އައްޑޫ އިކުއެޓޯރިއަލް ހޮސްޕިޓަލުގައި ކޮވިޑް-19އަށް ޓެސްޓު ކުރެވޭ ގޮތް ހަދައިފިއެވެ.

ކޮވިޑް-19 ޓަސްކްފޯހުގެ ތަރުޖަމާނު މަބްރޫކް އަޒީޒު ވިދާޅުވީ، ބަޔޯ ފަޔަރ މެޝިނެއް މެދުވެރިކޮށް، ދުވާލަކު 24 ސާމްޕަލްގެ ޓެސްޓް އައްޑޫއިން ކުރެވޭނެ ކަމަށެވެ.

މީގެއިތުރުން، އައްޑޫ އާއި ހދ. ކުޅުދުއްފުށީ ރީޖަނަލް ހޮސްޕިޓަލްގައި ޕީސީއާރު މެޝިން ގެނެސް ކުރިއަށް އޮތް 10 ދުވަހުގެ ތެރޭގައި އިންސްޓޯލް ކުރެވޭނެ ކަމަށް މައުލޫމާތު ލިބިފައިވެއެވެ. އެ މެޝިންތަކުން ދުވާލަކު 100 އާއި 150 އާދެމެދުގެ ސާމްޕަލް ޓެސްޓް ކުރެވޭނެ ކަމަށް މަބްރޫކް ވިދާޅުވިއެވެ.

ކޮވިޑް-19އަށް ޓެސްޓް ކުރުމަށް ބޭނުންވާ ލެބް ޓެކްނީޝަނުން މާލެ ގެނެސް ތަމްރީންކޮށް ނިމިފައިވާއިރު، އެ ފަރާތްތައް މިހާރު ތިބީ ޓްރާންސިޓް ކަރަންޓީނުގައެވެ. ކަރަންޓީނުގެ މުއްދަތު ނިމުމުން ވަޒީފާއާ ގުޅޭނެ ކަމަށް މަބްރޫކް ވިދާޅުވިއެވެ.

އައްޑޫގައި ކޮވިޑް-19 މެޑިކަލް ފެސިލިޓީއެއްގެ ގޮތުގައި ބޭނުންކުރަމުންދަނީ، އައްޑޫ ސިޓީގެ ރީޖަނަލް ހޮސްޕިޓަލެވެ. ނަމަވެސް، ކޮވިޑް-19އަށް ޓެސްޓް ކުރެވޭނެ އިންތިޒާމުތައް ހަމަޖައްސާފައިވަނީ، އައްޑޫ އިކުއެޓޯރިއަލް ހޮސްޕިޓަލުގައެވެ. މިއީ މާލެއިން ބޭރުގައި، ނުވަތަ ރަށެއްގައި ކޮވިޑް-19އަށް ޓެސްޓް ކުރެވޭނެ އިންތިޒާމް ހަމަޖެއްސި ފުރަތަމަ ހޮސްޕިޓަލެވެ.

އައްޑޫ ސިޓީގައި ޓެސްޓު ކުރެވޭނެ އިންތިޒާމްތައް ހަމަޖެހިގެން މިދިޔައީ، އެ ސިޓީއަށް އަނބުރާ ދިއުމަށް ޓްރާންސިޓް ކަރަންޓީނުގައި ހުރި 65 އަހަރުގެ އަންހެނަކު ޕޮޒިޓިވްވެފައި ވަނިކޮށެވެ. އެޗްޕީއޭއިން އެންމެ ފަހުން މައުލޫމާތު ދީފައިވާ ގޮތުގައި، އެ މީހާގެ ހާލު ރަނގަޅެވެ.

މިހާރު އަމަލުކުރާ އުސޫލުން، މާލެ ސަރަހައްދުން ރަށްރަށަށް ދާން ބޭނުންވާ ފަރާތްތަކަށް ގޭގައި ކަރަންޓީނުވެވޭނެއެވެ. 24 ދުވަހުގެ މުއްދަތަކަށް މި ފަރާތްތަކުން ކަރަންޓީނުވާން ޖެހޭއިރު، އެ މުއްދަތުގެ ތެރޭގައި އެގޭގައި އުޅޭ އެއްވެސް ފަރާތަކަށް ބޭރަށް ނުނުކުމެވޭނެ ކަމަށް އެޗްޕީއޭއިން ވަނީ އަންގާފައެވެ.