ސްޕެއިންގެ ވެލެންސިއާ ތިން ކުޅުންތެރިންނާއި ދެ އޮފިޝަލުން ކޮރޯނާވައިރަސް (ކޮވިޑް-19) އަށް ޕޮޒިޓިވްވުމާއި އެކު، ޗެމްޕިއަންސް ލީގުގައި މިދިޔަ ހަފްތާގައި އެ ޓީމާއި ދެކޮޅަށް ކުޅުނު އިޓަލީގެ އެޓަލާންޓާގެ ކުޅުންތެރިންނާއި އޮފިޝަލުން ކަރަންޓީނުވެއްޖެ އެވެ.

އެޓަލާންޓާއަކީ އިޓަލީގައި ކޮވިޑް-19 އެންމެ ބޮޑަށް ފެތުރޭ ސަރަހައްދު ލޮމްބާޑީ އަށް ނިސްބަތްވާ ކްލަބެކެވެ. ނަމަވެސް އެޓީމު ކަރަންޓީނުވާން ޖެހުނީ ސްޕެއިންނަށް ކުރި ދަތުރަށްފަހު ސްޕެއިންގެ ވެލެންސިއާގެ ކުޅުންތެރިންނާއި އޮފިޝަލުން ކޮވިޑް-19 އަށް ޕޮޒިޓިވްވުމާއި ގުޅިގެންނެވެ.

އެޓަލާންޓާއިން ވަނީ 3-4 ގެ ނަތީޖާއަކުން ވެލެންސިއާ ބަލިކޮށް ޗެމްޕިއަންސް ލީގުގެ ކުއާޓާ ފައިނަލުން ޖާގަ ހޯދައިފައެވެ. އެ މެޗުގައި ވެލެންސިއާގެ ސްކޮޑުގައި ހިމެނި ކުޅުނު ކުޅުންތެރިންގެ ތެރެއިން ވައިރަހަށް ޕޮޒިޓިވްވީ ހޯސޭ ގަޔާ އެވެ. އަނެއް ދެ ކުޅުންތެރިން، އެޒެކިއުލް ގަރާއީ އަދި އެލިއަކުއިން މަންގާލާ އެ މެޗުގައި ނުކުޅެއެވެ.

ކޮވިޑް-19 އަށް އިޓާލިއަން ލީގުގެ 11 ކުޅުންތެރިން ވަނީ ޕޮޒިޓިވްވެފައެވެ. އޭގެ ތެރޭގައި ޔުވެންޓަސްގެ ޑެނިއެލް ރުގާނީ އާއި ފިއޮރެންޓީނާގެ ޕެޓްރިކް ކުޓްރޯނޭ އާއި ސަމްޕްޑޯރިއާގެ މަނޯލޯ ގަބިއަޑީނީ ހިމެނެއެވެ.

ކޮވިޑް-19 ގެ ސަބަބުން ދުނިޔޭގެ ފުޓުބޯޅަ ހުއްޓުމަކަށް އައިސްފައިވާއިރު، މި ވައިރަސް ޖެހުނު މީހުންގެ އަދަދު މިހާރު ވަނީ 173,316 އަށް އަރައިފައެވެ. އަދި މި ބަލީގައި 6،668 މީހުން ވަނީ މަރުވެފައެވެ.