ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) ގެ ސަބަބުން ރިޒޯޓުތަކުގެ މެދުގައި ބާއްވަމުން އަންނަ ރިސޯޓު ލީގު 2020 ގެ ހަތަރު ޒޯނުގެ މުބާރާތްތައް ފަސްކޮށްފި އެވެ.

މިހާތަނަށް މި މުބާރާތުގެ ދ. ޒޯނުގެ ކުޅުން ނިމިފައިވާއިރު، ފަސްކޮށްފައިވަނީ ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނުގެ މުބާރާތްތަކެވެ.

ރިސޯޓު ލީގު އިންތިޒާމުކުރާ ފަރާތުން ބުނީ ބާކީ އޮތް ހަތަރު ޒޯނުގެ މުބާރާތްތައް ފަސްކުރީ ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) ގެ ސަބަބުން، ސިއްހީ ގޮތުން ސަލާމަތީ ފިޔަވަޅު އެޅުމަށް ކަމަށެވެ. އަދި އެ ހަތަރު މުބާރާތްތައް ދެން ބާއްވާނެ ތާރީޚެއް ފަހުން އިއުލާނުކުރާނެ ކަމަށްވެސް ވަނީ ބުނެފައެވެ.

ރާއްޖެއިން ކޮރޯނާވައިރަސް (ކޮވިޑް-19) އަށް ޕޮޒިޓިވްވި މީހުންގެ އަދަދު މިހާރު ވަނީ 6 އަށް އަރާފައެވެ. އެ 6 މީހުންނަކީވެސް ރިސޯޓުތަކުގައި މަސައްކަތްކުރަމުން އަންނަ މުވައްޒަފުންނެވެ.

ރިސޯޓު ލީގު ފަސްކުރިއިރު، ދާދު ފަހުން ވަނީ މި މުބާރާތުގެ ދ. ޒޯނުގެ ކުޅުން ނިމިފައެވެ. މި ޒޯނުގެ ޗެމްޕިއަންކަން ހޯދާފައިވަނީ ކަނޑިންމަ މޯލްޑިވްސް އެވެ. މިއަހަރުގެ މުބާރާތުގައި 42 ރިސޯޓު ވާދަކުރާއިރު، 79 މެޗު ކުޅެވިގެންދާނެއެވެ.

މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ.