ރާއްޖޭގައި ތާށިވެފައި ތިބި އިންޑިއާގެ ރައްޔިތުން އަނބުރާ ގެންދިޔުމަށް، އިންޑިއާ ސަރުކާރުން ކުރަމުންދާ މަސައްކަތުގެ ތެރެއިން ހުކުރު ދުވަހު 719 މީހަކު ފުރުވާލައިފި އެވެ.

އިންޑިއާގެ 719 ރައްޔިތުން އަނބުރާ ގައުމަށް ގޮސްފައިވަނީ އެމީހުން ބަލައި ރާއްޖެ އައި އިންޑިއާގެ އަސްކަރިއްޔާގެ މަނަވަރު ޖަލަޝްވާ ގައެވެ. މިއީ އިންޑިއާ މީހުން ބަލާ އަސްކަރިއްޔާގެ މަނަވަރު އައި ހަތަރުވަނަ ފަހަރެވެ.

އިންޑިއާގެ މަނަވަރު ދަތުރުކުރާނީ މާލެއިން ޓުޓިކޮރިން އަށެވެ. ދަތުރުކުރާ އެންމެން ވެސް އިންޑިއާ އަށް ދިޔުމަށް ފަހު 14 ދުވަހުގެ ކަރަންޓީނުގެ މުއްދަތު ފުރިހަމަ ކުރަން ޖެހެ އެވެ.

ބުރާސްފަތި ދުވަހު ވެސް ރާއްޖޭގައި ތިބި އިންޑިއާގެ އިތުރު 171 މީހަކު ވަނީ ގޮސްފައެވެ. އިންޑިއާގެ ހައި ކޮމިޝަނުން ބުނީ، ރާއްޖޭގައި މަސައްކަތްކުރާ އިންޑިއާގެ ރައްޔިތުން ފުރުވާލާފައިވަނީ ހައި ކޮމިޝަނުން ހަމަޖެއްސި އިންޑިގޯގެ ހާއްސަ ފްލައިޓެއްގައި ކަމަށެވެ.

އިންޑިއާގެ ރައްޔިތުން އެ ގައުމަށް އަނބުރާ ގެންނަން ފަށާފައިވާ އޮޕަރޭޝަންގެ ތެރެއިން ދުނިޔޭގެ އެކި ކަންކޮޅުތަކުން 14،000ށް ވުރެ ގިނަ ރައްޔިތުން އެންމެ ފުރަތަމަ ހަފުތާގެ ތެރޭގައި ވެސް އަނބުރާ ގައުމަށް ގެނެސްފައި ވެއެވެ. އޭގެ ފަހުން ގަލްފް ސަރަހައްދުން އެކަނިވެސް 30،000ށް ވުރެ ގިނަ ރައްޔިތުން ވަނީ އަނބުރާ އިންޑިއާ އަަށް ގެންގޮސްފަ އެވެ.