ޝަންހާއި ގްރީންލޭންޑް ޝެންހުއާގެ ލޯނު އެއްބަސްވުމެއްގެ ދަށުން މެންޗެސްޓަރ ޔުނައިޓެޑަށް ކުޅެމުން އަންނަ ނައިޖީރިއާގެ ފޯވަރޑް އޮޑިއޯން އިގާލޯގެ އެއްބަސްވުމުގެ މުއްދަތު އިތުރު ކޮށްފި އެވެ.

ޗައިނާގެ ޝަންހާއި އިން ޔުނައިޓެޑަށް އިގާލޯ ބަދަލުވީ ޖެނުއަރީ މަހު ލޯނު އެއްބަސްވުމެއް ދަށުންނެވެ. ޔުނައިޓެޑާއެކު އިގާލޯ ހަދާފައިވާ އެއްބަސްވުން މެއި މަހުގެ 31 ވަނަ ދުވަހު ވަނީ ހަމަވެފައެވެ.

ޗައިނީސް ސުޕަރ ލީގު އަލުން ފަށަން ތައްޔާރުވަމުން ދާތީ ޝަންހާއި އިން ވަނީ އިގާލޯ އެނބުރި ގެންދަން މަސައްކަތް ކޮށްފައެވެ. އެކަމަކު ޔުނައިޓެޑުން އިގާލޯ މަޑުކުރުވަން ބޭނުންވީ އިރު، އޭނާގެ އެއްބަސްވުމުގެ މުއްދަތު އިތުރުކުރަން ޝަންހާއި އިން އެއްބަސްވީ އިތުރު 20 މިލިއަން ޕައުންޑް ދެއްކުމުން ކަމަށް ރިޕޯޓުތައް ބުނެއެވެ.

ޔުނައިޓެޑާއެކު އިގާލޯ އަލަށް ހެދި ލޯނު އެއްބަސްވުން ހަމަވާނީ އަންނަ އަހަރުގެ ޖެނުއަރީ މަހުގެ 31 ވަނަ ދުވަހު އެވެ.

ކޮވިޑް-19 އާ ގުޅިގެން މެދުކަނޑާލާފައި އިނގިރޭސި ޕްރިމިއަރ ލީގު ޖޫން މަހުގެ 17 ވަނަ ދުވަހު އަލުން ފަށަން ނިންމާފައި ވާއިރު، މި ސީޒަން ނިމެންދެން ޔުނައިޓެޑުގައި މަޑުކުރަން ބޭނުންވާ ކަމަށް އިގާލޯ މީގެ ކުރިން ވަނީ ބުނެފަ އެވެ.

އިގާލޯ ވަނީ މި ސީޒަނުގައި ޔުނައިޓެޑަށް ކުޅެދިން މެޗުތަކުގައި މޮޅު ކުޅުމެއް ދައްކާފަ އެވެ. އެގޮތުން ޔުނައިޓެޑަށް މިހާތަނަށް ކުޅުނު 8 މެޗުގައި އޭނާ ވަނީ 4 ލަނޑު ކާމިޔާބުކޮށްފަ އެވެ.

އިގާލޯގެ ލޯނު އެއްބަސްވުމުގެ މުއްދަތު އިތުރު ކުރަން ޝަންހާއި އިން އެއްބަސްވީ އިރު، އިގާލޯ ޝަންހާއިއާއެކު ހަދާފައިވާ އެއްބަސްވުން އާކުރަން އެ ކްލަބުންވެސް މިހާރު އަންނަނީ މަސައްކަތް ކުރަމުންނެވެ. ޝަންހާއި އާއެކު އިގާލޯ މިހާރު ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އެ ކްލަބުން އަންނަނީ 2024 ގެ ނިޔަލަށް އިގާލޯގެ އެއްބަސްވުން އާކުރަން މަސައްކަތް ކުރަމުންނެވެ. އަދި މި އެއްބަސްވުމުގެ ދަށުން އިގާލޯ އަށް ހަފުތާއަކު 400 ހާސް ޕައުންޑުގެ މުސާރައެއް ލިބޭނެ ކަމަށް ވެސް ރިޕޯޓުތައް ބުނެއެވެ.