ކޮރޯނާވައިރަސް (ކޮވިޑް-19) ގެ ސަބަބުން މެދު ކަނޑާލައިފައިވާ އިޓާލިއަން ލީގުގެ މެޗުތައް ކެންސަލް ނުކޮށް، ހާލަތު ތަންދިނުމުން ކުރިޔަށް ގެންދާނެ ކަމަށް އިޓާލިއަން ފުޓްބޯލް ފެޑަރޭޝަނުގެ ރައީސް ގެބްރިއަލީ ގްރަވީނާ ވިދާޅުވެއްޖެއެވެ.

ގްރަވީނާ މިހެން ވިދާޅުވީ އިޓަލީގެ ލާޒިއޯއިން ހާލަތުތަން ދިނުމުން ލީގު ކުރިޔަށް ގެންދިޔުމަށް ގޮވާލައިފައިވަނިކޮށް، އިޓަލީގެ ބްރެޝިއާއިން ލީގު ކުރިޔަށް ގެންދާނަމަ އިތުރަށް ހުރި މެޗުތަކުގައި ނުކުޅޭނެ ކަމަށް ބުނެފައިވަނިކޮށެވެ.

ގްރަވީނާ ވިދާޅުވީ އިޓާލިއަން ލީގުގެ މެޗުތައް ކުޅުމަށް ހާލަތު ތަންދިންހާ އަވަހަށް ލީގު ފަށާނެ ކަމަށާއި، ލީގު މެދުކެނޑިފައި މިއޮތް ވަގުތު އެއްވެސް ކްލަބަކުން އެކަމުގެ ފައިދާ ނެގިޔަނުދޭނެ ކަމަށެވެ. ނަަމަވެސް މިހާރުވެސް ބައެއް ކްލަބްތަކުން ލީގު މެދުކަނޑާލައިފައިވާއިރު އެކަމުގެ ފައިދާ ނެގުމަށް މަސައްކަތް ކުރަމުން އަންނަ ކަމަށް ފާހަގަވެފައިވާ ކަމަށްވެސް ގްރަވީނާ ވިދާޅުވިއެވެ.

ގްރަވީނާ އިތުރަށް ވިދާޅުވީ ކްލަބްތަކަށް ކޮވިޑް-19 ގެ ސަބަބުން ލިބޭ މާލީ ގެއްލުންތަކުން އަރައިގަތުމަށް އިޓަލީގެ ފުޓްބޯޅަ ފެޑަރޭޝަނުން އެހީވާނެ ކަމަށާއި އުންމީދަކީ އެއްވެސް ކްލަބެއް ބަނގުރޫޓުނުވެ ހިންގުން ކަމަށެވެ.

އިޓާލިއަން ލީގުގެ މެޗުތައް މުއްދަތެއް ނެތްގޮތަށް ފަސްކޮށްފައިވާއިރު، އިޓަލީގެ ސަރުކާރުން ވަނީ މެއި މަހުގެ 3 ގެ ނިޔަލަށް އެއްވެސް ކުޅިވަރު ހަރަކާތެއް އިޓަލީގައި ބޭއްވުން މަނާ ކޮށްފައެވެ.

އިޓާލިއަން ލީގު މެދުކަނޑާލިއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކު އެވެ. ދެވަނައިގައި އޮތް ލާޒިއޯއަށް 26 މެޗުން ވަނީ 62 ޕޮއިންޓު ލިބިފައެވެ.

އިޓަލީން މިހާތަނަށް ކޮވިޑް-19 އަށް 156,00 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، މިބަލީގައި އެގައުމުން 19،800 އަށްވުރެ ގިނަ މީހުން ވަނީ މަރުވެފައެވެ.