މާލެ ސަރަހައްދު ހުއްޓުމަކަށް ގެނެސް، މާލެ ލޮކްޑައުން ނުވަތަ ބަންދުކުރާ ވާހަކަތައް ސަރުކާރުން ދޮގުކޮށްފިއެވެ.

ބުދަ ދުވަހުގެރޭ ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ މާލެ ''ލޮކްޑައުން'' ކުރަން އުޅޭ ކަމަށް ދެކެވޭ ވާހަކައަކީ ދޮގެއް ކަމަށެވެ.

މާލެ ''ލޮކްޑައުން'' ކުރަނީ ކަމަށް ބުނެ ބައެއް ފަރާތްތަކުން ދަނީ ގޭގެއަށް ބޮޑެތި އަދަދުތަކުން ފިހާރަތަކުން އެއްޗެހި ގަންނަމުންނެވެ. ގަނޑުކޮށް އެއްޗެހި ނުގަތުމަށް ސަރުކާރުން ދަނީ ތަކުރާރުކޮށް ހުރިހާ ރައްޔިތުންނަށް އިލްތިމާސް ކުރަމުންނެވެ.

މިމައްސަލައަށް އިޝާރާތްކުރައްވައި މަބްރޫކް ވިދާޅުވީ، އަސާސީ ބޭނުންތަކަށް ބޭނުންވާ އަދަދަށް ތަކެތި ރާއްޖޭގައި އެބަހުރި ކަމަށެވެ. އަދި ރާއްޖެއިން ބޭރުން ރާއްޖެއަށް ބޭނުންވާ މުދާ ގެނައުމުގައި ދަތިތަކެއް ނޫޅޭ ކަމަށެވެ.

މާލެ ލޮކްޑައުންކޮށްފިނަމަ ދިމާވާނެ ދަތިތަކާ ބެހޭ ގޮތުން މީގެ ކުރިން މަބްރޫކް ވިދާޅުވެފައިވަނީ އާބާދީ ބޮޑު މާލެ ފަދަ ސިޓީތަކުގެ ފިހާރަތަކާއި، ހޮޓާތަކާއި، ވިޔަފާރިތައް ބަންދުކޮށްފިނަމަ، ޒަރޫރީ ބޭނުންތައް ފުއްދަން ރައްޔިތުންނަށް ވަރަށް ދަތިވެގެންދާނެ ކަމަށެވެ. ކާބޯތަކެތި ފަދަ ޒަރޫރީ ހިދުމަތްތައް ފޯރުކޮށްދެވޭނީ މާލެ ފަދަ ސިޓީތައް ހިންގައިގެންކަމަށް މަބުރޫކް ވިދާޅުވިއެވެ.

މާލެ ސިޓީ ލޮކްޑައުން ނުކުރި ނަމަވެސް މިބަލިން ރައްކާތެރިވުމަށް ސަރުކާރުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން މިމަހުގެ 12 ވަނަ ދުވަހުން ފެށިގެން 30 ދުވަހަށް ކުއްލި ނުރައްކަލުގެ ހާލަތު އިއުލާން ކޮށްފައިވާއިރު، ރިސޯޓްތަކުން މީހުން ދިރިއުޅޭ ރަށްރަށަށް މީހުން ދިޔުން ވަނީ މަނާކޮށްފަ އެވެ. އަދި އާންމުން ދަތުރުކުރާ ފެރީތަކުގައި ބިދޭސީން ދަތުރު ކުރުން ވެސް ވަނީ މަނާކޮށް، ގެސްޓް ހައުސްތަކަށް ގެސްޓުން ގެނައުން ވެސް ވަނީ ހުއްޓުވާފައެވެ.

މީގެ އިތުރުން ސަރުކާރު އޮފީސްތައް މިމަހުގެ 19 އިން 26 އަށް ވަނީ ބަންދުކޮށްފައެވެ. އަދި ސްކޫލްތަކާއި ކޮލެޖް އަދި ޔުނިވާސިޓީތައް ވެސް ވަނީ ބަންދުކޮށްފައެވެ. މީގެ ތެރޭގައި ގުރުއާން ކްލާސްތަކާއި ޓިއުޝަން ކްލާސްތައް ވެސް ހިމެނެއެވެ.

ކުޅިވަރުކުޅޭ ކޯޓުތަކާއި، ދަނޑުތަކުގެ އިތުރުން މީހުން އެއްވެސް އުޅޭ ސަރަހައްދުތަކަށް ނުދިއުމަށް އިލްތިމާސްކޮށްފައިވާއިރު، ސިނަމާތައް ވަނީ ބަންދުކޮށްފައެވެ. އަދި މާލެ ސިޓީގެ ޕާކުތައް ވެސް ވަނީ ބަންދުކުރެވިފައެވެ.

ރާއްޖެއިން މިހާތަނަށް 13 މީހަކު ވަނީ ޕޮޒިޓިވްވެފައެވެ. އެއީ އިޓަލީއިން 09 މީހުން، ފްރާންސް 02 މީހުން ، ތުރިކީން 01 އަދި އިނގިރޭސިވިލާތުން އެކަކު ހިމެނެއެވެ. އަދި މިއެންމެންގެ ހާލު ރަނގަޅުވަމުންދާ ކަމަށް އެޗްޕީއޭއިން މައުލޫމާތުދެއެވެ.