ކުޅުންތެރިންގެ މުސާރަ ކުޑަކުރަން ހުށަހެޅުމުން އެކަމާ ދެކޮޅު ހެދި އާސެނަލްގެ ޖަރުމަން މިޑްފީލްޑަރު މެސުތު އޮޒިލްއަށް ގިނަ ބައެއްގެ ފާޑުކިޔުން އަމާޒުވެއްޖެ އެވެ.

ކޮރޯނާވައިރަސް (ކޮވިޑް-19) ގެ ސަބަބުން ކުރިމަތިވާ މާލީ ގޮންޖެހުންތަކުން އަރައިގަތުމަށް އާސެނަލުން ވަނީ އެޓީމުގެ ކުޅުންތެރިންގެ އިތުރަށް، ކޯޗު މިކޭލް އާޓެޓާ އާއި އިތުރު އޮފިޝަލުންގެ މުސާރައިން 12.5 އިންސައްތަ ކުޑަކުރަން ނިންމާފައިވާ ކަން ހާމަކޮށްފައެވެ.

މުސާރަ ކުޑަކުރަން އާސެނަލްގެ ކުޅުންތެރިން އެއްބަސްވީ އަންނަ ސީޒަނުގެ ޔުއެފާ ޗެމްޕިއަންސް ލީގަށް ކޮލިފައިވެއްޖެނަމަ، ކުޅުންތެރިންނަށް ބޯނަހެއް ދޭން އާސެނަލުން ނިންމުމާ ގުޅިގެންނެވެ. އެގޮތުން އަންނަ ސީޒަނުގެ ޔުއެފާ ޗެމްޕިއަންސް ލީގަށް ކޮލިފައިވެއްޖެނަމަ، ކޮންމެ ކުޅުންތެރިއަކަށް އެއް ލައްކަ ޕައުންޑުގެ ބޯނަހެއް ދޭން އާސެނަލުން ނިންމާފައިވާ ކަމަށް ރިޕޯޓުތައް ބުނެއެވެ. އަދި އަންނަ ސީޒަނުގެ ޗެމްޕިއަންސް ލީގު ކާމިޔާބުކޮށްފިނަމަ އިތުރު ފަސް ލައްކަ ޕައުންޑް، ނުވަތަ ޔޫރޮޕާ ލީގު ކާމިޔާބުކޮށްފިނަމަ އިތުރު އެއް ލައްކަ ޕައުންޑް ދޭން އާސެނަލުން ނިންމާފައިވާ ކަމަށްވެސް ރިޕޯޓުތައް ބުނެއެވެ.

އެކަމަކު އާސެނަލްގެ ތިން ކުޅުންތެރިއަކު ވަނީ މި ހުށަހެޅުން ބަލައިނުގަންނަށް ނިންމާފައެވެ. އޭގެ ތެރޭގައި އޮޒިލްވެސް ހިމެނެއެވެ.

އިނގިރޭސި ޕްރިމިއާ ލީގުންވެސް އެންމެ ބޮޑު މުސާރައެއް ލިބޭ ކުޅުންތެރިންގެ ތެރޭ ހިމެނޭ އޮޒިލްއަށް ހަފުތާއެއްގެ މައްޗަށް 350،000 ޕައުންޑް ލިބެއެވެ.

ސްކައި ސްޕޯޓްސްއާ ދިން އިންޓަވިއުއެއްގައި ލިވަޕޫލްގެ ކުރީގެ ޑިފެންޑަރު ޖެމީ ކެރެގާ ބުނީ މިހާލަތުގައި އޮޒިލް ކަހަލަ ކުޅުންތެރިޔަކު، ޓީމުގެ އެހެން ކުޅުންތެރިންނެކޭ އެއްގޮތަށް މިކަމަށް އިޖާބަދޭން ޖެހޭނެ ކަމަށެވެ. އަދި ކްލަބުން އެންމެ ބޮޑު މުސާރައެއް ނަގާ ކުޅުންތެރިޔާގެ ގޮތުގައި ހުރެ، މުސާރަ ދަށް ކުރަން އޮޒިލް އެއްބަސްނުވުމުން މިކަން އިތުރަށް ގޯސްވެގެން ދާނެ ކަމަށްވެސް ބުންޏެވެ.

ކެރެގާގެ އިތުރުންވެސް ފުޓްބޯޅައިގެ ގިނަ ތަޖުރިބާކާރުން އަންނަނީ ފާޅުކަން ބޮޑު ގޮތެއްގައި އޮޒިލްއަށް ފާޑުކިޔަމުންނެވެ.

އެކަމަކު އޮޒިލްގެ ދިފާއުގައިވެސް ބައެއް މީހުން ވަނީ ވާހަކަދައްކާފައެވެ. މީގެ ކުރިން ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިންވެސް ވަނީ މުސާރަ ކުޑަކުރަން އެއްބަސްނުވުމަށް ޕްރިމިއާ ލީގު ކުޅުންތެރިންނަށް ގޮވާލާފައެވެ.

ގިނަ ބައެއްގެ ފާޑު ކިޔުން އޮޒިލްއަށް އަމާޒުވި ނަމަވެސް، އޭނާއަކީ ފުޓްބޯޅަ ކުޅުންތެރިންގެ ތެރެއިން ފާއިތުވެދިޔަ އަހަރުތަކުގައި އެންމެ ގިނައިން ޗެރިޓީތަކަށް އެހީތެރިވެދިން އެއް ކުޅުންތެރިޔާ އެވެ. އެގޮތުން މިދިޔަ އަހަރު ކައިވެނީގެ އުފަލުގައި އޮޒިލް ވަނީ އޭނާގެ ޚަރަދުގައި މަދުވެގެން 1،000 ކުޑަކުދިންނަށް އޮޕަރޭޝަން ކުރުމަށް މަގުފަހިކޮށްދޭނެކަން އިއުލާނުކޮށްފައެވެ. މީގެ އިތުރުން އޮޒިލް ވަނީ ތުރުކީ އާއި ސީރިޔާއިން 100،000 އަށް ވުރެ ގިނަ ފަގީރުންނަށް ކާބޯތަކެއްޗާއި ފައިސާގެ އެހީތެރިކަން ފޯރުކޮށްދީފައެވެ.