ރާއްޖެއާއި ތައިލެންޑާއި ދެމެދު ފްލައިޓްތައް އިތުރުކުރުމުގެ އެއްބަސްވުމެއްގައި ސޮއިކޮށްފި އެވެ.
މި އެމްއޯޔޫގައި ސޮއިކުރެއްވީ ޓްރާންސްޕޯޓް އޮތޯރިޓީގެ ސީއީއޯ ހުސެއިން ޖަލީލްއެވެ. ތައި ސިވިލް އޮތޯރިޓީގެ ފަރާތުން ސޮއިކުރެއްވީ އެކްޓިން ޑިރެކްޓަރ ޖެނެރަލް މރ. ޗޫލާ ސުކުމަނޮޕް އެވެ.
މިއެއްބަސްވުމުގެ ދަށުން ރާއްޖެއާއި ތައިލެންޑާއި ދެމެދު ހަފްތާއަކު ހަތް ފްލައިޓް ބޭއްވުމަށް އެއްބަސްވެފައިވާއިރު މޯލްޑިވިއަނުން ގެންދަނީ މިހާރުވެސް ތައިލެންޑްގެ ކެޕިޓަލް ސިޓީ ބެންކޮކަށް ޑައިރެކްޓް ފްލައިޓް ބާއްވަމުންނެ އެވެ.
ރާއްޖެއާއި ތައިލެންޑާ ދެމެދު 21 ޑިސެންބަރު 1989 ގައި ސޮއިކޮށްފައިވާ ވައިގެ ދަތުރުފަތުރާ ބެހޭ އެއްބަސްވުމަށް އިސްލާހު ގެނައުމަށް ވަނީ މަޝްވަރާ ބައްދަލުވުމެއްވެސް ބާއްވައިފައެވެ.
ދެ ދުވަހުގެ މުއްދަތައް ކުރިއަށްގެންދިޔަ މި މަޝްވަރާ ބައްދަލުވުމަށްފަހު، ދެ ޤައުމު ދެމެދު އެއްބަސްވެވޭ ނުކުތާތަކުގެ މައްޗައް ބިނާކޮށް އެކުލަވާ ލެވޭ މި މެމޮރަންޑަމް އޮފް އަންޑަސްޓޭންޑިންގ އެއްގައި ވަނީ ސޮއިކޮށްފައެވެ.
ބެންކޮކްއަކީ ރާއްޖޭގެ ވިޔަފާރިވެރިންގެ މެދުގައި ވަރަށް މަޤްބޫލު މަންޒިލްއެކެވެ. ބެންކޮކް އެއަރވޭސްއިންވެސް ރާއްޖެއަށް ޑައިރެކްޓް ފްލައިޓް ބާއްވަމުންގެންދެ އެވެ.
ފާއިތުވި އަހަރު ތައިލެންޑުން ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތަށް ބަލާއިރު ސޯޅަ ހާސް ހަތަރު ސަތޭކަ ފަންސާސް އެއް ފަތުރުވެރިން ޒިޔާރަތްކޮށްފައިވެއެވެ.
