މާލޭގައި ޑެލިވަރި ކޮށްދިނުމުގެ މަސައްކަތްކުރާ ފަރާތްތަަކުގެ ސިއްހީ ކަންކަމަށް ސަލާމުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިން ގައިން އަރާ ބަލިތަކާއި ބެހޭ މާހިރު ޑރ. އިބްރާހިމް އަފްޒަލް އިލްތިމާސް ކުރައްވައިފި އެވެ.
އާދިއްތަ ދުވަހު ނެޝަނަލް އިމަރޖެންސީ ރެސްޕޮންސް ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕުގައި ވެސް ހިމެނިވަޑައިގަންނަވާ ޑރ. އަފްޒަލް ވިދާޅުވީ، ޑެލިވަރީގައި އުޅޭ މިހުންގެ ސިއްހީ ހާލަތު ގާތުން ބެލުމަކީ ކޮވިޑް-19 ފެތުރެމުންދާ ދުވަސްވަރެއްގައި އެ މީހުން ގެންގުޅޭ ފަރާތްތަކުން ކުރަން ޖެހޭ ވަރަށް މުހިއްމު ކަމެއް ކަަމަށެވެ.
އަދި ކޮވިޑް-19 ގެ އެއްވެސް ކަހަލަ އަލާމާތެއް ޑެލިވަރީކުރާ މީހުންގެ ފަރާތްތަކުން ފެންނަނަމަ އެކަން އެޗްޕީއޭ އަށް އެންގުމަށް ޑރ. އަފްޒަލް ވަނީ އިލްތިމާސް ކުރައްވާފަ އެވެ.
ޑެލިވަރީގައި މަސައްކަތްކުރައްވާ ބޭފުޅުންނަށްވެސް އަދި އެމީހުންނާ ހަވާލުވެގެން އުޅުއްވާ ބޭފުޅުން ވަރަށް މުހިއްމު ކަމެކޭ އެމީހުންގެ ސިއްހީ ހާލަތު ހުރީ ކިހިނެއްތޯ ވަރަށް ގާތުން ކޮންމެ ދުވަހަކު އެމީހުންގެ އެ މައުލޫމާތު ނަގައި ސިއްހީ ހާލަތު ހުރީ ކިހިނެއްތޯ ބަލައި ކިރިޔާވެސް އަލާމަތެއް ފެންނަ މީހެއްނަމަ ވަގުތުން އަޅުގަނޑުމެންނަށް އަންގަން ޖެހޭނެ.ޑރ. އަފްޒަލް
ގޭގެއަށް ޑެލިވަރީ ކޮށްދޭ ފަރާތްތަކާއި މެދު ވީހާވެސް ބޮޑަކަށް ގައިދުރުކަން ބަހައްޓަން ޑރ. އަފްޒަލް ވިދާޅުވަމުން ގެންދަވާ ވިދާޅުވުން ވަނީ ތަކުރާރު ކުރައްވާފަ އެވެ.
އަދި ޕާރުސަލްތަކުން ކާއެއްޗެހި ނަގައި ވަކި ކޮންޓެއިނަރ އަކަށް ކާއެއްޗެހި އެޅުމަށް ޑރ. އިލްތިމާސް ކުރެއްވި އެވެ.
މާލެއިން ކޮވިޑް-19 އަށް ޕޮޒިޓިވްވި ކޭސްތަކުގެ ކްލަސްޓަރ ތަކުގެ ތެރޭގައި އެނެމް ގިނައިން ހިމެނެނީ ޑެލިވަރީ ކުރުމުގައި އުޅޭ މީހުންނެވެ. ފިހާރަތަކުގައި މުދާ އުފުލަން އުޅޭ މީހުންނަށްވެސް ސަމާލުކަން ދޭން ޖެހޭކަން ފާހަގަކުރައްވަމުން ޑރ. އަފްޒަލް ވިދާޅުވީ، އެ ފަރާތްތައް މަސައްކަތަށް ނިކުތުމުގެ ކުރިން އެމީހުންގެ ސިއްހީ ހާލަތުވެސް ބެލުން އެއީ މުހިއްމު ކަމެއް ކަމަށެވެ.
މަގުމަތީގައި އުޅޭ ވަގުތުތަކުގެ އިތުރުން ގޭތެރޭގައި އުޅޭއިރުވެސް ގައިދުުރުކަން ބެހެއްޓުމަށް ޑރ. އަފްޒަލް ވަނީ ވަރަށް ބޮޑަށް ބާރު އަޅުއްވާފަ އެވެ.
