ޗައިނާގެ އެންމެ މުއްސަނދި ވިޔަފާރިވެރިޔާ، އަދި އަލީބާބާ ގްރޫޕްގެ ފައުންޑަރ ޖެކް މާ، ރާއްޖެއާއި އޭޝިއާގެ ގިނަ ގައުމުތަކަށް ކޮވިޑް-19 އާއި ގުޅިގެން ގިނަ އަދަދެއްގެ އެމެޖެންސީ ކިޓް ފޯރުކޮށްދިނުމަށް ނިންމައިފިއެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާއި ގުޅިގެން ގިނަ ގައުމުތަކަށް ޗައިނާއިން އެހީތެރިވަމުން އަންނައިރު، ދުނިޔޭގެ އެންމެ މުއްސަނދި މީހުންގެ ލިސްޓުގައި 20 ވަނައިގައިވާ އަދި ޗައިނާގެ މަޝްހޫރު ވިޔަފާރިވެރިޔާ ޖެކް މާ ކޮށްފައިވާ ޓުވީޓެއްގައި ވިދާޅުވީ، މިކަމާއި ގުޅިގެން އޭޝިއާގެ ގައުމުތަކަށް އެހީވުމަށް ނިންމާފައިވާކަަމަށެވެ.

އެގޮތުން، އަފްޢާނިސްތާން، ބަންގްލަދޭޝް. ކެމްބޯޑިއާ، ލާއޮސް، މޮންގޯލިއާ ، މިޔަންމާރ, ނޭޕާލް, ޕާކީސްތާން، ސްރީލަންކާ އަދި ރާއްޖެ ހިމެނޭގޮތަށް 1.8 މިލިއަން މާސްކާއި 210،000 ޓެސްޓް ކިޓާއި 36،000 ޕްރޮޓެކްޓެކްޓިވް ސޫޓުގެ އިތުރުން ވެންޓިލޭޓަރާއި އަދި ތާމޯމީޓަރ ހަދިޔާކުރުމަށް ނިންމާފައިވާކަމަށް ޖެކް މާ ވަނީ ވިދާޅުވެފައެވެ.

ޖެކް މާ ވަނީ ގިނަ ގައުމުތަކަށް އެމެޖެންސީ ކިޓްތައް ފޯރުކޮށްދިނުމުގައި ލަސްތަކެއް އުޅުނުކަމުގައިވިޔަސް އެތަކެތި ވީހާވެސް އަވަސް މުއްދަތެއްގައި ފޯރުކޮށްދިނުމުގެ ޔަގީންކަން ދެއްވާފައެވެ. ޖެކް މާގެ މި އެހީގެ އިތުރުން، ޗައިނާގެ އެންމެ ވަރުގަދަ އެއް ކޮންސްޓްރަކްޝަން ކުންފުނި، ބެއިޖިންގ އާރބަން ކޮންސްޓްރަކްޝަން އިންވެސްޓްމެންޓް ޑިވޮލޮޕްމެންޓް (ބީޔޫސީޖީ) އިން މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) އަށް 50 އިލޮކްޓޮރޯނިކް ފޭސްމާސްކް ހަދިޔާކޮށްފައެވެ.

ކޮވިޑް-19 އާ ގުޅިގެން ރާއްޖެއަށް އެހީ ފޯރުކޮށްދިނުމުގެ މަޝްވަރާތައް ދިވެހި ސަރުކާރާއެކު ކުރިޔަށްދާ ކަމަށް ޗައިނާގެ ސަފީރު ޒަންގް ލީ ޒޮންގް ވަނީ މީގެ ކުރިން ވިދާޅުވެފައެވެ. އަދި ޗައިނާ އާއި ރާއްޖޭގެ ހާލަތާ ގުޅިގެން، ރާއްޖޭގެ ކެބިނެޓުގައި ހިމެނިވަޑައިގަންނަވާ ވަޒީރުންނާއެކު ގާތުން މުއާމަލާތް ކުރެވެމުންދާ ކަމުގެ ޔަގީންކަން ސަފީރު ވަނީ އަރުއްވާފައެވެ.