އެޑިޔުކޭޝަން މިނިސްޓްރީން ޕީއެސްއެމްގެ ޔެސް ޗެނަލްގެ މެދުވެރިކޮށް ޓެލެ ކްލާސް ޕްރޮގްރާމް ފަށައިފިއެވެ.
އާދިއްތަ ދުވަހު އެޑިޔުކޭޝަން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އައިޝަތު އަލީ ވިދާޅުވީ ޕީއެސްއެމްގެ ޔެސް ޗެނަލް މެދުވެރިކޮށް އާދިއްތަ ދުވަހު ފެށި ޓެލެ ކްލާސް ޕްރޮގްރާމަކީ ގްރޭޑް 10 ގެ ކުދިންނަށާއި އޭ.އެސް ލެވެލް އިމްތިހާންގައި ބައިވެރިވާ ދަރިވަރުންނަށް ޚާއްސަ ޕްރޮގްރާމެއް ކަމަށެވެ.
މިނިސްޓަރު އައިޝަތު ވިދާޅުވީ ކުދިންނަށް ގްރޭޑް 10ގެ ކުދިންގެ ކްލާސްތައް ފަށާފައިވާއިރު، މާދަމާ ގްރޭޑް 11 ގެ ކުދިންގެ ކްލާސްތައް ފެށޭނެ ކަމަށެވެ.
މިނިސްޓަރު އައިޝަތު ވިދާޅުވީ މިޕްރޮގްރާމްގެ ޒަރިއްޔާއިން ދަރިވަރުންނަށް ހުރިހާ ފިލާވަޅެއް ނަގާދެވޭނެ ކަމަށާއި، އެދުވަހެއްގެ ޓައިމް ޓޭބަލް ޓްވީޓަރ އާއި ފޭސްބުކްގެ އިތުރުން އެކި ވާސީލަތައް މެދުވެރިކޮށް ސްކޫލުތަކުން އޭގެ މައުލޫމާތު ބެލެނިވެރިންނާ ހިއްސާކުރަމުންދާ ކަމަށެވެ.
މިޕްރޮގްރާމް ރޭވިފައިވާ ގޮތުން ކޮންމެ ދުވަހެއްގެ ވެސް 08 އަކުން 02 އަކަށް ހަމަޓީޗަރުން ފިލާވަޅުތައް ނަންގަވާ ދެއްވަމުން ގެންދަވާނެ. ކުރީބައިގަ އަޅުގަނޑުމެން މީގެ ރިކޯޑިން ހަދާފަ ހުންނާނީ. ދެން ދަރިވަރުން ގޭގައި ތިބެގެން ފިލާވަޅުތައް ކިޔަވަމުން ގެންދާނީ.އެޑިޔުކޭޝަން މިނިސްޓަރު ޑރ.އައިޝަތު އަލީ
މިނިސްޓަރު ވިދާޅުވީ ހެނދުނު 8:00 އިން މެންދުރުފަހު 14:00 އަށް ކްލާސްތައް ކުރިއަށްދާއިރު، ދަރިވަރުންނަށް ސުވާލުކުރުމުގެ ފުރުސަތު ލިބޭނެ ކަމަށެވެ. ދަރިވަރުންނަށް ޓީޗަރުންނާއެކު އިންޓަރެކްޓް ސެޝަންތައް ކުރިއަށްގެންދާނެކަން މިނިސްޓަރު ފާހަގަކުރެއްވިއެވެ.
އެޑިޔުކޭޝަން މިނިސްޓްރީން ބުނީ ރިކޯޑްކުރެވިގެން ކުރިއަށްގެންދާ މިކްލާސްތައް ޔޫޓިއުބް، ފޭސްބުކް އަދި ޕޯޓަލް މެދުވެރިކޮށް ވެސް ލިބޭނެ ކަމަށެވެ.
މީގެ އިތުރުން އެޑިޔުކޭޝަން މިނިސްޓްރީން ސްކޫލުތައް އިތުރު ހަފްތާއަކަށް ނުވަތަ މިހާލަތު އިތުރަށް ދަމަހައްޓަންޖެހިއްޖެ ހާލަތެއްގައި އެހެން ގްރޭޑްތަކުގެ ދަރިވަރުންނަށް ފިލާވަޅު ފޯރުކޮށްދިނުމުގައި އަމަލުކުރާނެ ގޮތުގެ އުސޫލެއް އަދި ދަރިވަރުންނަށް ކިޔަވައިދިނުމުގެ މަސައްކަތް ކުރިއަށް ގެންދާނެ ގޮތުގެ ސްކީމެއް ތައްޔާރުކުރުމުގެ މަސައްކަތް ޓީޗަރުން ކުރަމުންދާ ކަމަށެވެ. އަދި އިތުރު ހަފްތާއަކަށް ބަންދުކުރާ ކަމަށްވާނަމަ މިހާރު ތައްޔާރުކުރާ ސްކީމުން އެހެން ގްރޭޑްތަކުގެ ދަރިވަރުންނަށް ވެސް ފިލާވަޅުތައް ނަގައިދެވޭނެ ކޮންމެވެސް އިންތިޒާމެއް ހަމަޖައްސާ، ދަރިވަރުންނަށް އެހީތެރިކަން ފޯރުކޮށްދެމުންދާނެ ކަމަށް މިނިސްޓްރީން މައުލޫމާތުދެއެވެ.
