ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އާއި ގުޅިގެން ކަމާބޭހޭ ފަރާތްތަކުން އަޅާމުންދާ ފިޔަވަޅުތަކާ ހިލާފުވާ ފަރާތްތަކުގެ މައުލޫމާތު ހިއްސާކޮށްދިނުމަށް ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) އިން އެދިއްޖެ އެވެ.

އެންއީއޯސީން ބުދަ ދުވަހުގެ މެންދުރުފަހު، ބޭއްވި ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ، އާންމު ސިއްޙަތު ރައްކައުތެރިވުމުގެ ޤާނޫނުގެ 34 ވަނަ މާއްދާގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ޤާނޫނީ ބާރުގެ ތެރެއިން، އާންމު ސިއްހީ ނުރައްކަލިގެ ހާލަތު އިއުލާންކޮށް، އަޅާފައިވާ ފިޔަވަޅާކާ ނުވަތަ އަންގާފައިވާ އެންގުންތަކާ ހިލާފުވާނަމަ، އެކަން ފުލުހުންނަށް ނުވަތަ އެންއީއޯސީއަށް ހިއްސާކުރުމަށް އެދިވަޑައިގަންނަވާ ކަމަށެވެ. އެގޮތުން ކޮވިޑް-19ގެ އަލާމާތެއް ނުވަތަ ޝައްކުވާ މީހެއް، ގޭގައި (ހޯމް ކަރަންޓީން) މަޑުކުރަން އަންގާފައިވާ ފަރާތެއް ގެއިން ނިކުމެއްޖެނަމަ، އެކަން އެނގޭ ފަރާތެއްހުރިނަމަ، އެކަން ފުލުހުންނަށް ރިޕޯޓް ކުރުމަށް މަބްރޫކް އެދިލެއްވި އެވެ.

ގޭގައި މަޑުކުރަން، ނުވަތަ ގެއިން ނިކުތުން މަނާކޮށްފައިވާ މީހުން، ބޭރުތަރޭގައި އުޅޭކަމުގެ ޝަކުވާތައް ބައެއް ފަރާތްތަކުން ދަނީ ކުރަމުން ނެވެ.

މީގެއިތުރުން މަބްރޫކް ވަނީ ކޮވިޑް-19 އަށް ޝައްކުކުރެވޭ، އަލަށް ނެގުނު ތިން މީހެެއްގެ މައުލޫމާތުވެސް މީޑިއާތަކަށް ހިއްސާކޮށްދެއްވާފަ އެވެ. އެގޮތުން މެލޭޝިއާއިން އައި މީހަކާއި އިންޑިއާއިން އައި މީހެއް ކޮވިޑް-19 އަށް ޝައްކުކުރެވިގެން ސާމްޕަލް ނެގިފައިވާ ކަމަށެވެ. އެ ދެ މީހުންނަކީ އައްޑޫ ސިޓީ މަރަދޫ ދެ މީހުން ކަމަށާއި އަދި އިންޑިއާއިން އައި ތ. ގުރައިދޫ މީހެއްގެ ސާމްޕަލްވެސް ނެގިފައިވާ ކަމަށް މަބްރޫކް ވިދާޅުވި އެވެ.

މަބްރޫކް ވިދާޅުވީ އިންޑިއާ އާއި ބަންގްލަދޭޝްއިން މީހުން އައުން މަނާކޮށްފައި ނުވަނީ، މީހުން އައުން މަނާކޮށްފައިވާ އެހެން ގައުމުތަކާއި އެ ދެ ގައުމުގައި ކޮވިޑް-19 ފެތުރެމުންދާ ހާލަތަށް ބާލަފަ ކަމަށެވެ. އަދި ބަންގްލަދޭޝްއިން އަންނަ ދިވެހިން ގޭގައި ސެލްފް ކަރަންޓީން (ގޭގައި މަޑުކުރަން) އަންގާފައިވާނެ ކަމަށާއި ބަންގްލަދޭޝް މީހުން ލޭބަރުންގެ ގޮތުގައި އަދި ޗުއްޓީގައި ބަންގްލަދޭޝްގައި ތިބި މީހުންނަށް ރާއްޖެއައުން މަޑުޖައްސާލާފައި ވާކަމަށެެވެ.

މީގެއިތުރުން ޑރ. މޫސާ މުރާދު ވިދާޅުވީ، ކޮވިޑް-19 އަށް ޕޮޒިޓިވްވި 13 މީހުންގެ ހާލަތުވެސް ވަރަށް ރަނގަޅު ކަމަށާއި ހާއްސަކޮށް، ހާލު ބޮޑުވެގެން ދަރުމަވަންތަ ހޮސްޕިޓަލުގެ އައިސީޔޫއިން ފަރުވާ ދޭން ޖެހުނު 70 އަހަރުގެ ފަތުރުވެރިޔާގެ ހާލުވެސް ރަނގަޅު ކަމަށެވެ.