މިމަހުގެ 15 ވަނަ ދުވަހުން ފެށިގެން ރާއްޖޭގައި އުޅޭ ބިދޭސީންނަށް ކާބޯތަކެތި ފޯރުކޮށްދެމުނުން މަޑު ޖައްސާލާނެކަމަށް ދިވެހި ރެޑް ކްރެސެންޓުން ބުނެފި އެވެ.
ރާއްޖެޓީވީގެ ކޮވިޑް-19 ކަވަރޭޖަށް ފޯނުން މައުލޫމާތުދެއްވަމުން ދިވެހި ރެޑް ކްރެސެންޓްގެ ސެކްރެޓަރީ ޖެނެރަލް ފާތިމަތު ހިމްޔާ ވިދާޅުވީ، ދިވެހި ރެޑް ކްރެސެންޓުން ރާއްޖޭގައި ހާލުގައި އުޅޭ ބިދޭސީންނަށް ކާބޯތަކެތި ފޯރުކޮށްދިނުގެ ހިދްމަތް އާދިއްތަ ދުވަހުގެ ނިޔަލަށް މަޑު ޖައްސާލަން ނިންމާފައިވާ ކަމަށެވެ. ހިމްޔާ ވިދާޅުވީ، ދިވެހި ރެޑް ކްރެސެންޓުން ބިދޭސީންނަށް ކާބޯތަކެތި ފޯރުކޮށް ދިނުމުގެ ހިދްމަތް ދޭނެ އެންމެ ފަހު ދުވަހަކީ މިމަހުގެ 14 ވަނަ ދުވަސް (އާދިއްތަ) ކަމަށެވެ.
ބިދޭސީންނަށް އަމާޒުކޮށްގެން ހިންގާ ޕްރޮގްރާމް، އެފަރާތްތަކަށް ކާބޯތަކެތި ފޯރުކޮށްދިނުމުގެ މަސައްކަތްވެސް އެބަކުރިއަށްދޭ. އެހެންނަމަވެސް އެމަސައްކަތް އަޅުގަނޑުމެން، މާދަމާއަށް (އާދިއްތަ ދުވަސް)، މިވަގުތަށް ކާބޯތަކެތި ފޯރުކޮށްދިނުން މެދުކަނޑާލާނެ. މާދަމާއަކީ (އާދިއްތަ) އަކީ އެންމެ ފަހު ދުވަސްކަމުގައި އަޅުގަނޑުމެން ވަނީ ނިންމާފަ. ދެން އެއަށްފަހުގައި ދެން އިތުރަށް އެމަސައްކަތް ކުރިއަށް ގެންދާނީ ކްރައިޓީރިއާއެއް ހެދި، އެފަރާތްތައް ރެޖިސްޓަރ ވެގެން، އެންމެ ބޮޑަށް އެހީތެރިކަން ބޭނުންވާ ފަރާތްތައް ބެލުމަށްފަހުގައި، އެމަސައްކަތް ކުރިއަށްދާނީ،ދިވެހި ރެޑް ކްރެސެންޓްގެ ސެކްރެޓަރީ ޖެނެރަލް ފާތިމަތު ހިމްޔާ
ކޮވިޑް-19 ރޯގާ ރާއްޖޭގައި ފެތުރެން ފެށުމާއެކު، ރާއްޖޭގައި ދިރިއުޅޭ ގިނަ ބިދޭސީންތަކެއްގެ ހާލަތު ވަރަށް ނިކަމެތި ހާލަތަކަށް ގޮސްފައިވާކަމަށާއި، އެފަރާތްތަކަށް އެހީތެރިކަން ވެދެމުންދާ ކަމަށް ދިވެހި ރެޑް ކްރެސެންޓުން މީގެކުރިން ބުނެފައިވެއެވެ.
ނޭޝަނަލް އިމަޖެންސީ އޮޕަރޭޝަން ސެންޓަރުގައި ދިވެހި ރެޑް ކްރެސެންޓްގެ ފަރާތުން މިދިޔަ މެއި މަހުގެ 3 ވަނަ ދުވަހު ބޭއްވި ނޫސްވެރިން ބައްދަލުވުމުގައި މައުލޫމާތު ދެއްވަމުން، ޕްރޮގްރާމް އެންޑް ސަރވިސަސް މެނޭޖަރު މައީދު މުހައްމަދު ޒާހިރު ވިދާޅުވެފައި ވަނީ، މާލޭގައި ބިދޭސީން ދިރިއުޅޭ 23 ތަނަކަށް އެހީތެރިކަން އެޖަމާއަތުން ފޯރުކޮށްދެމުންދާ ކަމާއި، އެތަންތަނުގައި 1332 މީހަކު ދިރިއުޅެމުންދާ ކަމަށެވެ. އެގޮތުން އެ 1332 ބިދޭސީންނަށް ކެއިން ބުއިމުގެ ކަންކަން ދިވެހި ރެޑް ކްރެސެންޓުން ބަލަހައްޓަމުންދާ ކަމަށް މައީދު ވިދާޅުވެފައި ވެއެވެ.
މައީދު ވިދާޅުވެފައިވަނީ، ބިދޭސީން އުޅޭ 23 ތަނެއް މާލޭގައި ލޮކްޑައުންކޮށްފައިވާއިރު، ކާބޯތަކެތި ދެ ގޮތަކަށް ފޯރުކޮށްދެމުންދާ ކަމަށެވެ. އެގޮތުން ކައްކަން ބޭނުންކުރާ ތަކެތި އެތަނުން 13 ތަނަކަށް ފޯރުކޮށްދެމުންދާއިރު، އެއީ 621 ބިދޭސީން ކަމަށެވެ. ބާކީ ހުރިތަންތަނަށް ކާބޯތަކެތި (މީލްސް) ފޯރުކޮށްދެމުންދާ ކަމަށެވެ.
މީގެއިތުރުންވެސް، އެމީހުން ސާފްތާހިރު ވުމަށް ބޭނުންވާ ސާމާނު ހިމެނޭ ޕެކެއް "ހައިޖީން ޕެކް" ވެސް ދިވެހި ރެޑް ކްރެސެންޓުން ފޯރުކޮށްދެމުންދިޔަ އެވެ.
ކޮވިޑް-19 އާ ގުޅިގެން ހާލުގައި ޖެހުނު މީހުންނާއި ހާއްސަކޮށް ބިދޭސީންގެ ހާލަތު ދިވެހި ރެޑް ކްރެސެންޓުން ދިޔައީ ބަލަމުންނެވެ. އަދި އެމީހުންނަށް ކޮވިޑް-19 ރޯގާގެ މައުލޫމާތު އޮޅުން ފިލުވާދިނުމުގައި ވެސް ދިވެހި ރެޑް ކްރެސެންޓުން ހަރަކާތްތެރިވެފައި ވެއެވެ.
