ނޮވެލް ކޮރޯނާވައިރަސް (ކޮވިޑް-19) ގުޅިގެން މެދުކަނޑާލާފައިވާ ބަންގްލަދޭޝް ލީގުގެ ކުޅުން ޖޫން މަހު އަލުން ނުފަށާނަމަ، އެންމެ ބުއްދިވެރީ ލީގު ކެންސަލް ކުރުން ކަމަށް އެންމެ ފަހުގެ ޗެމްޕިއަން ބަޝުންދަރާ ކިންގްސްގެ ކޯޗު އޮސްކަރ ބްރުޒޮން ބުނެފި އެވެ.

ފެބްރުއަރީ މަހުގެ 13 ވަނަ ދުވަހު ފެށި ބަންގްލަދޭޝް ލީގު މެދުކަނޑާލީ މާރޗު މަހުގެ 16 ވަނަ ދުވަހު އެވެ. ލީގު އަލުން ފަށާނެ ތާރީޚެއް ކަނޑައަޅާފައި ނުވާއިރު، ސީޒަން ކުރިއަށް ނުގޮސް ދިގުލައިގެން ގޮސްފިނަމަ، ބިދޭސީ ކުޅުންތެރިންނަށް މުސާރަ ދޭން ޖެހޭ މުއްދަތު ދިގުވެ، ކްލަބުތަކަށް ވަރަށް ބޮޑެތި ގެއްލުންތަކެއް ވާނެ ކަމަށް ރިޕޯޓުތައް ބުނެއެވެ.

ޑާކާ ޓްރިބިއުންއަށް ދިން އިންޓަވިއު އެއްގައި އޮސްކަރ ބުނީ ޖޫން މަހުގެ ކުރީކޮޅު ލީގުގެ މެޗުތައް އަލުން ފަށައިފިނަމަ، ލީގު ނިންމާލަން އުނދަގޫ ނުވާނެ ކަމަށެވެ. އެކަމަކު ޖޫން މަހު ލީގުގެ މެޗުތައް ނުފެށިިއްޖެ ނަމަ، ލީގު ކެންސަލް ކުރުން ނޫން އެހެން އެއްވެސް ހައްލެން ނެތް ކަމަށް ވެސް ވަނީ ބުނެފައެވެ.

އޭއެފްސީ ކަޕްގެ ގްރޫޕް ސްޓޭޖުގައި ވެސް ވާދަކުރަމުން އަންނަ ބަޝުންދަރާ ކިންގްސްގެ ރައީސް އިމްރުލް ހަސަން މީގެ ކުރިން ދިން އިންޓަވިއު އެއްގައި ވަނީ މި ވަގުތު މެޗެއް ނުކުޅެ ބިދޭސީ ކުޅުންތެރިންނަށް ބޮޑު މުސާރައެއް ދޭން ޖެހުމަކީ އަންނަ ސީޒަނަށް ވެސް ކުރިމަތިވާނެ ގެއްލުމެއް ކަމަށް ވިދާޅުވެފައެވެ.

ކޮވިޑް-19 އާ ގުޅިގެން ބަންގްލަދޭޝް ލީގު މެދުކަނޑާލާފައި ވާއިރު، ބަންގްލަދޭޝް ލީގު ކުރިއަށް ނުގެންދެވި ހުއްޓާލާން ޖެހިއްޖެ ނަމަ، މިނީ ލީގެއް ކުޅެން އެ ގައުމުގެ ގައުމީ ފުޓުބޯޅަ ޓީމުގެ ކޯޗު ޖޭމީ ޑޭ ވަނީ ހުށަހަޅާފައެވެ.

ރިޕޯޓުތައް ބުނާގޮތުންނަމަ ބަންގްލަދޭޝްގެ ގިނަ ކްލަބުތަކުން ބޭނުންވަނީ ލީގު ކެންސަލް ކުރާށެވެ.