''ވަރު ބައި އެޓްމޮސްފިޔަރ'' ރިސޯޓުން ވަގުތީ ހިޔާތަކުގައި ތިބި މީހުންނަށް އެހީތެރިކަން ފޯރުކޮށްދީފިއެވެ.
ޖެންޑަރ މިނިސްޓްރީން ބުނީ ވަރު ބައި އެޓްމޮސްފިޔަރ ރިސޯޓުން ލޮކްޑައުންއާ ގުޅިގެން ވަގުތީ ހިޔާތަކުގައި ތިބި މީހުންނަށް ކާބޯތަކެއްޗާ ފެން ހަދިޔާ ކޮށްފައިވާ ކަމަށެވެ.
މިރިސޯޓުގެ އިތުރުން ބައެއް އަމިއްލަ ޖަމިއްޔާތަކުން ވެސް ވަގުތީ ހިޔާގައި ތިބި މީހުންނަށް އެހީތެރިކަން ފޯރުކޮށްދީފައިވެއެވެ.
މާލެސިޓީން ކޮވިޑް-19 ފެނުމާ ގުޅިގެން މިމަހުގެ 30ގެ ނިޔަލަށް ވަނީ ލޮކްޑައުން ކޮށްފައެވެ. އެގޮތުން ރަށަށް ނުދިއުމަށް މާލެއަށް އައިސް ތިބި ގިނަ އަދަދެއްގެ ބަޔަކު މާލޭގައި ތާށިވެފައިވާއިރު، ބައެއް މީހުންގެ ވަޒީފާތައް ގެއްލި ކުލި ނުދެއްކިގެން މަގުމަތިވެފައިވެއެވެ.
މިފަދަ މީހުންނަށް އެހީތެރިވުމަށް ސަރުކާރުން ގިނަ މަސައްކަތްތައް ކުރަމުންދާއިރު، އާންމު ފަރުދުންގެ ވެސް އެހީތެރިކަން ލިބެމުންދެއެވެ. އަދި މާލެސިޓީގެ ބައެއް ސްކޫލުތައް ވަގުތީ ހިޔާގެ ގޮތުގައި މިހާރު ވަނީ ބޭނުން ކުރަން ފަށާފައެވެ.
އެގޮތުން މިހާތަނަށް ބޯހިޔާވަހިކަން ބޭނުންވާ 136 ފަރާތަކަށް މިހައިތަނަށް ވަގުތީ ހިޔާތަކުގައި އެ އިންތިޒާމު ހަމަޖައްސައި ދީފައިވާކަމަށް ޖެންޑަރ މިނިސްޓްރީން ބުނެއެވެ.
