ކޮވިޑް-19 ފަދަ ބޮޑެތި ބަލިމަޑުކަން ރާއްޖޭގައި ފެތުރެމުންދާ ދަނޑިވަޅުތަކުގައި ހާލުގައި ޖެހޭ ރައްޔިތުންގެ ހައްގުތައް ރައްކާތެރިކުރުމަށް ރައްޔިތުންގެ މަޖިލީހަށް ބިލެއްް ހުށަހަޅުއްވާނެ ކަމަށް ހޯރަފުށި ދާއިރާގެ މެމްބަރު އަހުމަދު ސަލީމު ވިދާޅުވެއްޖެ އެވެ.
ކޮވިޑް-19 އާ ގުޅިގެން މާލެ ސަރަހައްދު ލޮކްޑައުންގެ މިހާލަތުގައި، ބައެއް ރަށްޔިތުންނަށް ދިމާވެފައިވާ ދަތި އުނދަގޫ ހާލަތުގައި، ސަރުކާރުން އަމަލުކުރާނެ ގޮތެއް ސާފުވެފައި ނުވާތީކަމަށް ވިދާޅުވެ، މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ބުދަ ދުވަހުގެ ޖަލްސާއަށް ހުށަހެޅުއްވި ކުއްލި މައްސަލައަށް ބަހުސް ކުރައްވަމުން ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވީ، ކޮވިޑް-19 ރޯގާ މާލޭ ސަރަހައްދުގައި ފެތުރެމުންދާއިރު، ގޯތި ގެދޮރުން މީހުން ބޭރުކުރަމުންދާ މައްސަލައާއި ކޮންޓްރެކްޓްތައް އުވާލުމާއި ފީ ނުދައްކާ މީހުން ޖޫރިމަނާކުރުމުގެ ކަންތައްތަކަށް ގާނޫނީ ހައްލެއް ގެންނަންޖެހޭ ކަމަށެވެ.
ސަލީމް ވިދާޅުވީ، މިމައްސަލަތަކަށް ގާނޫނީ ފަރުވާއެއް ހޯދުމަށް ބިލެއް ޑްރާފްޓް ކުރައްވަމުން ގެންދަވާ ކަމަށާއި މަޖިލީހުގެ މެމްބަރުންނާއި މަޖިލީހުގެ ރައީސްގެ އެއްބާރު ލިބިލައްވައިފިނަމަ، މަޖިލީހަށް އެބިލް ހުށަހެޅުމަށް ތައްޔާރަށް ހުންނެވި ކަމަށެވެ.
މިހާރު ދިމާވެފައިވާ ދަތިތަކުގައި އަޅުގަނޑުމެންނަށް ދިމާވެފައިވާ މައްސަލަތަކަށް އަޅުގަނޑުމެން އެބަޖެހޭ ގާނޫނީ ހައްލެއް ހޯދަން. ގޯތި ގެދޮރުން މީހުން ބޭރުކުރުމާއި، ކޮންޓްރެކްޓްތައް އުވާލުމާއި ފީ ނުދައްކާ މީހުން ޖޫރިމަނާ ކުރުމުގެ ކަންތައްތަކަށް އަޅުގަނޑު މިހާރު އެބަޖެހޭ ބިލެއް ޑްރާފްޓް ކުރަން. މެމްބަރުންނާއި މަޖިލީހުގެ ރައީސަށް ފެނިވަޑައިގަންނަވާ ކަމަށްވަންޏާ އެބިލް މަޖިލީހަށް ހުށަހަޅާނަން،ހޯރަފުށި ދާއިރާގެ މެމްބަރު އަހުމަދު ސަލީމް
މީގެއިތުރުން ސަލީމް ވިދާޅުވީ، ކޮވިޑް-19 މާލޭ ސަރަހައްދުގައި ފެތުރެމުންދާއިރު، މިހާލަތުގައިވެސް މީހުން މަގުމަތިވާ ވާހަކަ އަޑުއިވެމުންދާ ކަމަށެވެ. އަދި އަނބުރާ ރަށަށް ދާން މާލެއައިސްތިބި މީހުން މާލޭގައި ތާށިވެ، އަދި ވަގުތީ ގޮތުންވެސް ކޮޓަރި ކުށްޔަށް ހިފައިގެން އުޅޭ މީހުންނަށް ވެސް ދަތިތަކާ ކުރިމަތިވެ، ހާލުގައި ޖެހޭ ވާހަކަ އަޑުއިވެމުންދާ ކަމަށެވެ.
އަޅުގަނޑުމެން އެއެންމެނަށް ދެވެން އޮތް އެހީތެރިކަން މިދަނޑިވަޅުގައި ދެވެންޖެހޭނެ. މިވަގުތަކީ މިހާލަތަކީ އެއްވެސް ގޮތަކަށް، އެއްވެސް މީހަކަށް ދައްޗެއް ވެގެން އުޅޭއިރު އަނެއް މީހާ ކުޅިބަލަން ހުންނަންޖެހޭ ވަގުތެއް ނޫން. އަޅުގަނޑުމެން އެބަޖެހޭ ވަރަށް ބޮޑަށް އެކަކު އަނެކަކަށް އެހީތެރިވެ އެއްބާރުލުން ދޭން. އަޅުގަނޑަށް ޔަގީންކަން ލިބޭ، އަޅުގަނޑުމެންނަށް އުނދަގުލުގައި އުޅެން ޖެހުނުކަމުގައި ވީނަމަވެސް އަޅުގަނޑުމެންގެ ރަށްތަކުގައި ކާބޯތަކެތީގެ ދަތުކަމެއް ނެތްކަން. ފެނާ ކަރަންޓްގެ ދަތިކަމެއް ނެތްކަަން. ސިއްހީ ހިދްމަތްތައް ބަރާބަރަށް ލިބޭކަން، ބޭހުގެ ޔަގީންކަން އޮތްކަން. މިހާލަތުގައި އެންމެ މުހިއްމު އިސްކަމެއް ދީގެން އަޅުގަނޑުމެން މިބަލާ ކަންތައްތަކަކީ މިއީ. މިކަންތައްތަކުން އަޅުގަނޑުމެން އަރައިގަނެވޭއިރުގައި ދެންހުރި ކަންތައްތަކާއެކީގައި މިގެއްލުނު ވަގުތު ހޯދުމުގައި އަޅުގަނޑުމެން ދުއްވައިގަންނާނަން.ހޯރަފުށި ދާއިރާގެ މެމްބަރު އަހުމަދު ސަލީމް
މީގެއިތުރުން ސަލީމު ވިދާޅުވީ، ރާއްޖެއިން މިފެންނަނީ ޒަމާންތަކެއް ވަންދެން ރާއްޖޭގައި ކުރަމުންދިޔަ މަރުކަޒީ ވެރިކަމުގެ ސަބަބުން ދިވާމެގެން އުޅޭ މައްސަލައެއް ކަމަށާއި، މިކަހަލަ ބަލި މަޑުކަމެއް ފެތުރެމުންދާއިރު، އެކަން މެނޭޖް ކުރުމަށް ހުރިދަތިތައް މިހާރުވެސް އެބަފެންމަތިވަމުންދާ ކަމަށެވެ.
ސަލީމް ވަނީ، ރަށު ލެވެލްގައި ބައްޔަށް ޓެސްޓް ކުރެވޭނެ އިންތިޒާމުތައް ހަމަޖައްސައި އަދި ބަލި މީހުންނަށް، އެންމެ ކުޑަމިނުން ކޮންމެ ރަށެއްގައި ގާއިމު ނުކުރެވުނުނަމަވެސް އަތޮޅުގެ ކޮންމެވެސް ސަރަހައްދުތަކެއްގައި ބައްޔަށް ފަރުވާދެވޭނެ އިންތިޒާމުތައް ހަމަޖައްސާ ދެއްވަން ކަމާބެހޭ އިދާރާތަކަށް ގޮވާލައްވާފަ އެވެ. ނަމަވެސް މިއީ ޚަރަދު ބޮޑު، އަދި މިދަނޑިވަޅުގައި ވަރަށް ދަތި އުނދަގޫ ކަމަކަމަށްވާނެ ކަމަށްވެސް ސަލީމް ވިދާޅުވި އެވެ.
މިފުރުސަތުގައި އަޅުގަނޑުމެން ފާހަގަކޮށްލަން ބޭނުން. އަޅުގަނޑުމެންނަށް މިފެންނަނީ މަރުކަޒީ ވެރިކަމެއް ގިނަ ދުވަހު ރާއްޖޭގައި އޮތުމުގެ ސަބަބުން މިކަހަލަ ބަލި މަޑުކަމެއް އައީމާ، އެކަން މެނޭޖް ކުރުމަށް އަޅުގަނޑުމެންނަށް ހުރި ދަތުތައް. އެޔާއެކުގާ މިހާރުން މިހާރަށް ވެސް އަޅުގަނޑު އެދެން، ރަށު ލެވެލްގައި ބައްޔަށް ޓެސްޓް ކުރެވޭނެ ގޮތްތައް ހަދާ، އަދި ބަލި މީހުންނަށް، އެންމެ ކުޑަމިނުން ކޮންމެ ރަށެއްގައި ގާއިމު ނުކުރެވުނުނަމަވެސް އަތޮޅުގެ ކޮންމެވެސް ސަރަހައްދުތަކެއްގައި ބައްޔަށް ފަރުވާދެވޭނެ ގޮތްތަކެއްވުން. މިހެން މިދަންނަވަނީ މިހާރު މިއޮތް ނިޒާމުގެ ތެރެއިން މިކަންކަން އަޅުގަނޑުމެން ކުރާކަމަށް ވަންޏާ މިއީ ވަރަށް ހަރަދު ބޮޑު، ވަރަށް ދަތި އުނދަގޫ ކަމަކަށް ވެގެން ހިނގައިދާނެ. އަޅުގަނޑު އުއްމީދުކުރަން، އަޅުގަނޑުގެ މިވާހަކަ ކަމާބެހޭ ފަރާތްތަކުން އަޑު އައްސަވައި، ދާއިރާގައި މިބައްޔަށް ޓެސްޓް ކުރެވޭނެ ގޮތްތަކަކާއި އަދި ބައްޔަށް ފަރުވާ ދެވޭނެ ގޮތްތަކެއް ވަރަށް އަވަހަށް ހޯއްދަވައިދެއްވުން،ހޯރަފުށި ދާއިރާގެ މެމްބަރު އަހުމަދު ސަލީމް
މީގެ އިތުރުން ސަލީމް ވަނީ، މިފަދަ ދަތި އުނދަގޫ ދަނޑިވަޅުގައި އެންމެން އެންމެނަށް ތަންކޮޅެއް ބޮޑަށް އަޅާޅުން އިސްކޮށް، އެކަކުއަނެކަކަށް އެހީތެރިވުމުގެ ރޫހެއްގައި މަސައްކަތް ކުރެއްވުމަށް ދިވެހި ރައްޔިތުންނަށް ކިބައިން އެދިލައްވާފަ އެވެ.
