަމިއްލަފުޅު ހައިސިއްޔަތުން ގަބޫލްފުޅު ކުރައްވާ ގޮތުގައި އެއީ ސީދާ ބަޣާވާތެއް ކަމަށެވެ.

ރައީސް ނަޝީދުގެ ވެރިކަން ބަދަލުވި ގޮތާމެދު، ގިނަ ބައެއްގެ, ހާއްސަކޮށް، އެމްޑީޕީއާއި އެޕާޓީގެ ސަޕޯޓަރުންގެ މެދުގައި އަބަދުވެސް ހިތްހަމަ ނުޖެހުން އޮވެއެވެ. ނަމަވެސް މިމައްސަލަ މިދުވަސްވަރު އިތުރަށް ފެންމަތިވީ، ރައީސް ނަޝީދުގެ ވެރިކަން ބަދަލުކޮށް، ވެރިކަމަށް އަރައިވަޑައިގެންނެވި ޑރ. މުހައްމަދު ވަހީދު ހަސަންމަނިކަށް ނިސްބަތްކޮށް، "ބާޣީ" އަށް ގޮވި މައްސަލައެއް ފެންމަތިވުމުންނެވެ.

އެމްޑީޕީގެ ޙަރަކާތްތަކުގައި ފޮޓޯގްރާފަރެއްގެ ގޮތުގައި މަސައްކަތްކުރާ އިބްރާހީމް ޖައުފަރު، ޑރ. ވަހީދަށް ނިސްބަތްކޮށް "ބާޣީ" އަށް ގޮވި މައްސަލަ ފުލުހުން ބަލަމުންދާތީ އާއި އެމައްސަލަ ބަލަމުންދާއިރު، ރައީސް ނަޝީދުގެ ވެރިކަން ބަޣާވާތަކުން ވައްޓާލުމަށްފަހު ވެރިކަމަށް އަރާ ވަޑައިގެންނެވި ވަހީދުގެ ސަރުކާރުން ޖައުފަރަށާއި ދިވެހި އެތައް ސަކޭތަ ރައްޔިތުންނަށް ކުރި އަނިޔާ ނުބަލައި، އަދި އިންސާފު ހޯދާދެވިފައިނުވާތީ، ހޯމަ ދުވަހުގެ ރައްޔިތުންގެ މަޖިލީހަށް ވަނީ ކުއްލި މައްސަލައެއް ވެސް ހުށަހަޅާފައެވެ.

އުނގޫފާރު ދާއިރާގެ އެމްޑީޕީ މެމްބަރ މުހައްމަދު ވަހީދު ހުށަހެޅުއްވި މި ކުއްލި މައްސަލައަށް ބަހުސްކުރެއްވި ގިނަ މެމްބަރުން ވަނީ، 7 ފެބްރުއަރީގައި ވެރިކަން ބަދަލުވިގޮތާއި، ކުރި ދިވެހި ރައްޔިތުންނަށް ކޮށްފައިވާ އަނިޔާތައް ތަހުގީގު ކުރުމަށް ގޮވާލައްވާފައެވެ.

ކުއްލި މައްސަލަ ހުށަހަޅުއްވަމުން މެމްބަރު މުހައްމަދު ވަހީދު ވިދާޅުވީ، ޑިމޮކްރަޓިކް އުސޫލުން ރާއްޖޭގައި ބޭއްވުނު ފުރަތަމަ ރިޔާސީ އިންތިހާބުގައި، ރައްޔިތުން އިންތިޚާބުކުރި ވެރިކަން 7 ފެބްރުއަރީ 2012 ގައި ވައްޓާލުމަށްފަހު ވެރިކަމާ ހަވާލުވި ޑރ. ވަހީދު، އާދިއްތަ ދުވަހުގެ ހެނދުނުގެ ވަގުތެއްގައި އާންމު ރައްޔިތަކާ ދެމެދު ހިނގި ދެބަސްވުމެއްގައި އޭނާ އަށާއި އަނބިކަނބަލުންނަށް ހަމަލާދިން ކަމަށް ބުނެ ދޮގު ހަދައި ހަގީގަތާއި ޚިލާފު އިލްޒާމުތަކެއް އަޅުވައި ބިރު ދައްކާފައިވާ ކަމަށެވެ.

އެމްޑީޕީން ވެސް ވަނީ، ޑރ. ވަހީދު، ހަގީގަތާ ހިލާފު ވާހަކަ ދައްކެވިކަމަށް ބުނެ ބަޔާނެއްވެސް ނެރެފައެވެ.