މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ފްރެންޗް ލީގުގައި ހޮނިހިރު ދުވަހުގެރޭ ސްޓްރަސްބޯގް އާއި ޕީއެސްޖީ ބައްދަލުކުރަން ހަމަޖެހިފައި އޮތް މެޗު ފަސްކޮށްފި އެވެ.

ޔޫރަޕްގެ ގިނަ ގައުމުތަކުން ކޮރޯނާ ވައިރަސް ފެނިފައިވާއިރު، ގިނަ ގައުމުތަކުން އަންނަނީ ސަލާމަތީ ފިޔަވަޅުތައް ވަރުގަދަ ކުރަމުންނެވެ. އެގޮތުން ކްލަބު ލެވެލްގެ ގިނަ މެޗުތަކެއް ފަސްކޮށްފައިވާއިރު، ބައެއް މެޗުތައް ސަޕޯޓަރުން ނުވައްދައި ކުޅެންވެސް މިހާރު ވަނީ ނިންމާފައެވެ.

ފްރާންސްގައިވެސް މި ވައިރަސް މިހާރު ފެތުރެމުންދާއިރު، މިއީ މި ވައިރަހުގެ ސަބަބުން ފްރެންޗް ލީގުގެ މެޗެއް ފަސްކުރި ފުރަތަމަ ފަހަރެވެ.

ސްޓްރަސްބޯގުގެ ދަނޑުގައި ހޮނިހިރު ދުވަހުގެރޭ ކުޅެން އޮތް ލީގު މެޗު ފަސްކުރިއިރު، މި މެޗު ފަހުން ކުޅޭނެ ވަކި ތާރީހެއް އަދި ކަނޑައެއް ނާޅައެވެ.

ފްރާންސްގެ އިތުރުން މި ވައިރަހުގެ ސަބަބުން ކްލަބު ފުޓްބޯޅައަށް އެންމެ ބޮޑު އަސަރެއް ކޮށްފައިވަނީ އިޓަލީއަށެވެ. އެގޮތުން އިޓާލިއަން ލީގާއި އިޓާލިއަން ކަޕްގެ ގިނަ މެޗުތަކެއް މިހާތަނަށް ވަނީ ފަސްކޮށްފައެވެ.

ކްލަބު ފުޓްބޯޅައިގެ އިތުރުން ބައިނަލްއަގުވާމީ ފުޓްބޯލަ މެޗުތައްވެސް ފަސްކުރަންޖެހިދާނެ ކަމުގެ ބިރު އެބައޮތެވެ. އެގޮތުން މިއަހަރުގެ ޖޫން މަހު ބޭއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތް ފަސްކުރުމަށް މަޝްވަރާ ކުރަން މިހާރު ޔުއެފާއިން ވަނީ ނިންމާފައެވެ.

ދުނިޔޭގެ އެކި ކަންކޮޅުތަކުގައި ކޮރޯނާ ވައިރަސް ހަލުވިކަމާއެކު ފެތުރމުންދާއިރު، މިހާތަނަށް ކޮރޯނާ ވައިރަސް ޖެހިގެން 3،400 އަށްވުރެ ގިނަ މީހުން ވަނީ މަރުވެފައެވެ.