މޮނިޓަރިންގެ ހާލަތަށް ގެންނަ ގެތަކުގައި ދިިރިއުޅޭ ފަރާތްތަކަށް ޒަރޫރީ ބޭނުންތަކުގައި ގެއިން ބޭރަށް ނިކުމެ އުޅުމުގެ ހުއްދަދޭ ގޮތަށް ހަމަޖައްސައި، ގޭގައި ކަރަންޓީނުވުމުގެ އުސޫލަށް އިސްލާހު ގެނެސްފި އެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ، މާލެ ސިޓީން ރަށްރަށަށްދާ މީހުންނާއި ރާއްޖެއިން ބޭރުން އަންނަ މީހުން ގޭގައި ކަރަންޓީނުވުމުގެ އުސޫލު އިސްލާހުކޮށްފަ އެވެ. އަލަށް ގެނައި އިސްލާހުގައިވާ ގޮތުން، ކަރަންޓީނު ކުރެވިފައިވާ މީހާ ނޫން އެހެން މީހުންނަށް ކޮންމެހެން ބޭރަށް ނިކުންނަން ޖެހޭ ހާލަތްތަކުގައި ރައްކާތެރިކަމުގެ ފިޔަވަޅުތަކާއި އެކު ބޭރަށް ނިކުމެވޭނެ އެވެ.

އެކަމަކު އެހެން ގޭގެ އަށް ޒިޔާރަތް ނުކުރުމަށާއި، އިތުރު މީހުންނާ އެއްވެ ނޫޅެން ހުކުރު ދުވަހުގެރޭ އެޗްޕީއޭއިން އާއްމުކޮށްފައިވާ އިސްލާހުގައި ބުނެ އެވެ. އެޗްޕީއޭއިން ބުނީ، ގޭގައި ކަރަންޓީނު ކުރެވޭ މީހުންނަކީ ކޮވިޑް-19ގެ އެއްވެސް އަލާމާތެއް ނެތް މީހަކަށް ވާން ޖެހޭނެ ކަމަށެވެ.

މީގެ ކުރިން އެޗްޕީއޭއިން އާއްމުކޮށްފައިވާ އުސޫލުގައި، ކަރަންޓީނުކުރާ މީހަކު ހުންނަ ގެއެއްގެ މީހުން ބޭރަށް ނިކުންނަން ބާރެއް ނާޅަ އެވެ. އަދި ކުރިން މީހުން ކަރަންޓީނު ކުރަމުން ދިޔައީ ސަރުކާރުން ހަމަޖައްސާ ތަންތަނުގައި އެވެ.

ގޭގައި ކަރަންޓީނުގެ މުއްދަތަކީ 24 ދުވަހެވެ.

ރަށްރަށުގައި ކަރަންޓީނުވާން ބޭނުންވާ މީހުން ހުންނަން ހުށައަޅާ ގެއަކީ ކަރަންޓީނުގެ އުސޫލުތަކަށް ފެތޭ ތަނެއްތޯ ކައުންސިލުން ޔަގީންކުރަން ޖެހެ އެވެ. ކޮވިޑުގެ ހާލަތާއި ގުޅިގެން ރާއްޖެއިން ބޭރުގައި ތާށިވެފައި ތިބި ދިވެހިން ރާއްޖެ އައުމުގެ ކުރިން ކަރަންޓީނުވާން ބޭނުންވާ ގޭގެ މައުލޫމާތު މެއިލް މެދުވެރިކޮށް ފޮރިން މިނިސްޓްރީއާ ހިއްސާކުރަން އެޗްޕީއޭއިން ވަނީ އެދިފައި އެވެ.

މާލޭގެ ލޮކްޑައުން އަށް ވަނީ މިހާރު ބޮޑެތި ލުއިތަކެއް ދޭން ފަށާފަ އެވެ. އެގޮތުން ޖޫން މަހުގެ 15 ވަނަ ދުވަހުން ފެށިގެން ހުއްދަ ނެތި ގިނަ ވަގުތުތަކެއް ބޭރުގައި އުޅުމުގެ ހުއްދަ ދޭން ނިންމައި އެކަން ވަނީ އިއުލާން ކޮށްފައެވެ.