ކޮރޯނާވައިރަސް (ކޮވިޑް-19) އާ ގުޅިގެން މުއްދަތެއް ނެތް ގޮތަށް މެދު ކަނޑާލާ ފައިވާ އިޓާލިއަން ލީގު އަލުން ފަށަން ހުރިހާ ކްލަބުންވެސް އެއްބަސްވެއްޖެ އެވެ.

މީގެ ކުރިން އިޓާލިއަން ލީގުގެ ބްރެޝިއާ، ޓޮރިނޯ، ސަމްޕްޑޯރިއާ، އުދިނޭޒީ، ސްޕާލް، ޖެނޯއާ އަދި ކަލިއާރީން ލީގު އަލުން ފަށަން ބޭނުމެއް ނުވާ ކަމަށް އިޓަލީގެ މީޑިއާތަކުން ވަނީ ރިޕޯޓު ކޮށްފައެވެ.

އެކަމަކު އަންގާރަ ދުވަހު ލެގާ ސެރިއޭ ކައުންސިލުން ވަނީ ވީޑިއޯ ކޮންފެރެންސް މެދުވެރިކޮށް ލީގުގެ ހުރިހާ ކްލަބުތަކާ ބައްދަލުކޮށްފައެވެ. އަދި މި ބައްދަލުވުމަށްފަހު، ލީގު އަލުން ފަށަން ހުރިހާ ކްލަބަކުންވެސް އެއްބަސްވެފައިވާ ކަމަށް ވަނީ ބުނެފައެވެ. އެކަމަކު ލީގު އަލުން ފަށާނީ ސަރުކާރުން ހުއްދަދޭ ނަމަ، ފީފާ އާއި ޔުއެފާ އިން ކަނޑައަޅާފައިވާ އުސޫލުގެ މަތިން ކަމަށް ވެސް ވަނީ ބުނެފައެވެ.

މީގެ ކުރިން އިޓާލިއަން ފުޓްބޯލް ފެޑަރޭޝަނުގެ ރައީސް ގެބްރިއަލީ ގްރަވީނާ ވެސް ވަނީ އިޓާލިއަން ލީގުގެ މެޗުތައް ކެންސަލް ނުކޮށް، ހާލަތު ތަންދިނުމުން ކުރިޔަށް ގެންދާނެ ކަމަށް ވިދާޅުވެފައެވެ.

ކޮރޯނާވައިރަސް (ކޮވިޑް-19) އާ ގުޅިގެން މުއްދަތެއް ނެތް ގޮތަށް އިޓާލިއަން ލީގު މެދުކަނޑާލާފައި ވާއިރު، އިޓަލީގެ ސަރުކާރުން ވަނީ މެއި މަހުގެ 3 ގެ ނިޔަލަށް އެއްވެސް ކުޅިވަރު ހަރަކާތެއް އެ ގައުމުގައި ބޭއްވުން މަނާ ކޮށްފައެވެ. އެހެންކަމުން ޖޫން މަހުގެ ތެރޭގައި ލީގުގެ ކުޅުން އަލުން ފެށުމަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.

އިޓާލިއަން ލީގު މެދުކަނޑާލިއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކު އެވެ. ދެވަނައިގައި އޮތް ލާޒިއޯއަށް 26 މެޗުން ވަނީ 62 ޕޮއިންޓު ލިބިފައެވެ.