ފީފާ ކްލަބު ވޯލްޑް ކަޕް ފަސްކުރަން ފީފާއިން ނިންމައިފި އެވެ.

މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް އަންނަ އަހަރަށް ފަސްކުރަން ޔުއެފާ އާއި ކޮންމެބޯލް އިން ވަނީ ނިންމާފައެވެ. ޗައިނާގައި އަންނަ އަހަރު ބާއްވަން ފީފާއިން ތާވަލުކުރި ކްލަބު ވޯލްޑް ކަޕަކީ، މިހާރު އެ މުބާރަތް ބާއްވާ އުސޫލަށް ބަދަލުގެނެސް، ގިނަ ޓީމުތަކެއް ބައިވެރިކޮށް ބާއްވަން ރޭވި މުބާރާތެކެވެ.

އަންނަ އަހަރު ޔޫރޯ އާއި ކޮޕަ އެމެރިކާ ކުރިއަށްދާނެތީ، ބުދަ ދުވަހު ޓެލެކޮންފަރެންސް މެދުވެރިކޮށް ބޭއްވި ފީފާ ކައުންސިލް ބައްދަލުވުމުގައި ވަނީ ކްލަބު ވޯލްޑް ކަޕް ފަސްކުރަން ނިންމާފައެވެ. ދެން ކްލަބު ވޯލްޑް ކަޕް ބާއްވާނެ ތާރީޚެއް ފަހުން ކަނޑައެޅުމަށްވެސް ވަނީ ނިންމާފައެވެ.

ޔޫރަޕްގެ ގިނަ ގައުމުތަކުން ކޮރޯނާ ވައިރަސް ފެނިފައިވާއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް މިހާރު ވަނީ މެދު ކަނޑާލާފައެވެ. އެގޮތުން އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ފްރެންޗް ލީގުގެ އިތުރުން ޖަރުމަން ލީގުގެ މެޗުތައް ވަނީ ފަސްކޮށްފައެވެ. އަދި ޔުއެފާ ޗެމްޕިއަންސް ލީގާއި ޔޫރޮޕާ ލީގުވެސް ވަނީ ފަސްކޮށްފައެވެ. މިއަހަރުގެ ހޫނު މޫސުމުގައި ބެއްވުމަށް ހަމަޖެހިފައި އޮތް ޔޫރޯ އާއި ކޮޕަ އެމެރިކާ ފަސްކުރުމާއެކު، ލީގު މެޗުތައް ފުރިހަމަ ކުރުމުގެ ފުރުސަތު ލިބިގެންދާނެ އެވެ.

ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިރު، މި ވައިރަސް ޖެހުނު މީހުންގެ އަދަދު 220،313 އަށް މިހާރު ވަނީ އަރާފައެވެ. އަދި މި ބަލީގައި 8،982 މީހުން ވަނީ މަރުވެފައެވެ.