ރާއްޖެއިން ބޭރު އަންނަ މީހުންނާއި، މާލެއިން ރަށްރަށަށްދާ މީހުން ގޭގައި ކަރަންޓީނުވާ މުއްދަތަކީ 14 ދުވަސް ކަމަށް ކަނޑައަޅައި، ހޯމް ކަރަންޓީނުގެ 14 ދުވަސް ތެރޭގައި ޕީސީއަރް ޓެސްޓުކުރާ ގޮތަށް ޓެކްނިކަލް އެޑްވައިޒަރީ ގްރޫޕް (ޓެގް) އިން ނިންމައިފި އެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ ތަފާތު އެކި ފަހަރުމަތިން ގޭގައި ކަރަންޓީނުވުމުގެ އުސޫލަށް ބަދަލުތަކެއް ގެނެސްފަ އެވެ. އެންމެ ފަހުން ގެނައި ބަދަލުގައިވާ ގޮތުން 24 ދުވަހުގެ ކަރަންޓީނު މުއްދަތަށް ފަހު އެ މީހަކު ކަރަންޓީނު ދޫކޮށްލާއިރު އެއްވެސް ކަހަލަ ޓެސްޓެއް ނަހަދާނެ އެވެ.
ނަމަވެސް އާދިއްތަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ގޭގައި ކަރަންޓީނުވުމުގެ މުއްދަތަކީ 14 ދުވަސް ކަމަށް ޓެގުން ނިންމާފައިވާ ކަމަށެވެ. އަދި ކަރަންޓީނުގެ މުއްދަތު ހަމަވުމުން ޕީސީއާރް ޓެސްޓު ހަދާނެ ކަމަށެވެ. ކަރަންޓީނުން ދޫކޮށްލާނީ ޕީސީއާރް ޓެސްޓުގެ ނަތިއްޖާ ނެގެޓިވްވުމުން ކަމަށް މަބްރޫކް ވިދާޅުވި އެވެ.
14 ދުވަސް ހަމަކުރުމަށް ފަހު ޕީސީއާރް ޓެސްޓު ހެދުމަށް ނިންމިފައިވޭ. އަޅުގަނޑުމެންނަށް އަންދާޒާ ކުރެވޭނީ މިހާރުގެ ތަޖުރިބާ އަށް ބަލާއިރު ސާމްޕަލް ނަގާނީ 15 ވަނަ ދުވަހު ކަމަށްމުހައްމަދު މަބްރޫކް އަޒީޒް - އެންއީއޯސީގެ ތަރުޖަމާނު
މަބްރޫކް ވިދާޅުވީ ގޮތުގައި، އަންދާޒާ އަކީ 15 ވަނަ ދުވަހު ނެގޭ ސާމްޕަލްގެ ނަތީއްޖަ 18 ވަނަ ދުވަހު ދޫކުރުމެވެ.
ގޭގައި ކަރަންޓީނުވުމަށް އެޗްޕީއޭއިން އާއްމުކޮށްފައިވާ އުސޫލުގައިވާ ގޮތުން، ގޭގައި ކަރަންޓީނުކުރާ މީހާ، ކަރަންޓީނުކުރާ މުއްދަތު ގައި ގެއިން ބޭރަށް ނިކުތުމަކީ މަނާކަމެކެވެ. އަދި ކަރަންޓީނުވާ މީހާ ހުންނަން ވާނީ އެހެން މީހުންނާއި ވަކިން ކޮޓަރިއެއްގައި އެވެ.
