މެދުކަނޑާލާފައިވާ ފުޓުބޯޅަ ސީޒަން އަލުން ފެށުމުގެ ބަދަލުގައި އަންނަ ސީޒަނަށް ތައްޔާރުވާން ފީފާގެ މެޑިކަލް ކޮމިޓީގެ ޗެއަރމަން ޑރ. މިކެލް ޑިހޫގޭ ވިދާޅުވެއްޖެއެވެ.
ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓުބޯޅަ ވަނީ ހުއްޓުމަކަށް އައިސްފައެވެ. މިހާތަނަށް ޔޫރަޕުން ލީގު ކެންސަލް ކޮށްފައިވަނީ ނެދަލެންޑްސް އިންނެވެ. އަދި ފްރެންޗު ލީގުވެސް ކެންސަލް ކުރަން ޖެހިފައިވާއިރު، ބެލްޖިއަމް އާއި ސްކޮޓްލެންޑުން އަންނަނީ ލީގު ކެންސަލް ކުރުމަށް މަސައްކަތް ކުރަމުންވެ.
ދެކެނު އެމެރިކާގެ އާޖެންޓީނާ އިން އެ ގައުމުގުގެ ފުޓްބޯޅަ ސީޒަންގެ ބާކީބައި ކެންސަލް ކޮށްފައިވާއިރު، އޭޝިއާ އިން ދިވެހިރާއްޖެ އިންވެސް ވަނީ ފުޓްބޯޅަ ސީޒަން ކެންސަލް ކޮށްފައެވެ.
އެކަމަކު ޔޫރަޕްގެ ގަދަ ފަސް ލީގުގެ ތެރެއިން އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގުގެ އިތުރުން ޖަރުމަން ލީގު އަލުން ފެށުމަށް މިހާރު އަންނަނީ މަސައްކަތް ކުރަމުންނެވެ.
އެކަމަކު ފީފާގެ ޗީފް ޑޮކްޓަރު ޑިހޫގޭ ވިދާޅުވީ މިފަދަ ދަނޑިވަޅެއްގައި ރިސްކު ނެގުމުގެ ބަދަލުގައި އެންމެ ރަނގަޅުވާނީ މެދުކަނޑާލާފައިވާ ލީގުތައް ކެންސަލްކުރުމެވެ. އެގޮތުން ހާލަތު ތަންދިނުމުން އަންނަ ސީޒަނަށް ތައްޔާރުވުން މާ ބުއްދިވެރި ކަމަށް އޭނާ ވިދާޅުވިއެވެ.
ޑިހޫގޭ އިތުރަށް ވިދާޅުވީ މެޗުތަކުގައި ގައިދުރުކަން ބެހެއްޓުމަކީ ވަރަށް އުނދަގޫ ކަމަކަށް ވާނެ ކަމަށާއި އެކަމަކު މެޗުތައް އަލުން ފަށާނަމަ ސާފުތާހިރުކަން އިސްކޮށް ހާއްސަ ގަވާއިދުތަކެއް ހެދިފައި ހުންނަން ޖެހޭނެ ކަމަށެވެ.
ސީޒަން އަލުން ފެށުމުގެ ބަދަލުގައި އަންނަ ސީޒަނަށް ތައްޔާރުވާން ފީފާގެ ޗޯފް ޑޮކްޓަރު ގޮވާލެއްވިއިރު، ޔުއެފާ އިން މީގެ ކުރިން ވަނީ ޔޫރަޕިއަން ލީގުތަކާ މެދު އަމަލުކުރާނެ ވަކި ގޮތެއް މެއި މަހުގެ 25 ގެ ކުރިން އެންގުމަށް ވަނީ އެދިފައެވެ. އަދި ޔުއެފާ ގެ ވިސްނުން ހުރީ އޮގަސްޓް މަހުގެ ކުރީކޮޅު ލީގުތައް އެއްކޮށް ފުރިހަމަ ކުރުން ކަމަށް ރިޕޯޓުތައް ބުނެއެވެ.
