ކޮވިޑް-19 އާ ގުޅިގެން މިހާތަނަށް 125،000 އަށް ވުރެ ގިނަ ކެންސަލޭޝަން އައިސްފައިވާ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ޓޫރިޒަމް ސިނާއަތުގެ ހާލަތު އަންގައިދޭން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އަލީ ވަހީދު ވަނީ ޓޫރިޒަމް ސިނާއަތަށް ބޮޑު ލޮޅުމެއް އަންނާނެކަން ކުރިންވެސް އެނގޭކަން ހާމަކުރެއްވިއެވެ. އަދި މިއީ އަރައިނުގަނެވޭނެ ހާލަތެއް ނޫންކަން ފާހަގަކުރައްވާ، މި ހާލަތުން އަރައިގަންނާނެ ކަމުގެ ޔަގީންކަން ދެއްވިއެވެ.
މިހާތަނަށް އަޅާފައިވާ ފިޔަވަޅުތަކާއި ގުޅޭ އެންމެ ފަހުގެ މައުލޫމާތު ދެއްވަމުން، ވިދާޅުވީ ޓޫރިޒަމް ދާއިރާގެ ހުރިހާ ސްޓޭކްހޯލްޑަރުންނާ މަޝްވަރާކުރެވިގެން ކުރެވެމުންދާ ކަމަށެވެ. އަދި މި ދާއިރާގައި ތިބި ހުރިހާ ފަރާތްތަކަށް ދޭންޖެހޭ އެއްބާރުލުން މިނިސްޓްރީން ދެމުން ގެންދާނެ ކަމަށް ވިދާޅުވިއެވެ.
މި ވައިރަސްއަށް ޕޮޒިޓިވްވީ ދެ މީހުން ފެނުނު ޅ. ކުރެއްދޫގެ ހާލަތު ބަޔާންކުރަމުން އަލީ ވަހީދު ވިދާޅުވީ އެ ރިސޯޓުގައި މި ވަގުތު 696 ފަތުރުވެރިން އެބަ ތިބި ކަމަށެވެ. އަދި ވަރަށް ގާތުން އެ ފަރާތްތަކުގެ ހާލަތު މޮނީޓަރ ކުރެވެމުން ދާކަމަށްވެސް ވިދާޅުވިއެވެ.
އެ ރިސޯޓުގައި ތިބި ފަތުރުވެރިންގެ ތެރޭގައި 4 ދިވެހިން ތިބިކަންވެސް އަލީ ވަހީދު ހާމަކުރެއްވިއެވެ. އަދި އެ ރިސޯޓުގައި ތިއްބެވި ފަރާތްތަކަށް ބޭނުންވާ ކާބޯތަކެތި ފޯރުކޮށްދެވޭނެ އިންތިޒާމްތައް ހަމަޖެހިފައިވާ ކަމަށް ވިދާޅުވިއެވެ.
މިއީ ފަހުގެ ތާރީހެއްގައި ރާއްޖޭގެ ފަތުރުވެރިކަމުގެ ސިނާއަތަށް އައި އެންމެ ބޮޑު ލޮޅުމެވެ. އެގޮތުން ރާއްޖޭގެ ގައުމީ އުފެއްދުންތެރިކަމުގެ ބޮޑު އިންސައްތައެއް ހިއްސާކުރާނީ ފަތުރުވެރިކަމާއި އެސިނާއަތާ ގުޅިފައިހުރި އެހެނިހެން ސިނާއަތްތަކުންނެވެ.
