މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) އާ ގުޅިގެން އޭއެފްސީ ކަޕާއި އޭއެފްސީ ޗެމްޕިއަންސް ލީގުގެ މެޗުތައް މުއްދަތެއް ނެތް ގޮތަށް ފަސްކުރަން އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ނިންމައިފި އެވެ.

އޭއެފްސީން އެންމެ ފުރަތަމަ މިދިޔަ މަހުގެ 18 ވަނަ ދުވަހު ނިންމީ މި މަހު ކުޅެން ހުރި މެޗުތައް ފަސްކުރުމަށެވެ. އެކަމަކު އަންގާރަ ނެރުނު ބަޔާނެއްގައި ބުނެފައިވަނީ އަންނަ މަހާއި ޖޫން މަހު ވެސް މެޗުތައް ކުރިއަށްގެންދެވޭނެ މާހައުލެއް އޮންނާނެ ކަމަށް ނުބެލެވޭތީ، އޭއެފްސީ ކަޕާއި އޭއެފްސީ ޗެމްޕިއަންސް ލީގުގެ މެޗުތައް މުއްދަތެއް ނެތްގޮތަށް މެޗުތައް ފަސްކޮށްފައިވާ ކަމަށެވެ.

އޭއެފްސީ ކަޕްގެ މެޗުތައް މުއްދަތެއް ނެތް ގޮތަށް ފަސްކުރިއިރު، އޭއެފްސީ ކަޕްގެ ދެކުނު އޭޝިއާގެ ގައުމުތަކަށް ހާއްސަ ގްރޫޕްގައި މި ފަހަރު ރާއްޖޭގެ ދެ ޓީމެއް ވާދަކުރެ އެވެ. އެއީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބެވެ.

ކޮވިޑް-19 އާ ގުޅިގެން އޭއެފްސީ ކަޕްގެ މެޗުތައް ފަސްކުރިއިރު، މި މަހު މި މުބާރާތުގައި މާޒިޔާ އާއި ޓީސީ، މާލޭގައި ދެ މެޗު ކުޅޭ ގޮތަށް އޮތީ ތާވަލުކޮށްފައެވެ. ޓީސީން އިންޑިއާގެ ޗެންނާއީ ސިޓީ އެފްސީއާ ދެކޮޅަށް މާލޭގައި ނުކުންނަށް ހަމަޖެހިފައި އޮތްއިރު، މާޒިޔާ ބައްދަލުކުރާން އޮތީ ބަންގްލަދޭޝްގެ ބަޝުންދުރާ ކިންގްސްއާ އެވެ.

މީގެ ކުރިން އޭއެފްސީ ކަޕްގެ ގްރޫޕް ސްޓޭޖުގެ ފުރަތަމަ މެޗުގައި މާޒިޔާ އާއި ޓީސީ ވަނީ މިދިޔަ މާޗް މަހު 12 ވަނަ ދުވަހު ވާދަކޮށްފަ އެވެ. އެ ދުވަހު ޓީސީ ނުކުތީ ބަންގްލަދޭޝްގައި އެ ގައުމުގެ ބަޝުންދުރާ ކިންގްސްއާ ދެކޮޅަށެވެ. އަދި އިންޑިއާގެ ޗެންނާއީގައި މާޒިޔާ ވަނީ އެ ގައުމުގެ ޗެންނާއީ ސިޓީއާ ދެކޮޅަށް ކުޅެފަ އެވެ.

ޗެންނާއީއާ ދެކޮޅަށް ކުޅުމަށް ފަހު މާޒިޔާ ވަނީ އެނބުރި މާލެ އައިސްފައިވާއިރު، ޓީސީ ޓީމު މިވަގުތު ތިބީ ކަރަންޓީނުގައެވެ. ބަންގްލަދޭޝްގެ މެޗު ނިންމާލުމަށް ފަހު ލަންކާގައި 24 ދުވަސް ވަންދެން ކަރަންޓީނުގެ މުއްދަތު ހޭދަކުރުމަށްފަހު ޓީސީ ރާއްޖެ އައިރު، ޓީސީ މި ވަގުތު އަންނަނީ ރާއްޖޭގައި ވެސް ކަރަންޓީނު މުއްދަތެއް ފުރިހަމަކުރަމުންނެވެ. އެގޮތުން 14 ދުވަހަށް ޓީސީ ކަރަންޓީނުކޮށްފައިތިބީ ފުރަވެރި ރިސޯޓުގަ އެވެ.

ކޮވިޑް-19 އާ ގުޅިގެން ދުނިޔޭގެ ފުޓްބޯޅަ ހަރަކާތްތައްވެސް ހުއްޓުމަކަށް އައިސްފައިވާއިރު، ރާއްޖެއިންވެސް މީގެ ކުރިން ވަނީ 2019/2020 ވަނަ އަހަރުގެ ސީޒަނުގެ ބާކީބައި ކެންސަލް ކޮށްފައެވެ. އެގޮތުން އެފްއޭއެމުން ވަނީ އެފްއޭ ކަޕާއި ޕްރެޒިޑެންޓްސް ކަޕް ކެންސަލްކޮށްފައެވެ. އެފްއޭ ކަޕް ކެންސަލްކުރީ ކުއާޓާ ފައިނަލް މެޗުތައް ކުޅުނު ފަހުންނެވެ.