ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ސްޕެނިޝް ލީގު ޖޫން މަހުގެ އަށްވަނަ ދުވަހު އަލުން ފެށުމުގެ ހުއްދަ ސްޕެއިންގެ ސަރުކާރުން ދީފި އެވެ.

ހޮނިހިރު ދުވަހު ގައުމާ މުޚާތަބު ކުރައްވަމުން ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ވިދާޅުވީ ހާލަތު ރަނގަޅު ވަމުން އަންނާތީ ގައުމު އަލުން ހުޅުވާލުމަށް މަސައްކަތް ކުރަމުން އަންނަ ކަމަށެވެ. އެގޮތުން ޖޫން މަހުގެ އަށްވަނަ ދުވަހުން ފެށިގެން ސްޕެނިޝް ލީގުގެ ކުޅުންވެސް ކުރިއަށް ގެންދެވޭނެ ކަމަށް ވިދާޅުވި އެވެ.

ޖޫން މަހުގެ އަށްވަނަ ދުވަހް ސްޕެނިޝް ލީގު ފެށުމުގެ ހުއްދަ ސްޕެއިންގެ ސަރުކާރުން ދިންއިރު، ލަލީގާ އިން މަސައްކަތް ކުރަމުން އަންނަނީ ޖޫން މަހުގެ 12 ވަނަ ދުވަހު ލީގު އަލުން ފެށުމަށެވެ. އެގޮތުން ޖޫން މަހުގެ 12 ވަނަ ދުވަހު ލީގު އަލުން ފެށޭނެ ކަމަށް އުންމީދު ކުރައްވާ ކަމަށް ލަލީގާގެ ރައީސް ހާވިއޭ ޓެބާސް މީގެ ކުރިން ވަނީ ވިދާޅުވެފައެވެ.

ކޮވިޑް-19 އާ ގުޅިގެން މިދިޔަ މާޗު މަހު ސްޕެނިޝް ލީގުގެ ކުޅުން ހުއްޓާލި ނަމަވެސް، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުން ވަނީ ދީފަ އެވެ. އަދި މިމަހުގެ 18 ވަނަ ދުވަހުން ފަށައިގެން 10 ކުޅުންތެރިން އެކުގައި ތަމްރީނުތައް ހެދުމުގެ ހުއްދަވެސް ވަނީ ދީފައެވެ.

ސްޕެނިޝް ލީގު އަލުން ފަށަން ތައްޔާރު ވަމުންދާއިރު، ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 ށް ޓެސްޓު ކޮށްފަ އެވެ. އެއާއެކު ދެ ޑިވިޝަނުން މީގެ ކުރިން ފަސް ކުޅުންތެރިއަކު ވަނީ ކޮވިޑް-19 ށް ޕޮޒިޓިވްވެފަ އެވެ.