ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރޯގާ ރާއްޖޭގައި ވެސް ފެތުރެމުންދާތީ، ރާއްޖޭގެ އިޤުތިޞާދު ވަރަށް ބޮޑަށް ދަށަށް ގޮސްފައިވާ މިދަނޑިވަޅުގައި، ދައުލަތުން 20،000ރ އަށް މަތިން މުސާރަ ލިބޭ އެއްވެސް ބޭފުޅަކު ހުރެގެން ނުވާނެކަމަށް ވިދާޅުވެ، މުސާރަތައް ކުޑަކުރުމަށް ރައްޔިތުންގެ މަޖިލީހުގެ މައިނޯރިޓީ ލީޑަރ އަދި ޕީޕީއެމް ޕާލަމެންޓްރީ ގްރޫޕްގެ ލީޑަރު، އޭދަފުށި ދާއިރާގެ މެންބަރު އަޙްމަދު ސަލީމް (ރެޑްވޭވް ސަލީމް) ގޮވާލައްވައިފިއެވެ.
ކޮވިޑް-19 އާ ގުޅިގެން އަންނަ އިޤްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝްފްލޯ އިތުރު ކޮށްދިނުމަށް ރައްޔިތުންގެ މަޖިލީހަށް ފިނޭންސް މިނިސްޓަރ އިބްރާހީމް އަމީރު ހުށަހަޅުއްވާފައިވާ މައްސަލައަށް ބަހުޘް ކުރައްވަމުން ސަލީމް ވަނީ، ރާއްޖޭގެ ސިޔާސީ މަޤާމުތަކުގައި ތިއްބެވި ބޭފުޅުންނާއި، ހުރިހާ ފަނޑިޔާރުންވެސް ހިމެނޭގޮތަށް 20،000ރ އަށް އެބޭފުޅުންގެ މުސާރަތައް ދަށްކުރުމަށް ގޮވާލައްވާފައެވެ. އަދި ދައުލަތުން 20،000ރ އިން މަތިން މުސާރަ ލިބޭ އެއްވެސް ފަރާތެއް މިޙާލަތުގައި ހުރެގެން ނުވާނެ ކަމަށް ސަލީމް ވިދާޅުވިއެވެ.
އެގޮތުން ރައީސްކަން ކުރައްވާފައިވާ ހަތަރު ބޭފުޅުންނަށް ދެވޭ ފައިސާ އެއްކޮށް އުނިކޮށްލުމަށް ސަލީމް ގޮވާލެއްވިއެވެ. އަދި އެބޭފުޅުންވެސް ޤައުމަށް ކިރިޔާވެސް އިޚުލާސްތެރިކަމެއް ހުރިނަމަ އެބޭފުޅުން އަމިއްލަފުޅަށްވެސް އެފައިސާ ނުނަންގަވާނެ ކަމަށް ސަލީމް ވިދާޅުވިއެވެ.
ދައުލަތުގެ މަތީ ފަންތީގައި މަޤާމުތަކުގައި ތިއްބެވި ބޭފުޅުން، ޚާއްޞަކޮށް، ރައްޔިތުންގެ މަޖިލީހުގެ މެންބަރުންގެ މުސާރަ 20،000ރ އަށް ކުޑަކުރަން މިހާރުން މިހާރަށް ގޮވާލަން. ދައުލަތުގައި އެއްވެސް މީހަކު މިއަދު ހުރެގެންނުވާނެ، 20،000ރ ނުވަތަ 25،000ރ އަށްވުރެ މަތީ މުސާރައެއް ލިބޭ ބޭފުޅަކު. ހުދު ރައީސުލްޖުމްހޫރިއްޔާ ވެސް ގޮވާލަން ކުރިއަށް އޮތް 6 މަސްދުވަހުގެ މުސާރަ އުނިކޮށްލަން،އޭދަފުށި ދާއިރާގެ މެމްބަރު އަހުމަދު ސަލީމް
ނަމަވެސް ސަލީމު ވިދާޅުވީ ސިވިލް ސަރވިސް މުވައްޒަފުންގެ މުސާރައިން އެންމެ ލާރިއެއްވެސް އުނިކޮށްގެން ނުވާނެކަމަށެވެ.
ސަލީމް ވިދާޅުވީ، މިއަދަދުތަކަށް ދައުލަތުގެ ޚަރަދުތަށް ކުޑަކުރަން ޖެހޭ ކަމަށާއި އެހެންނޫންގޮތަކަށް މިޤައުމު އަތެއް ނުވާނެ ކަމަށެވެ. ސަލީމް ވިދާޅުވީ ދައުލަތުގެ މުވައްޒަފުންގެ މުސާރަ ނުދެވިގެން މަރުކަޒީ ބޭންކް ކަމަށްވާ އެމްއެމްއޭއިން ފައިސާ ނެގިނަމަވެސް، އަމިއްލަ ވިޔަފާރިވެރިޔާ ހަދާނެގޮތެއް ނެތްކަމަށެވެ.
ވާހަކަފުޅުގައި މެންބަރުވަނީ 400އަށް ވުރެ ގިނަ މުވައްޒަފުން އަމިއްލައަށް ގެންގުޅުއްވާ ކަމަށް ވިދާޅުވެފައެވެ.
