މާފަންނު މާވެޔޮ މަގުގައި ހުންނަ ބަހާއުއްދީން މިސްކިތް ނުވަތަ މާވެޔޮ މިސްކިތް އެއްކޮށް ނިމި, ހުޅުވަން ތައްޔާރުވެފައިވާ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެއެވެ.
މާވެޔޮ މިސްކިތް އަލުން އިމާރާތްކޮށް ނިންމާފައިމިވަނީ މިސްކިތް ތަޅާލިތާ ގާތްގަނޑަކަށް ހަތަރު އަހަރުވާން ކައިރިވެފައިވަނި ކޮށެވެ. އެ މިސްކިތް ތަޅާލުމަށް ފަހު، އާ މިސްކިތް ނުހަދައި ގިނަ ދުވަސްވަމުން ދާތީ، އެ ސަރަހައްދުގައި ދިރިއުޅޭ މީހުންނަށް މިސްކިތެއްގެ ދަތިކަން ވަރަށް ބޮޑަށް ކުރިމަތިވެ ބައެއް މީހުން ކަންބޮޑުވުން ވެސް މީގެ ކުރިން ފާޅުކުރިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އިސްލާމިކް މިނިސްޓަރު ވިދާޅުވީ މިސްކިތުގެ ހުރިހާ މަސައްކަތެއް ނިމިފައިވާ ކަމުގެ މައުލޫމާތު ލިބިފައިވާ ކަމަށާއި، ހުޅުވާނެ ތަރީހަކާ މެދު މަޝްވަރާތައް ކުރަމުންދާ ކަމަށެވެ.
އެންމެ ފަހުން ލިބުނު މައުލޫމާތަކީ ހުރިހާ މަސައްކަތެއް ހުރީ ނިމިފައޭ. އިމަރާތްކުރާ ފަރާތުން ބޭނުންވީ އެތާ އެތެރޭގައި ހުރި ބައެއް ކަހަލަ އުކާލަން ޖެހޭ ސާމާނު އުކާލާފަ މިނިސްޓްރީއާ ހަވާލު ކުރަން. ދެން ހަމަ ސަރުކާރު ގެ އޮޕީސް ތައް ހުޅުވޭއިރަށް މިނިސްޓްރީއާ ހަވާލު ކުރެވޭނެ ކަމަށް އަޅުގަނޑަށް މައުލޫމާތު ލިބުނީ.ހަމަ އެގޮތަށް އެއިމާރާތް ކޮށްދޭ ފަރާތުން ވެސް ތައްޔާރުވަމުން އެގަންދަވަނީ. މިހާރު ހުރިހާ މަސައްކަތެއް ނިމި ހަމަ ހުޅުވަން ރެޑީވެފައި އެހުރީ. ދެން އެހެންވީމަ އަޅުގަނޑުމެން އިމާރާތް ކޮށްދިން ފަރާތަށް މިނިސްޓްރީއާ ދެމެދު ވެފައިވާ އެއްބަސްވެވޭ ދުވަހެއްގައި މިސްކިތް ހުޅުވުމުގެ ހުރިހާ މަސައްކަތެއް ކުރިއަށް ގެންދެވޭނެ.އިސްލާމިކް މިނިސްޓަރު ޑރ. އަހްމަދު ޒާހިރު އަލީ
މާވެޔޮ މިސްކިތް ތަޅާލުމަށްފަހު އަލުން އިމާރާތްކޮށްފައިވަނީ 2000 މީހުންނަށްވުރެ ގިނަ މީހުންގެ ޖާގަ ހިމެނޭ ގޮތަށް ހަ ބުރިއަށެވެ. އަދި މިސްކިތް އަޅައިދިނީ ރާއްޖޭގެ ވިޔަފާރިވެރިއެއް ކަމަށްވާ މުހައްމަދު އަލީ ޖަނާހު (ޖަނާ) ގެ އަމިއްލަ ހަރަދުގައެވެ. ކުރިން ދެ ބުރި ހިމެނޭ ގޮތަށް 400 މީހުންގެ ޖާގަ އޮތް މިސްކިތް، އަލުން ޖަނާ އަޅައި ދެއްވީ 50 މިލިއަން ދިވެހި ރުފިޔާއަށްވުރެ ބޮޑު ހޭދައެއް ކޮށްގެން ކަމަށް މައުލޫމާތު ލިބެއެވެ.
އިސްލާމީ މަރުކަޒު މަރާމާތުގެ ކުރުމުގެ މަސައްކަތަށް އަލިއަޅުއްވާލައްވާ އިސްލާމިކް މިނިސްޓަރު ވިދާޅުވީ އިސްލާމީ މަރުކަޒު މަރާމާތު ކުރުމުގެ މަސައްކަތް ހަލީފާ ފައުންޑޭޝަންގެ އެހީތެރިކަމާއެކު ބާރު ސްޕީޑްގައި ކުރިއަށްދާ ކަމަށެވެ.
މިނިސްޓަރު ޒާހިރު ވިދާޅުވީ މާރާމަތު ކުރުމުގެ މަސައްކަތުގެ ތެރެއިން މާލެ ސިޓީ ލޮކްޑައުންއަށް ދިޔައިރު ގިނަ މަސައްކަތްތައް ނިމިފައިވާ ކަމަށެވެ. ނަމަވެސް އަދިވެސް ކުރަން ޖެހޭ މަސައްކަތްތައް ހުރިކަން މިނިސްޓަރު ފާހަގަކުރެއްވިއެވެ.
އެނގިވަޑައިގަންނަވާނެ ލޮކްޑައުންއާ ހިސާބަށް އައިއިރު އަޅުގަނޑުމެންނަށް ވަރަށް ގިނަ މަސައްކަތްތަކެއް ކުރެވިފައި. އަދި އެބަހުރި ކުރަންޖެހޭ މަސައްކަތްތަކެއް. އެންމެ ބޮޑު އެއްމަސައްކަތަކީ ގުއްބު. ގުއްބުގައި އެހުރި ގުއްބު އެއްކޮށް ބަދަލު ކުރުމަށް ފުރަތަމަ ރޭވިފައި އޮތީ ގުއްބު އެއްކޮށް ބަދަލު ކުރާ ގޮތަށް. ދެން އެކަމަކު ރަނގަޅަށް ބަލާފަ އަޅުގަނޑުމެން އެބޭފުޅުންނާ ވާހަކަ ދައްކާފަ އެއްކޮށް ބަދަލު ކުރުމަކީ އެއީ އެހާ ފެސާހަ ކަމަކަށްނުވާނެތީ މަތީގައި އެއްކޮށް ބަދަލު ކުރަން މިހާރު ނިންމާފައި އޮތީ. ގުއްބުގެ މަތީގައި އެވާ ހުރިހާ ފަށަލަތަކެއް ބަދަލު ކުރުމާއި ހައިވަކަރުން ހަދާފަ ހުރި ދޮރުތައް މިސްކިތުގެ ވަށައިގެން ހުރި ދޮރުތައް ބަދަލު ކުރުމާއި ދެން މުންނާރުގެ މަތީގައި އިންނަ ބައިވެސް ބަދަލު ކުރުމާ މިކަހަލަ ބައެއް މަސައްކަތްތައް އެބަހުރި.އިސްލާމިކް މިނިސްޓަރު ޑރ. އަހްމަދު ޒާހިރު އަލީ
މިނިސްޓަރު ޒާހިރު ވިދާޅުވީ އިސްލާމީ މަރުކަޒު މަރާމާތު ކުރުމުގެ މަސައްކަތް އެންމެ ލަސްވެގެން ކުރިއަށް އޮތް ހަތަރު މަސްދުވަހުގެ ތެރޭގައި ނިންމާލެވޭނެ ކަމަށެވެ. އަދި ލޮކްޑައުންއާ ގުޅިގެން މާރާމާތަށް ބޭނުންވާ ބައެއް ސާމާނު އައުމުގައި ދަތިތައް ކުރިމަތިވެފައިވާ ކަމަށާއި، ނަމަވެސް ލޮކްޑައުން ނިމުމާއެކު މަސައްކަތަށް ބޭނުންވާ ސާމާނު ލިބޭނެކަމުގެ މައުލޫމާތު ލިބިފައިވާ ކަމަށެވެ.
