ހޯމަ ދުވަހު ކޮވިޑް-19އަށް ޕޮޒިޓިވްވި މީހުންގެ ތެރޭގައި 60 އަހަރުން މަތީގެ މީހެއް ހިމެނޭ ކަމަށް ނެޝެނަލް އެމަޖެންސީ އޮޕަރޭޝަން ސެންޓަރު (އެންއީއޯސީ)ން ބުނެފިއެވެ.
މައުލޫމާތު ލިބިފައިވާ ގޮތުގައި ބައްޔަށް ޕޮސިޓިވް ވި 60 އަހަރުން މަތީގެ މީހަކީ ބަންގްލަދޭޝްގެ ރައްޔިތެކެވެ.
ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ހޯމަ ދުވަހުގެ މެންދުރުފަހު ބޭއްވި ނޫސްވެރިންގެ ބައްދަލުވުމުގައި ޑރ.ނަޒްލާ ރަފީގް ވިދާޅުވީ ހޯމަ ދުވަހު ޕޮޒިޓިވްވި މީހުންގެ ތެރޭގައި 60 އަަހަރުން މަތީގެ މީހެއް ހިމެނޭ ކަމަށެވެ.
މިއީ ދޮށީ އުމުރުގެ މީހަކު ބައްޔަށް ޕޮސިޓިވްވިކަން ރާއްޖޭގައި ރިޕޯޓު ކުރި ފުރަތަމަ ފަހަރެވެ.
ހޯމަ ދުވަހު އެކަނި ޕޮޒިޓިވި ކޭސްތަކާ ބެހޭ ގޮތުން ޑރ.ނަޒްލާ ތަފްސީލް ކޮށްދެއްވި މައުލޫމާތު:
- ކޭސް 53: ފުލޫ ކްލިނިކަށް ދިޔަ ދިވެއްސެއް. އޭނައަކީ ބީއެމްއެޗްގެ ޑެލިވަރީ ސްޓާފެއްގެ ގޮތުގައި މަސައްކަތް ކުރާ މީހެއް.
- ކޭސް 54: ފުލޫ ކްލިނިކަށް ދިޔަ ދިވެއްސެއް. އޭނާގެ ގައިން އަލާމާތްތައް ފެނިފައިވަނީ 18 ވަނަ ދުވަހު. މިއީ ދިވެހި ވިއުގައި މަސައްކަތް ކުރާ މީހެއް.
- ކޭސް 55: އެއްވެސް އަލާމާތެއް ނުފެނޭ. ޓެސްޓު ކުރީ ކޭސް 29އާ ގުޅުންހުރި މީހެއް ކަމަށްވަތީ. އޭނާ މިވަގުތު ހުރީ އައިސޮލޭޝަން ފެސިލިޓީއެއްގައި.
- ކޭސް 56: މިއީ 34 ވަނަ ކޭސްގެ ކޮންޓެކްޓަށް ވާތީ ޓެސްޓުކުރި އިރު ވައިރަސްއަށް ޕޮޒިޓިވްވެފައި. މިވަގުތުހުރި ފެސިލީޓީގައި.
- ކޭސް 57: ކޭސް 29އާ ގުޅުންހުރި ފަރާތެއް. އެއްވެސް އާލާމާތެއް ނުފެނޭ. އައިސޮލޭޝަންގައި ހުރެފައި ޓެސްޓު ކުރިއިރު ނަތީޖާ ޕޮޒިޓިވް.
- ކޭސް 58: ފުލޫ ކްލިނިކަށް ދިޔަ ދިވެއްސެއް. މިމަހުގެ 19 ވަނަ ދުވަހު އަލާމާތްތައް ފެނިގެން ޓެސްޓުކުރިއިރު ޕޮޒިޓިވްފައި.
- ކޭސް 59 އަދި 60: މިއީ ބަގްލަދޭޝްގެ ދެމީހުން. މިދެމީހުންނަކީ އިހުސާން ފިހާރާގައި މަސައްކަތް ކުރާ ދެމީހުން.
ހޯމަ ދުވަހު މާލެސިޓީން 08 މީހަކު ޕޮޒިޓިވްވެފައި ވާއިރު، މިހާރު ޖުމްލަ މިއަދަދު 60 ށް އަރާފައެވެ. އަދި ކުރިއަށް އޮތް 14 ދުވަހުގެ ތެރޭގައި ރާއްޖޭއިން އިތުރު ކޭސްތައް ފެންނާނެ ކަމަށް ޑޮކްޓަރުންގެ ޓީމުން ހާމަކުރެއެވެ.
