ބްރެޒިލްގެ ފްލެމިންގޯއާ ގުޅުންހުރި އެންމެން ކޮރޯނާވައިރަސް (ކޮވިޑް-19) އަށް ޓެސްޓު ކުރިއިރު، 38 މީހަކު ޕޮޒިޓިވްވެއްޖެ އެވެ.

ފްލެމިންގޯ އިން ވަނީ އެ ކްލަބާ ގުޅުންހުރި އެންމެން ކޮވިޑް-19 އަށް ޓެސްޓު ކޮށްފައެވެ. އެގޮތުން 293 މީހަކު ޓެސްޓުކުރިއިރު، 38 މީހަކު ވަނީ ޕޮޒިޓިވްވެފައެވެ. އޭގެ ތެރޭގައި އެ ކްލަބުގެ ތިން ކުޅުންތެރިއަކުވެސް ހިމެނޭ ކަމަށް އެ ކްލަބުން ވަނީ ބުނެފައެވެ. މި ތިން ކުޅުންތެރިންގެ ތެރެއިން ދެ ކުޅުންތެރިންނަކީ މީގެ ކުރިންވެސް ކޮވިޑް-19 އަށް ޕޮޒިޓިވްވި ކުޅުންތެރިންނެވެ.

ފްލެމިންގޯގެ ތިން ކުޅުންތެރިއަކު ކޮވިޑް-19 އަށް ޕޮޒިޓިވްވިއިރު، މާޗު މަހުގެ ތެރޭގައި އެޓީމުގެ ކޯޗު ޖޯޖު ޖީސޫސް ވެސް ވަނީ މި ވައިރަހަށް ޕޮޒިޓިވްވެފައެވެ. އެކަމަކު އޭގެ ހަފްތާއެއް ފަހުން އޭނާ ވަނީ ވައިރަހުން ސަލާމަތްވެފައެވެ. ބްރެޒިލް ލީގުވެސް މެދުކަނޑާލާފައިވާއިރު، މީގެ ކުރިން ފްލެމިންގޯގެ ކުޅުންތެރިން ވަނީ މެއި މަހާއި ޖޫން މަހުގެ މުސާރަ އިން 25 އިންސައްތަ އުނިކުރަން ނިންމާފައެވެ.

ކޮވިޑް-19 ގެ އަސަރު ބްރެޒިލަށް ވެސް ކޮށްފައިވާއިރު، މީގެ ކުރިން ފްލެމިންގޯ އަށް 40 އަހަރު ޚިދުމަތްކޮށްފައިވާ އުމުރުން 68 އަހަރުގެ މާސަރު ޖޯޖީނިއޯ ވަނީ ކޮވިޑް-19 ޖެހިގެން މަރުވެފައެވެ.