އިނގިރޭސި ޕްރިމިއާ ލީގުގައި ވާދަކުރަމުން އަންނަ މެންޗެސްޓާ ސިޓީގެ ސަޕޯޓަރުންނަށް ރިފަންޑް ދޭން އެ ކްލަބުން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ޕްރިމިއާ ލީގާއި ޗެމްޕިއަންސް ލީގު މެދުކަނޑާލާފައިވާއިރު، ޖޫން މަހު ޕްރިމިއާ ލީގު އަލުން ފެށުމަށް އަންނަނީ މަސައްކަތް ކުރަމުންނެވެ. އަދި އޮގަސްޓް މަހު ޔުއެފާ ޗެމްޕިއަންސް ލީގުވެސް އަލުން ފަށާނެ ކަމަށް ރިޕޯޓުތައް ބުނެއެވެ. އެކަމަކު ޕްރިމިއާ ލީގާއި ޗެމްޕިއަންސް ލީގުގެ މެޗުތައްވެސް އަލުން ފަށާނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށެވެ.

އެހެންކަމުން ސިޓީން ވަނީ ޕްރިމިއާ ލީގާއި ޗެމްޕިއަންސް ލީގުގެ މެޗުތަކަށް ޓިކެޓް ގަނެފައިވާ ސަޕޯޓަރުންނަށް ރިފަންޑް ދޭން ނިންމާފައެވެ. ސިޓީ އަކީ ސަޕޯޓަރުންނަށް ރިފަންޑް ދޭނެކަން އިއުލާނުކުރި އިންގްލެންޑުގެ ފުރަތަމަ ކްލަބެވެ.

ކޮވިޑް-19 އާ ގުޅިގެން މެދުކަނޑާލާފައިވާ ޕްރިމިއާ ލީގު ޖޫން މަހުގެ އަށްވަނަ ދުވަހު އަލުން ފަށަން މަސައްކަތް ކުރަމުން އަންނައިރު، ޖޫން މަހު އިނގިރޭސިވިލާތުގައި ކުޅިވަރު ހަރަކާތްތައް އަލުން ފެށުމުގެ ހުއްދަ ސަރުކާރުން ވަނީ ދީފައެވެ.

މި ސީޒަނުގައި ޕްރިމިއާ ލީގުގައި ބާކީ ނުކުޅެ އޮތް 92 މެޗު ކުރިއަށްގެންދާނެ ގޮތަކާ މެދު ކްލަބުތަކާ މީގެ ކުރިން މަޝްވަރާކުރިއިރު، ރިޕޯޓުތައް ބުނާގޮތުން ޕްރިމިއާ ލީގުން މިހާރު ހުށަހަޅާފައިވަނީ ތަފާތު 10 ދަނޑެއްގައި މެޗުތައް ކުޅޭށެވެ. އެ ދަނޑުތައް އިޚުތިޔާރުކުރުމުގައި ގޮތެއް ނިންމާނީ ކްލަބްތަކުންނެވެ. މި ގޮތަށް ކުރިއަށްދާއިރު އެއްވެސް ޓީމަކަށް އެ ޓީމުގެ އަމިއްލަ ދަނޑުގައި މެޗެއް ކުޅުމުގެ ފުރުސަތެއް ނުލިބޭނެ އެވެ.