އިނގިރޭސި ޕްރިމިއާ ލީގުގެއި ކުޅެމުން އަންނަ ކުޅުންތެރިންގެ މުސާރަ ކުޑަކުރުމަށް ކްލަބްތަކުން މަސައްކަތް ކުރަމުން އަންނައިރު، އެކަމާ އިންގްލެންޑް ގައުމީ ފުޓުބޯޅަ ޓީމުގެ ކުރީގެ ކެޕްޓަން ރޫނީ ނުރުހުން ފާޅުކޮށްފިއެވެ.

ރޫނީ އެކަމާއި ނުރުހުން ފާޅުކުރިއިރު، އިނގިރޭސި ކްލަބުތަކުން އަންނަނީ ކުޅުންތެރިންގެ މުސާރައިން 30 އިންސައްތަ އުނިކުރުމަށް މަސައްކަތްކުރަމުންނެވެ.

އިނގިރޭސި މީޑިއާއަކަށް ދިން އިންޓަވިއުއެއްގައި އުމުރުން 34 އަހަރުގެ ވޭން ރޫނީ ބުނީ ކުޅުންތެރިންގެ މުސާރައިން 30 އިންސައްތަ އުނިކުރުމަށް ކްލަބުތަކުން ކުޅުންތެރިންނަށް ޕްރެޝަރު ކުރަމުން އަންނަ ކަމަށާއި ހުރިހާ ކްލަބަކުން މިގޮތަށް އެއްބަސްވާނަމަ އެކަމުގައި ކުޅުންތެރިން ކުރާނެ މާބޮޑު ކަމައް ނޯންނާނެ ކަމަށެވެ.

މީގެއިތުރުން ރޫނީ ބުނީ ކުޅުންތެރިންގެ މުސާރައިން 30 އިންސިއްތަ އުނިކުރަން އުޅެނީ ކްލަބުތައް މާލީ ގޮތުން ވެއްޓިދާނެ އަނދަވަޅަކުން އަރައިގަތުމަށް ކަމަށް ކިޔާފައި ކަމަށާއި އެކަމުގެ ފަހަތުގައިވާ ހަގީގަތެއް އެއްވެސް މީހަކަށް ސާފުނުވާ ކަމަށެވެ.

ރިޕޯޓުތައް ބުނާ ގޮތުން ޕްރިމިއާ ލީގުގެ ކުޅުންތެރިންގެ މުސާރައިން ވަރަށް އަވަހަށް 30 އިންސައްތަ އުނިކުރާނެ އެވެ. އެކަމަކު ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ވަނީ އެކަމަށް ދެކޮޅު ހަދާފައެވެ. އެ ޔޫނިއަނުން ބުނީ ކުޅުންތެރިންގެ މުސާރައިން 30 އިންސައްތަ އުނިކުރުމުން، ކްލަބުތަކަށް ޖުމްލަ 500 މިލިއަން ޔޫރޯ އެއްކުރެވޭ ކަމަށެވެ. އެއާއެކު އިނގިރޭސިވިލާތުގެ ސަރުކާރަށް ދައްކަން ޖެހޭ ޓެކްސް ފައިސާއިން 200 މިލިއަން ޔޫރޯ މަދުވާނެ ކަމަށްވެސް ވަނީ ބުނެފައެވެ. އަދި މިއާއެކު އެކަމުގެ ސަބަބުން ބައެއް ކްލަބުތަކުން ނާޖައިޒު ފައިދާ ނަގަން މަސައްކަތް ކުރާނެ ކަމަށްވެސް ވަނީ ބުނެފައެވެ.