އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ވެސްޓް ހޭމް ޔުނައިޓެޑް އަތުން އާސެނަލް މޮޅުވިއިރު، ބާންލީއާ ޓޮޓެންހަމް ހޮޓްސްޕާސް ބައްދަލުކުރި މެޗު އެއްވަރުވެއްޖެ އެވެ.
އަމިއްލަ ދަނޑުގައި ކުޅުނު މި މެޗުން އާސެނަލް މޮޅުވީ 1-0 އިންނެވެ. މި މޮޅާއެކު އާސެނަލް ތާވަލުގެ ނުވަވަނައިގައި އޮތީ ކުޅުނު 28 މެޗުން 40 ޕޮއިންޓާއެކު އެވެ. މެޗުން ބަލިވި ވެސްޓް ހޭމް އޮތީ ތާވަކުގެ 16 ވަނައިގައި 29 މެޗުން 27 ޕޮއިންޓާއެކު އެވެ.
ހޮނިހިރު ދުވަހުގެރޭ ކުޅުނު މެޗުގައި ގިނަ ހަމަލާތަކެއް އުފައްދާފައިވަނީ ވެސްޓް ހޭމުންނެވެ. އެކަމަކު މެޗުގައި ފެނިގެންދިޔަ ހަމައެކަނި ލަނޑު މެޗުގެ 78 ވަނަ މިނެޓުގައި މެސުޓް އޮޒިލްގެ އެހީއާއެކު އާސެނަލަށް ކާމިޔާބުކޮށްދިނީ އަލެކްސަންޑަ ލަކަޒޭޓް އެވެ.
މީގެ އިތުރުން ލީގުގައި ހޮނިހިރު ދުވަހުގެރޭ ޓޮޓެންހަމާއި ބާންލީ ބައްދަލުކުރި މެޗު އެއްވަރުވީ 1-1 އިންނެވެ.
މި މެޗުގައި ފުރަތަމަ ލަނޑު ޖަހާ ލީޑު ނެގީ ބާންލީންނެވެ. މެޗުގެ 13 ވަނަ މިނެޓުގައި މި ލަނޑު އެޓީމަށް ޖަހައިދިނީ ކްރިސް ވުޑްސް އެވެ.
އެ ލަނޑަށްފަހު ޓޮޓެންހަމުން މެޗުގައި ކުޅުން ރަނގަޅުކުރިއިރު، އެޓީމުން ނަތީޖާ އެއްވަރުކޮށްފައިވަނީ ދެވަނަ ހށފުގައެވެ. ދެވަނަ ހާށފު ފަށައިގެން ފަސްވަނަ މިނެޓުގައި ލިބުނު ޕެނަލްޓީއަކުން މި ލަނޑު ކާމިޔާބުކޮށްދިނީ ޑެލޭ އަލީ އެވެ. މިއީ ޕެނަލްޓީ އޭރިއާ ތެރެއިން ޓޮޓެންހަމްގެ އެރިކް ލަމެލާ އަށް ބާންލީގެ ޑިފެންޑަރު ބެން މީ ކުރި ފައުލަކާއި ގުޅިގެން ރެފްރީ ޓޮޓެންހަމަށް ދިން ޕެނަލްޓީ އެކެވެ.
މި މެޗު އެއްވަރުވުމާއެކު ޓޮޓެންހަމް ވަނީ ލީގު ތާވަލުގެ އަށްވަނައަށް ވެއްޓިފައެވެ. އެ ޓީމަށް ލިބިފައިވަނީ 29 މެޗުން 41 ޕޮއިންޓެވެ. ޓޮޓެންހަމާއި އެއްވަރު ކުރި ބާންލީ ވަނީ 29 މެޗުން 39 ޕޮއިންޓު ހަމަކޮށް ތާވަލުގެ ދިހަވަނައަށް ކުރިއަށް ޖެހިލާފައެވެ.