ކަނާތު ކަކުލަށް ލިބުނު އަނިޔާއާ ގުޅިގެން، މާޒިޔާ ސްޕޯޓްސް އެންޑް ރެކްރިއޭޝަނުގެ ކެޕްޓަން އަސަދުﷲ އަބްދުﷲ ކަކުލުގެ އޮޕަރޭޝަނެއް ކޮށްފި އެވެ.

އަސަދުﷲ އަށް އަނިޔާވީ އޭއެފްސީ ކަޕްގެ ޕްލޭއޮފްގެ ފުރަތަމަ ލެގުގައި ފެބްރުއަރީ މަހުގެ 19 ވަނަ ދުވަހު މާލޭގައި އިންޑިއަން ސުޕަ ލީގުގެ ޗެމްޕިއަން ބެންގަލޫރު އެފްސީ އަތުން މާޒިޔާ މޮޅުވި މެޗުގައެވެ. އެ މެޗުގެ ނުވަވަނަ މިނެޓުގައި އަސަދުﷲ އަށް އަނިޔާވުމުން އޭނާ ވަނީ ދަނޑުން ބާލާފައެވެ.

އަނިޔާއާ ގުޅިގެން ބުރާސްފަތި ދުވަހުގެރޭ އަސަދުﷲ ވަނީ އޭޑީކޭ ހޮސްޕިޓަލުން ކަކުލުގެ އޮޕަރޭޝަނެއް ކޮށްފައެވެ. މާޒިޔާގެ އޮފިޝަލަކު ބުނީ ކަނާތު ކަކުލަށް ލިބުނު އަނިޔާއިން ރަނގަޅުވުމަށްފަހު އަސަދުﷲ އަށް ދެން އެނބުރި ކުޅުމުގެ ތެރެއަށް އާދެވޭނީ 6 ނުވަތަ 7 މަސް ފަހުން ކަމަށެވެ.

މިއީ ތިން އަހަރުގެ ތެރޭ އަސަދުﷲ ގެ ކަކުލަށް ލިބުނު ދެވަނަ އަނިޔާއެވެ. މީގެ ކުރިން 2017 ވަނަ އަހަރު ވާތު ކަކުލަސް އަނިޔާވިއިރު، އެ އަނިޔާއިން ރަނގަޅުވުމަށްވެސް އޭނާ ވަނީ އޮޕަރޭޝަނެއްވެސް ކޮށްފައެވެ. އެ އޮޕަރޭޝަނަށްފަހު އަސަދުﷲ އެނބުރި ކުޅުމުގެ ތެރެއަށް އައީ 9 މަސް ފަހުންނެވެ.

އަސަދުﷲ އަށް އަނިޔާވިއިރު، މާޒިޔާ އަންނަނީ އޭއެފްސީ ކަޕްގެ ގްރޫޕް ސްޓޭޖުގައި ވާދަކުރަމުންނެވެ. އެގޮތުން ރަށުން ބޭރުގައި ކުޅުނު ފުރަތަމަ މެޗުން މާޒިޔާ ވަނީ އިންޑިއާގެ ޗެންނާއީ ސިޓީ އެފްސީއާ 2-2 އިން އެއްވަރުކޮށްފައެވެ.

އަސަދުﷲގެ އަނިޔާއާއެކު މާޒިޔާއިން ވަނީ އޭއެފްސީ ކަޕްގެ ގްރޫޕް ސްޓޭޖުގެ މެޗުތައް ފެށުމުގެ ކުރިން، ދެވަނަ ޑިވިޝަން ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި އާދަމް ނިޒާމް (ކިތުނަ) އެޓީމަށް ގެނެސްފައެވެ.