ދުނިޔޭގައި ދެވަނަ އަށް އެންމެ ހަލުވި މިނުގައި ކޮވިޑް-19 ފެތުރެމުންދާ ސްޕެއިންގައި ވައިރަސް ޖެހޭ މީހުންގެ އަދަދު ދަށަށްދާނަމަ މީހުންނަށް ކަސްރަތު ކުރުމަށް ބޭރަށް ނިކުތުމުގެ ފުރުސަތު ދޭން ނިންމަވާފައި ވާކަމަށް އެގައުމުގެ ބޮޑު ވަޒީރު ޕެޑްރޯ ސަންޗޭން ވިދާޅުވެއްޖެ އެވެ.

ހޮނިހިރު ދުވަހު އެގައުމުގެ ރައްޔިތުންނާ މުޚާތަބު ކުރައްވާ ވާހަކަ ދައްކަވަމުން ސަންޗޭން ވިދާޅުވީ މެއި މަހުގެ 2 ވަނަ ދުވަހުން ފެށިގެން އެގޮތަށް ކަންކުރުމަށް ނިންމަވާފައިވާ ކަމަށެވެ. ސަންޗޭޖް ވިދާޅުވީ ގެއިން ބޭރުގައި މީހުންނަށް ކުޅިވަރު ކުޅުމާއި ހިނގާލަން ދިޔުމުގެ ފުރުސަތު ދިނުމަށް ވިސްނަވާކަމަށެވެ. އަދި އެގޮތަށް ބޭރަށް ނިކުންނަނަމަވެސް އެމީހަކާއެކު ދިރިއުޅެމުންދާ އެހެން މީހަކަށްވެސް ހިނގާލަން ނިކުތުމުގެ ފުރުސަތު ލިބިގެންދާނެ ކަމަށް ސަންޗޭޒް ވިދާޅުވި އެވެ.

ކޮވިޑް-19 ހަލުވި ކަމައެކު ފެތުރެން ފެށުމާއެކު ސްޕެއިން ލޮކްޑައުން ކޮށްފައިވަނީ މަރޗް މަހުގެ 14 ވަނަ ދުވަހު އެވެ. އެމީހުންނަށް ބޭރަށް ނިކުމެ އުޅުމުގެ ފުރުސަތު ލިބެނީ ހަމައެކަނި ކާބޯތަކެއްޗާއި ބޭސް ގަތުމަށެވެ. އަދި ކޮންމެހެން މަސައްކަތްކުރަން ޖެހޭ ދާއިރާތަކުގެ މީހުންނަށެވެ. ކަސްރަތުކުރުމަށް ބޭރަށް ނިކުމެ އުޅުމުގެ ފުރުސަތެއް އަދި މިހާތަނަށް އައިއިރު ދީފައެއް ނުވެއެވެ.

ސްޕެއިން ލޮކްޑައުން ކޮށްފައި އޮތްނަމަވެސް މިފަހަކުން ވަނީ އެގައުމުގެ 12 އަހަރުން ދަށުގެ ކުޑަކުދިންނަށްވެސް ބޭރަށް ނިކުމެ އުޅުމުގެ ފުރުސަތު ދީފަ އެވެ. މެއި މަހުގެ 11 ވަނަ ދުވަހާ ހަމައަށް ސްޕެއިން ލޮކްޑައުންގައި ބޭއްވުމަށް އެގައުމުގެ ޤާނޫނު ހަދާ މަޖިލީހުން ވަނީ މިހާރު ފާސްކޮށްފަ އެވެ. ނަމަވެސް މެއިމަހުގެ މެދު ތެރޭ ހިސާބުގައި މިހާރު އަޅާފައިވާ ފިޔަވަޅުތަކަށް ލުޔެއް ދިނުމަށް ނިންމާފައިވާކަމަށް އެގައުމުގެ ބޮޑު ވަޒީރު ވަނީ ވިދާޅުވެފަ އެވެ.

މިހާތަނަށް އައިއިރު ސްޕެއިންގެ 223,759 މީހުންނަށް ވައިރަސް ޖެހިފައިވާއިރު 22,902 މީހުން ވަނީ ވައިރަސް ޖެހިގެން މަރުވެފަ އެވެ.