ދުނިޔޭގައި މިހާރު ހަލުވި ކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް ޕްޒިޓިވްވި މީހުންގެ ތެރޭގައި ކުރެއްދޫ ރިސޯޓް ފިޔަވާ ދެން ޕްޒިޓިވް މީހުންނަކީ އެމީހުން ރާއްޖެއައިއިރުވެސް އެބަލި ހުރި މީހުންކަމަށް ޓާސްކްފޯއިން ބުނެފި އެވެ.

ނޭޝަނަލް އިމަޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ، ކުރެއްދޫ ރިސޯޓުން ކޮރޯނާވައިރަސްއަށް ޕޮޒިޓިވްވި 5 މީހުން އެބައްޔަށް ޕޮޒިޓިވް ވެފައިވަނީ، ސީދާ އެމީހުންގެ ގައިންކަމަށާއި، އަދި މިހާރު ޕޮޒޮޓިވް ވެފައިވާ އަނެއް 8 މީހުންނަކީ ވެސް އެމީހުން ރާއްޖެއައިއިރު، އެބަލި ޖެހިފައިވާ މީހުން ކަމަށެވެ.

މަބްރޫކް ވިދާޅުވީ އާދިއްތަ ދުވަހުގެ 13:00 އާހަމައަށް ކޮންޓެކްޓް ޓްރޭސިންގ ހެދިފައިތިބީ 292 މީހުންގެ ކަމަށާއި ނަމަވެސް އިތުރު ކޮންޓެކްޓް ޓްރޭސިންގ މަސައްކަތްތަކެއް މިހާރުވެސް ކުރެވެމުންދާ ކަމަށެވެ.

މަބްރޫކް ވިދާޅުވީ، ރާއްޖެއަށް ދަތުރުފަތުރު ކުރުން ވަގުތީގޮތުން މަޑުޖައްސާލަން އަންގާފައިވާ ގައުމުތަކުގެ ތެރޭގައި، ބަންގްލަދޭޝް، ޗައިނާ، އިރާން، ސައުތު ކޮރެއާގެ ދެ ޕްރޮވިންސެއް، އިޓަލީ، ސްޕެއިން، ޖަރުމަނުގެ ތިން ސިޓީއެއް އަދި ފްރާންސް ދެ ސިޓީއެއް ހިމެނޭ ކަމަށެވެ.

މަބްރޫކް ވިދާޅުވީ، ބަންގްލަދޭޝާ ދޭތެރޭގައި މިހާތަނަށް އަމަލު ކުރަމުންއައީ ބަންގްލަދޭޝްއިން އަންނަ ނުވަތަ ޓްރާންސިޓް ވުމަށްފަހު އަންނަ މީހެއް ވެއްޖިއްޔާ 14 ދުވަހުގެ ކަރަންޓީންގެ މުއްދަތަކަށް މަޑު ކުރުމަށްފަހުގަ ރާއްޖެ ވަދެވުން ކަމަށެވެ. ނަމަވެސް، ބަންގްލަދޭޝްގައި ތިބި ދިވެހިން ރާއްޖެއަށް ދަތުރުކުރާއިރުގަ އެމީހުންނަށް ރާއްޖެއައިސް ވަދެވޭނެ ކަމަށާއި އަދި އެމީހުން ތިބެންޖެހޭނީ 14 ދުވަހުގެ ހޯމް އައިސޮލޭޝަންގަ ކަމަށް މިހާރު ޓާސްކްފޯސްއިން ނިންމާފައިވާ ކަމަށެވެ.