ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސިވިލާތުން ކަނޑައަޅާފައިވާ ގަވާއިދުތަކާ ޚިލާފަށް އަމުލުކުރެވުމުން، ޓޮޓެންހަމް ހޮޓްސްޕާގެ ޑިފެންޑަރު ސާޖް އޯރިއޭ އާއި މިޑްފީލްޑަރު މޫސާ ސިސޯކޯ މާފަށް އެދިއްޖެ އެވެ.

ކޮވިޑް-19 ގެ ސަބަބުން އިންގްލެންޑް ލޮކްޑައުން ކޮށްފައިވާއިރު، އެ ގައުމުން ކަނޑައަޅާފައިވާ ގަވާއިދުގެ ދަށުން ކާބޯތަކެތި ގަތުމަށާއި ސިއްހީ ކަންކަމުގައި ބޭރަށް ދެވެނީ ދުވާލަކު އެއްފަހަރު އެވެ. އަދި ކަސްރަތު ކޮށްލުމަށް ބޭރަށް ދާއިރު، އިޖުތިމާއީ ގައިދުރުކަމުގެ ގަވާއިދުގެ ދަށުން ގައިގޯޅިވުންވެސް ވަނީ މަނާކޮށްފައެވެ.

އެކަމަކު ޓޮޓެންހަމްގެ ޑިފެންޑަރު އޯރިއޭ ވަނީ ސިސޯކޯ އާއެކު ގަވާއިދުތަކާ ޚިލާފަށް އެކުގައި ކަސްރަތުކުރަމުންދިޔަ ވީޑިއޯއެއް އިންސްޓާގްރާމްގައި ހިއްސާކޮށްފައެވެ. އެކަމަކު މާގިނައިރުތަކެއް ނުވަނީސް އެ ވީޑިއޯ އޯރިއޭ ވަނީ ޑިލިޓް ކޮށްފައެވެ.

އެކަމާ ގުޅިގެން ޓޮޓެންހަމުން އެ ދެ ކުޅުންތެރިންނަށް ނަސޭހަތްތެރިވުމުން، ދެ ކުޅުންތެރިންވެސް ވަނީ އެކަމަށް މާފަށް އެދިފައެވެ.

މީގެ ކުރިން ޓޮޓެންހަމްގެ ކޯޗު ހޯސޭ މޮރީނިއޯ އާއި މިޑްފީލްޑަރު ޓަންގުއީ އެންޑޮމްބެލޭ އަދި ހޭޑްލީ ކޮމޮން އެކުގައި ބޭރުގައި ކަސްރަތު ކުރަން އުޅުނުއިރު، އިޖުތިމާއި ގައިދުރުކަމުގެ ގަވާއިދާ ޚިލާފަށް އަމަލުކުރުމުން، ޓޮޓެންހަމުން ވަނީ ގަވާއިދުތަކަށް ބޯލެނބުމަށް އެޓީމުގެ ކުޅުންތެރިންނާއި އޮފިޝަލުންނަށް އިލްތިމާސްކޮށްފައެވެ.

ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، އިނގިރޭސި ޕްރިމިއާ ލީގުގެ މެޗުތައް ވަނީ މުއްދަތެއް ނެތް ގޮތަށް ފަސްކޮށްފައެވެ.

އިންގްލެންޑުން މިހާތަނަށް ކޮވިޑް-19 އަށް ޕޮޒިޓިވްވެފައިވަނީ އާސެނަލްގެ ކޯޗު މިކޭލް އާޓެޓާ އާއި، އެސްޓަން ވިލާގެ ގޯލްކީޕަރު ޕެޕޭ ރެއިނާ އަދި ޗެލްސީގެ ފޯވާޑް ކަލުމް ހަޑްސަން-އޮޑޯއި އެވެ. މީގެ ތެރެއިން ކަލުމް ހަޑްސަން-އޮޑޯއި ވަނީ ވައިރަހުން ރަނގަޅުވެފައެވެ.