އިކޮނޮމިކް މިނިސްޓްރީން ވިޔަފާރި ޕާމިޓްތަކުގެ ދަފްތަރެއް ވަރަށް އަވަހަށް އެކުލަވާލާނެ ކަމަށް ރެޖިސްޓްރަރ އޮފް ކޮމްޕެނީސް މަރިޔަމް ވިސާމް ވިދާޅުވެއްޖެއެވެ.
އާދިއްތަ ދުވަހު މެންދުރު ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވިސާމް ވިދާޅުވީ ވިޔަފާރި ޕާމިޓް ދަފްތަރެއް އެކުލަވާލާ ޝާއިޢު ކުރުމުން ރައްޔިތުންނަށް ލުއި ފަސޭހަތަކެއް ލިބިގެންދާނެ ކަމަށެވެ.
އެގޮތުން ހޯމަ ނުވަތަ އަންގާރަ ދުވަހުގެ ވަގުތެއްގައި ވިޔަފާރި ޕާމިޓްތަކުގެ ދަފްތަރު މިނިސްޓްރީގެ ވެބްސައިޓް އަދި ޓްވިޓަރގައި ޢާންމު ކުރައްވާނެކަމަށް އޭނާ ވިދާޅުވިއެވެ.
ވިސާމް ވިދާޅުވީ މިދަފްތަރުން ޢާންމުކޮށް ގޮސް ވިޔަފާރި ކުރެވޭ ފިހާރަތަކާއި، ޑެލިވަރީ ކޮށްދޭ ފިހާރަތައް ރައްޔިތުންނަށް އެނގޭނެ ކަމަށެވެ. އަދި ވިދާޅުވީ ވަރަށް ގިނަ ފިހާރަތަކުން ޑެލިވަރީ ޕާމިޓް ނަގާފައިވާ ކަމަށެވެ.
ހުރިހާ ފިހާރަތައް ލޮކްޑައުންގެ ހާލަތުގައި މިހުރީއެއް ޒިޔާރަތް ކޮށްގެން ވިޔަފާރި ކުރަން ހުޅުވާލާފައެއް ނޫން. ވަރަށް ގިނަ ފިހަރާތަކުން ޑެލިވަރީ ޕާމިޓް ނަގަފަ އޮތީ. ހުރިހާ ސަރަހައްދެއްގައި ހުރި ހުރިހާ ފިހާރަތަކަކީ ކުރިއެކޭ އެއްގޮތަށް އާންމުކޮށް އަޅުގަނޑުމެން އާންމު ދިރިއުޅުމުގައި މިދިޔަ ދުވަސްތަކުގައި ފިހާރަތަކަށް ޒިޔާރަތް ކުރާހެން، ފިހާރަތައް ހުޅުވާފަ ހުންނަހެން ހުޅުވާފަ ނުހުންނާނެ. ނަމަވެސް އަޅުގަނޑުމެން ދަފްތަރެއް އެކުލަލާ ލާފައި ޝާއިއު ކުރާނަން. އާންމުން ޒިޔާރަތް ކޮށްގެން ފިހާރައިން މުއަމަލާތް ކުރަން ފިހާރަ ހުޅުވާލާ ބަހައްޓާފަ މިހުންނަނީ ކޮން ތަންތަނެއް ކަން.ރެޖިސްޓްރާ އޮފް ކޮމްޕެނީސް މަރިޔަމް ވިސާމް
ވިސާމް ވިދާޅުވީ ލޮކްޑައުންގެ މިޙާލަތުގައި ޒަރޫރީ ބޭނުމެއްގައި ކޮންމެހެން ދާން ޖެހިގެން މެނުވީ ފިހާރަތަކަށް ނުދިއުމަކީ ވަރަށް ބޮޑު އެދުމެއްކަމަށެވެ. އަދި ވީހާ ވެސް ބޮޑަށް އޮންލައިން ޚިދުމަތްތައް ބޭނުން ކުރުމަށް އިލްތިމާސްކޮށްފައިވެއެވެ.
