އިނގިރޭސި ޕްރިމިއާ ލީގުގައި ވާދަކުރަމުން އަންނަ ބްރައިޓަންގެ ތިންވަނަ ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެ އެވެ.

ފަހުން ކޮވިޑް-19 އަށް ޕޮޒިޓިވްވި ކުޅުންތެރިޔާގެ ނަން ބްރައިޓަން އިން ހާމަކޮށްފައެއް ނުވެއެވެ. އެކަމަކު އެ ކްލަބުން ބުނީ ކޮވިޑް-19 އަށް ހޮނިހިރު ދުވަހު ޕޮޒިޓިވްވި ކުޅުންތެރިޔާ މިހާރު ހުރީ 14 ދުވަހުގެ ސެލްފް-އައިސޮލޭޝަނުގައި ކަމަށެވެ.

ސްކައި ސްޕޯޓްސް އަށް ދިން އިންޓަވިއުއެއްގައި ބްރައިޓަންގެ ޗީފް އެގްޒެކްޓިވް ޕައުލް ބާބާ ވިދާޅުވީ ހަރުކަށި ފިޔަވަޅުތަކެއް އަޅާފައި ވަނިކޮށް އެ ކްލަބުގެ ކުޅުންތެރިއަކު ކޮވިޑް-19 އަށް ޕޮޒިޓިވްވުމަކީ ކަންބޮޑުވާ ކަމެއް ކަމަށެވެ.

ބްރައިޓަންގެ ކުޅުންތެރިއަކު ކޮވިޑް-19 އަށް ޕޮޒިޓިވްވިއިރު، ކޮވިޑް-19 އާ ގުޅިގެން މެދުކަނޑާލާފައިވާ ޕްރިމިއާ ލީގު އަލުން ފެށުމަށް އަންނަނީ މަސައްކަތް ކުރަމުންނެވެ. އެގޮތުން ބައެއް ކްލަބުތަކުން ދަނީ ކުޅުންތެރިން އެކަނި ތަމްރީނުތައް ހަދަން ފުރުސަތު ދެމުންނެވެ. ރިޕޯޓުތައް ބުނާ ގޮތުން ބްރައިޓަންގެ ކުޅުންތެރިންވެސް ވަރަށް އަވަހަށް އެކަނި ތަމްރީނުތަކަށް ނުކުންނާނެއެވެ.

މިދިޔަ މާޗު މަހުގެ 8 ވަނަ ދުވަހު ޕްރިމިއާ ލީގުގެ ކުޅުން މެދުކަނޑާލިއިރު، ޖޫން މަހު ޕްރިމިއާ ލީގު އަލުން ފަށަން އަންނަނީ ތައްޔާރުވަމުންނެވެ. އެގޮތުން ޕްރިމިއާ ލީގުގެ މެޗުތައް ސަޕޯޓަރުން ނުވައްދާ ކުޅޭގޮތަށް ޖޫން މަހުގެ 8 ވަނަ ދުވަހު ފަށައި، ޖުލައި މަހުގެ 27 ވަނަ ދުވަހަށް ލީގު އެއްކޮށް ފުރިހަމަކުރަން އަންނަނީ މަސައްކަތް ކުރަމުންނެވެ.