ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) ގެ ސަބަބުން ސަރުކާރު އޮފީސްތަކާއި ކުންފުނިތަކަށް އަމާޒުކޮށްގެން ބާއްވަމުން އަންނަ ކްލަބު މޯލްޑިވްސް ކަޕް ފަސްކުރަން ނިންމައިފި އެވެ.

މި މުބާރާތް ފެށުމަށް ކުރިން ތާވަލުކޮށްފައިވަނީ އޭޕްރިލް މަހުގެ ހަތްވަނަ ދުވަހު އެވެ. އެކަމަކު ކޮރޯނާވައިރަސް (ކޮވިޑް-19) ރާއްޖެއިން ފެނުމާއި ގުޅިގެން، މުބާރާތް އަންނަ ޖުލައި މަހުގެ މެދަކާއި ހަމައަށް ފަސްކުރަން ވަނީ ނިންމާފައެވެ.

މިއަހަރުގެ މުބާރާތް ޖުލައި މަހަށް ފަސްކުރިއިރު، މި މުބާރާތަށް ތައްޔާރުވުމަށް ޓީމުތަކުން ވަނީ ފަރިތަކުރުންތައްވެސް ފަށާފައެވެ.

ކްލަބު މޯލްޑިވްސް ކަޕް އިންތިޒާމުކުރާ ފަރާތުން ބުނީ މި މުބާރާތް ފަސްކުރީ ދުނިޔޭގެ ސިއްހަތު ޖަމިއްޔާ އާއި ރާއްޖޭގެ ހެލްތު ޕްރޮޓެކްޝަން އޭޖެންސީގެ ސަލާމަތާއި ރައްކާތެރިކަމުގެ މިންގަނޑުތަކަށް ބޯލެނބުމުގެ ގޮތުން ކަމަށެވެ.

ރާއްޖެއިން ކޮރޯނާވައިރަސް (ކޮވިޑް-19) އަށް ޕޮޒިޓިވްވި މީހުންގެ އަދަދު މިހާރު ވަނީ 6 އަށް އަރާފައެވެ.

ކްލަބު މޯލްޑިވްސް ކަޕް ފަސްކުރިއިރު، ރާއްޖޭގައި ބާއްވަމުން އަންނަ އެކު ކުޅިވަރު މުބާރާތްތައް މިހާރު އަންނަނީ ފަސްކުރަމުންނެވެ. އެގޮތުން އެފްއޭއެމުން ވަނީ ޖަޒީރާ ޗެމްޕިއަންޝިޕް ފަސްކޮށްފައެވެ. އަދި އެ އެއިދާރާގެ ވައިޑީޕީ ހަރަކާތްތައްވެސް ވަނީ ވަގުތީ ގޮތުން ހުއްޓާލާފައެވެ. އޭގެ އިތުރަށް ރިސޯޓުތަކުގެ މެދުގައި ބާއްވަމުން އަންނަ ރިސޯޓު ލީގާއި އެތުލެޓިކްސް އެސޯސިއޭޝަން އޮފް މޯލްޑިވްސް އާއި މޯލްޑިވްސް ސާފިންގ އެސޯސިއޭޝަނުން ވަނީ އެ އެސޯސިއޭޝަންތަކުގެ ހުރިހާ ހަރަކާތްތަކެއް ހުއްޓާލާފައެވެ.